La 37 - BAIBLO ALOO NGMAMI KLƆUKLƆU Ɔ

Kpakpa maa ye yayami nɔ kunimi

¹ Koo ye o tsui ngɛ yayami peeli a he; o hɛ ko kɔ nihi nɛ peeɔ yayami a nɔ.

² E be kɛe nɛ a maa laa kaa nga gbigbli; a ma gbo tlukaa kaa ba nɛ ngla.

³ Ngɔɔ o hɛ ngɔ fɔ Yawɛ nɔ nɛ o pee kpakpa, konɛ o hi zugba a nɔ ngɛ he jɔmi mi.

⁴ Mo na Yawɛ he bua jɔmi, nɛ e ma ha mo níhi nɛ o tsui suɔ.

⁵ Ngɔɔ o he kɛ ha Yawɛ; ngɔɔ o hɛ kɛ fɔ e nɔ, nɛ e maa piɛ o he.

⁶ E maa ye dami sane ha mo; e maa wo mo nguɔ. Nɔ́ nɛ ɔ maa je kpo paa kaa pu la, nɛ nihi tsuo maa na.

⁷ Pee dii ngɛ Yawɛ hɛ mi; too o tsui si, nɛ o hyɛ lɛ blɔ. Koo ye o tsui ngɛ nihi nɛ ná a he ɔ a he; nihi nɛ pee yayami nɛ a kɛ ná a he ɔ, koo ye o tsui ngɛ a he.

⁸ O mi mi ko fu hu; koo ye o tsui hu. Ní nɛ ɔmɛ haa nɛ nɔ peeɔ yayami.

⁹ Ejakaa a ma kpata yayami peeli a hɛ mi. Se ni nɛmɛ nɛ ngɔɔ a hɛ kɛ fɔɔ Yawɛ nɔ ɔ, mɛɛ lɛɛ a nine maa su zugba a nɔ.

¹⁰ E piɛ bɔɔ nɛ o be yayami peeli nae hu; o ma hla mɛ ngɛ a hi he ɔmɛ, se o be mɛ nae.

¹¹ Nihi nɛ a he jɔ ɔ, mɛɛ a maa hi zugba a nɔ ngɛ kplɔkɔtɔ, kɛ tue mi jɔmi mi.

¹² Yayami peelɔ soɔ kpakpa peelɔ yi nɔ; e hyɛɛ lɛ too kɛ ninyɛ hɛngmɛ.

¹³ Se Yawɛ lɛɛ e muɔɔ yayami peeli, ejakaa e le kaa e be kɛe nɛ a ma kpata a hɛ mi.

¹⁴ Yayami peeli hiaa klaate, nɛ a dɔɔ a kɛ̃ɛ̃ ɔmɛ, konɛ a gbe ohiatsɛmɛ, kɛ dɛgutsɛmɛ; konɛ a kpata nihi nɛ peeɔ nɔ́ nɛ da a a hɛ mi.

¹⁵ Se a kɛ a klaate ɔmɛ maa gbe mɛ nitsɛmɛ a he, nɛ a kɛ̃ɛ̃ ɔmɛ tsuo maa ku.

¹⁶ Nɔ́ ko bɔbɔyoo nɛ ngɛ dalɔ dɛ ɔ hi pe yayami peeli babauu a ní nɛ a na.

¹⁷ Ejakaa Yawɛ ma ha nɛ yayami peeli a he wami maa ta. Se ni nɛmɛ nɛ peeɔ kpakpa lɛɛ e maa bu a he.

¹⁸ Nihi nɛ peeɔ nɔ́ nɛ da a, Yawɛ maa bu a he daa; nɛ a maa hi zugba a nɔ kɛ maa ya neneene.

¹⁹ Ke haomi ba a, a hɛ mi be si puee. Hwɔ be mi ɔ, mɛɛ lɛɛ a maa tɔ.

²⁰ Se yayami peeli lɛɛ a hɛ mi ma kpata. Yawɛ he nyɛli ɔmɛ maa pee kaa nga nɔ mɔmɔ. A maa ta si kake too kaa bɔ nɛ la su ku se poo ɔ.

