La 35 - BAIBLO ALOO NGMAMI KLƆUKLƆU Ɔ

Yawɛ, ba piɛ ye he

¹ Yawɛ, nihi nɛ kɛ mi ná a, tee si kɛ wo mɛ. Nihi nɛ kɛ mi ngɛ hwue ɔ, o kɛ mɛ nɛ hwu.

² Ngɔɔ o tsɛ̃i, kɛ o ta hwumi níhi, nɛ o ba je ngmlaa ha mi.

³ Moo gbla akplɔ, kɛ gbiɛ kɛ wo nihi nɛ ngɛ ye se nyɛɛe ɔ a he. De mi ke o ma he ye yi wami.

⁴ Nihi nɛ ngɛ hlae nɛ a gbe mi ɔ, ha nɛ zo nɛ gbe mɛ, nɛ a yi mi tomi ɔ nɛ bɔ mɛ. Ni nɛmɛ nɛ ngɛ ye yi nɔ soe ɔ, ha nɛ basabasa nɛ sɛ a kpɛti, nɛ a kpale a se.

⁵ Ha nɛ a pee kaa tsakati ngɛ kɔɔhiɔ nya. Ha nɛ Yawɛ bɔfo ɔ nɛ fie mɛ kɛ ho.

⁶ Ha nɛ a blɔ ɔ nɔ nɛ wo diblii, nɛ e sane. Ha nɛ Yawɛ bɔfo ɔ nɛ nyɛɛ a se.

⁷ Ejakaa a tsɔ mi klama, nɛ a tsua muɔ ngɔ to ha mi yaka gu.

⁸ Ha nɛ a hɛ mi nɛ kpata tlukaa be mi nɛ a li a he be. Klama a nɛ a tsɔ mi ɔ, ha nɛ e du mɛ. Muɔ ɔ nɛ a tsua kɛ to ha mi ɔ, ha nɛ mɛ nitsɛmɛ a nɔ mi.

⁹ Kɛkɛ ɔ, Yawɛ he ɔ, ma na bua jɔmi. Ye bua maa jɔ, ejakaa e he ye yi wami.

¹⁰ Ma de kɛ je ye tsui mi tɔɔ ke, “Yawɛ, mɛnɔ lɛ e kɛ mo sɔ? Mo lɛ o jeɔ nɔ nɛ he wɛ kɛ jeɔ nɔ nɛ he wa pe lɛ ɔ dɛ mi. Mo lɛ o jeɔ dɛgutsɛ kɛ jeɔ nɔ nɛ waa lɛ yi mi ɔ dɛ mi.”

¹¹ Lakpa odasehi teɔ si kɛ woɔ mi; a poɔ ye nya, nɛ a deɔ níhi nɛ i li he nɔ́ ko kɛ siɔ mi.

¹² A peeɔ mi yayami kɛ toɔ kpakpa nane mi, nɛ a woɔ mi ka, konɛ a gbe mi.

¹³ Se imi lɛɛ benɛ a be he wami ɔ, i bu kpekpe ya bo. I ha hwɔ nɛ i kɛ wa ye nɔmlɔ tso ɔ yi mi. I fa kue wawɛɛ ngɛ ye yi mi

¹⁴ kaa bɔ nɛ ma fa kue ha ye huɛ, aloo ye nyɛmi. I ma ye yi si dii, nɛ i ye kɔmɔ kaa nɔ ko nɛ e nyɛ gbo nɛ e ngɛ ya nyɛe.

¹⁵ Se benɛ haomi ba ye nɔ ɔ, a nya nɛ a bua a he nya, konɛ a ye ye he fɛu. He guɛ gbeli ba bɔle mi nɛ i li; a gbe ye he guɛ nɛ he jɔɔmi be mi.

¹⁶ A kɛ ma mi yaka nimli ɔmɛ ya pee kake. A plɛ a nya wo mi, nɛ a ye ye he fɛu.

¹⁷ Yawɛ, o maa hi nɔ́ nɛ ɔ hyɛe kɛ yaa si mɛni be! Jé mi kɛ je kikɛmɛ a ogbetee nɛ ɔmɛ a dɛ mi! Ko ha nɛ a kpata ye hɛ mi!

¹⁸ Ma na mo si, nɛ ma je o yi ngɛ o ma kpekpemi ɔ tsuo a hɛ mi.

¹⁹ Ko ha nɛ ye he nyɛli lakpatsɛmɛ ɔmɛ nɛ a nya. Nihi nɛ nyɛɔ mi yaka gu ɔ, ko ha nɛ a kpɛ mi.

²⁰ A tu we he jɔmi munyu gblegbleegble. Nɔ́ nɛ a peeɔ ji nihi nɛ suɔ tue mi jɔmi ɔ, lakpa sɔuu a yeɔ ngɛ a he.

²¹ A gbɛɔ a nya mi hatoo kɛ woɔ mi, nɛ a deɔ ke, “Ɛhɛɛ, wa na lɛ paa kɛ wɔ nitsɛmɛ wa hɛngmɛ.”

²² Yawɛ, tse o ngɛ hyɛe? Ko ma o nya! Nyɔmtsɛ, koo je ye he!

²³ Ye Mawu kɛ ye Nyɔmtsɛ, tee si nɛ o fa ye he! Tee si nɛ o ye ye sane ɔ ha mi koo!

²⁴ Yawɛ, ye Mawu, mo nɛ o yeɔ dami sane. Moo wo mi nguɔ koo! Ko ha nɛ ye he nyɛli nɛ muɔ mi.

²⁵ Ko ha nɛ a de ke, “Ɛhɛɛ, wa nine gbe lɛ! Nɔ́ nɛ wa ngɛ hlae ɔ pɛ ji nɛ ɔ nɛ!”

²⁶ Nihi nɛ hii nyae be mi nɛ i ngɛ nɔ́ nae ɔ, ha nɛ zo nɛ gbe mɛ, nɛ a pee basabasa. Ni nɛmɛ nɛ susuɔ kaa mɛɛ a hi pe mi ɔ, ha nɛ zo nɛ gbe mɛ kpɔtɔɔ, nɛ a hɛ mi nɛ pue si.

²⁷ Se nihi tsuo nɛ maa suɔ kaa a wo mi nguɔ ɔ, ha nɛ a hwɔ lele, nɛ a de si abɔ ke, “Yawɛ kle! E bua jɔ e he kaa e tsɔlɔ ɔ ye manye.”

²⁸ Ma jaje kaa Mawu nɛ yeɔ dami sane ji mo, nɛ ma je o yi daa.