La 34 - BAIBLO ALOO NGMAMI KLƆUKLƆU Ɔ

Mawu sina la

¹ Ma na Yawɛ si daa; ma la kɛ je e yi be tsuaa be.

² Ma fĩa kɛ fɔ Yawɛ nɔ; nɔ́ nali maa nu he, nɛ a ma nya.

³ Nyɛ ha nɛ wɔ tsuo waa wo Yawɛ hɛ mi nyami nɛ wa je e yi.

⁴ I fa kue ha Yawɛ, nɛ e bu mi tue; e ha nɛ i jɔɔ gbeye yemi.

⁵ Nihi nɛ ngɔɔ a hɛ kɛ fɔɔ e nɔ ɔ, a naa bua jɔmi; zo gbi mɛ gblegbleegble.

⁶ Nɔ́ nalɔ nɛ ɔ fa kue ha Yawɛ; Yawɛ bu lɛ tue, nɛ e je lɛ kɛ je e haomi ɔmɛ tsuo a mi.

⁷ Yawɛ bɔfo ɔ buɔ nihi nɛ yeɔ Yawɛ gbeye ɔ a he, nɛ e heɔ a yi wami.

⁸ Nyɛɛ ka Yawɛ nɛ nyɛɛ hyɛ, nɛ nyɛ maa na kaa e hi. A gbaa nɔ nɛ ngɔɔ e hɛ kɛ fɔɔ e nɔ ɔ.

⁹ Nyɛ, Yawɛ ni klɔuklɔuhi, nyɛɛ ye lɛ gbeye. Ejakaa nihi nɛ yeɔ lɛ gbeye ɔ, nɔ́ ko nɔ́ ko hia we mɛ.

¹⁰ Jata bihi po e fiɔ mɛ nɛ hwɔ yee mɛ. Se nihi nɛ hlaa Yawɛ se blɔ ɔ, nɔ́ ko nɔ́ ko hia we mɛ.

¹¹ Ye bimɛ, nyɛɛ ba nɛ nyɛ ba bu mi tue, nɛ ma tsɔɔ nyɛ nɛ nyɛɛ ye Yawɛ gbeye.

¹² Mɛnɔ lɛ suɔ kaa e na bua jɔmi ngɛ je mi? Mɛnɔ lɛ suɔ kaa e se nɛ kɛ ngɛ je mi, nɛ e fiɛ e yi nɔ?

¹³ Hyɛ nɛ o ko tu munyu nɛ sɛ́! Hyɛ nɛ o ko ye lakpa!

¹⁴ Jɔɔ yayami peemi, nɛ o pee kpakpa. Hla tue mi jɔmi, nɛ o nyɛɛ se.

¹⁵ Yawɛ hɛngmɛ ngɛ dali a he, nɛ e buɔ a kue fami tue.

¹⁶ Yayami peeli lɛɛ Yawɛ jeɔ e hɛ kɛ piɔ mɛ, nɛ ke a gbo ɔ, e kɛ we kɛkɛ hɛ je a nɔ.

¹⁷ Ke dali fa kue ha Yawɛ ɔ, e nuɔ, nɛ e jeɔ mɛ kɛ jeɔ a haomihi tsuo a mi.

¹⁸ Nihi nɛ a kɔni mi jɔ̃, kɛ nihi nɛ a be hɛ nɔ kami ɔ, Yawɛ hii a kasa nya, konɛ e wo mɛ he wami.

¹⁹ Nɔ nɛ peeɔ nɔ́ nɛ da a, haomi babauu baa e nɔ; se Yawɛ jeɔ lɛ kɛ jeɔ lɛ tsuo mi.

²⁰ Yawɛ hyɛɛ e nɔ saminya; e wu kake ngmelu po ku we ngɛ e wu ɔmɛ tsuo a kpɛti.

²¹ Yayami peelɔ ɔ, yayami kɛ̃ lɛ maa gbe lɛ. Nihi nɛ nyɛɛ dali ɔ, a maa gbla a tue.

²² Yawɛ ma he e sɔmɔli a yi wami. Nihi nɛ ba saa we ngɛ e ngɔ ɔ, a ti nɔ ko nɔ ko hɛ mi be kpatae.