²¹ Ke nɔmlɔ yayami pa sika a, e wui hiɔ; dalɔ lɛɛ e naa mɔbɔ, nɛ e haa nɔ nɔ́.

²² Nihi nɛ Yawɛ gbaa mɛ ɔ, a nine maa su zugba a nɔ. Se ni nɛmɛ nɛ e gbiɛ mɛ ɔ, mɛɛ lɛɛ a ma kpata a hɛ mi.

²³ Yawɛ lɛ tsɔɔ nɔ blɔ nɛ sa nɛ e nyɛɛ nɔ. Nɛ ke o pee saminya a, e naa o he bua jɔmi.

²⁴ Ke o nɔ si tete po, o be zugba tlɔe; ejakaa Yawɛ ma wo o nɔ ekohu.

²⁵ Kɛ je ye nihe be mi kɛ ba si ye wami si nɛ ɔ, i nɛ kaa Yawɛ kua nɔ ko nɛ peeɔ nɔ nɛ da. E bimɛ hu, i nɛ kaa a ngɛ ní bae.

²⁶ Nɔmlɔ nɛ yeɔ Mawu gbeye ɔ, daa nɛ ɔ, e naa mɔbɔ. E haa nɔ nɔ́; e paa nihi sika, nɛ e bimɛ peeɔ gbaami.

²⁷ Kpa yayami peemi, nɛ o pee kpakpa, kɛkɛ ɔ, o nina maa hi zugba a nɔ daa;

²⁸ ejakaa Yawɛ suɔ nɔ́ nɛ da; nihi nɛ yeɔ lɛ anɔkuale ɔ, e kua we mɛ. Yawɛ maa bu dali a he daa; se yayami peeli a nina lɛɛ a hɛ mi ma kpata.

²⁹ Nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.

³⁰ Dalɔ nya mi munyu ɔ, nile sɔuu; daa nɛ ɔ, e suɔ kaa a ye dami sane.

³¹ E ngɔɔ e Mawu ɔ mlaa a kɛ toɔ e tsui mi, nɛ e si we se gblegbleegble.

³² Yayami peelɔ hii nɔmlɔ kpakpa dae, nɛ e hlaa kaa e maa gbe lɛ.

³³ Se Yawɛ be dalɔ he ngmɛɛe kɛ wo yayami peelɔ dɛ mi kɔkɔɔkɔ. Ke a ngɔ dalɔ kɛ ba kojomi he hu, Yawɛ be blɔ ngmɛe nɛ a bu lɛ fɔ.

³⁴ Ngɔɔ o hɛ ngɔ fɔ Yawɛ nɔ, nɛ o ye e mlaa amɛ a nɔ; nɛ e ma ha nɛ o nine maa su zugba a nɔ. Ke a ngɛ yayami peeli a hɛ mi kpatae ɔ, o hɛngmɛ kɛkɛ o kɛ maa hyɛ mɛ.

³⁵ Yiwutsotsɛ kpanaku ko hi si; i le lɛ. E nɔ kuɔ kaa Lebanon seda tso.

³⁶ Be ko se ɔ, i ya gu he nɛ e hii ɔ, se e be lejɛ ɔ. I hla lɛ, se i nɛ lɛ.

³⁷ Moo to nɔmlɔ kpakpa he hɛ; hyɛ dalɔ saminya, nɔmlɔ nɛ he jɔ ɔ, hwɔɔ se ɔ, e maa hi si ngɛ tue mi jɔmi mi.

³⁸ Se yayami peeli lɛɛ a ma kpata a kɛ a nina tsuo a hɛ mi.

³⁹ Yawɛ heɔ dali a yi wami; e buɔ a he ngɛ amanehlu be mi.

⁴⁰ Yawɛ piɛɔ a he; e jeɔ mɛ kɛ jeɔ yayami peeli a dɛ mi, nɛ e heɔ a yi wami. Ejakaa a ba saa we ngɛ e ngɔ.