La 31 - BAIBLO ALOO NGMAMI KLƆUKLƆU Ɔ

I ngɔ ye hɛ kɛ fɔ Mawu nɔ

¹ Yawɛ, i ba sa we ngɛ o ngɔ; ko ha nɛ zo nɛ gbe mi. Mo he ye yi wami, ejakaa dalɔ ji mo.

² Moo bu mi tue koo! Mo he ye yi wami esɔ! Moo pee ye tɛ sa, nɛ o bu ye he! Moo pee ye mɔ, nɛ o he ye yi wami!

³ Ee, ye wesa he, kɛ ye mɔ ji mo. Lɔ ɔ he ɔ, moo nyɛɛ ye hɛ mi, nɛ o tsɔɔ mi blɔ kaa bɔ nɛ o wo si ɔ.

⁴ Mo ji ye wesa he; jé mi kɛ je klama nɛ a tsɔ mi ɔ mi.

⁵ Yawɛ, Mawu anɔkualetsɛ; i ngɔ ye he kɛ ha mo. Mo lɛ o ma he ye yi wami.

⁶ Yawɛ, o sume nihi nɛ jaa lakpa mawuhi saasaa; se imi lɛɛ i ngɔ ye hɛ kɛ fɔ o nɔ.

⁷ Ma nya, nɛ ma na bua jɔmi ngɛ o suɔmi nɛ be nyagbe ɔ he. O na ye nɔ́ nami ɔ; benɛ i ngɛ haomi mi ɔ, o hyɛ ye nɔ.

⁸ O ngɔɛ mi kɛ wui he nyɛli a dɛ mi; o ha mi he jɔmi, nɛ i yaa he tsuaa he nɛ i suɔ.

⁹ Yawɛ, naa mi mɔbɔ, ejakaa i ngɛ haomi mi. Aywilɛho sɔuu ha nɛ ye hɛngmɛhi fuu; ye nɔmlɔ tso ɔ hu gbɔjɔ.

¹⁰ Kɔmɔ yemi babauu ha nɛ ye he wami ta. Ya fomi po ye wami be ɔ nɔ kpiti. Ye he yayami ɔmɛ ha nɛ i gbɔjɔ, nɛ ye wuhi tete po pee hiɔ.

¹¹ I plɛ pee ahlua nɔ́ ko kɛ ha ye he nyɛli; i pee muɔ nɔ́ kɛ ha ye nyɛmimɛ, nɛ ye huɛmɛ lɛɛ i plɛ pee gbeye lohwe ha mɛ. Ke nihi na mi ngɛ gbɛjegbɛ nɔ kɛkɛ pui a tu fo!

¹² Nɔ tsuaa nɔ hɛ je ye nɔ; nɔ ko nɔ ko kaii we mi hu. I pee kaa nɔ nɛ gbo, aloo buɛ nɛ ywia.

¹³ I nu nɛ nihi babauu ngɛ ye biɛ puɛe; gbeye níhi bɔle mi kɛ kpe. A ngɛ ye yi nɔ soe, konɛ a gbe mi.

¹⁴ Se imi lɛɛ i ngɔ ye hɛ kɛ fɔ mo, Yawɛ o nɔ. I de ke, “Mo pɛ ji ye Mawu”.

¹⁵ I ngɛ o dɛ mi be tsuaa be. Mo je mi kɛ je ye he nyɛli a dɛ mi; mo je mi kɛ je nihi nɛ waa mi yi mi ɔ a dɛ mi.

¹⁶ Naa imi, o tsɔlɔ ɔ mɔbɔ! Mo he ye yi wami ngɛ o suɔmi nɛ ngɛ daa a he.

¹⁷ Yawɛ, i ngɛ mo tsɛe; ko ha nɛ zo nɛ gbe mi. Ha nɛ yiwutsotsɛmɛ mohu a hɛ mi nɛ pue si, nɛ a ma a nya kɛ ya gbeje.

¹⁸ Lakpatsɛmɛ, kɛ he nɔ woli, kɛ nɔ he guɛ gbeli nɛ tuɔ munyu yaya kɛ siɔ dali ɔ, ha nɛ mɛ tsuo a ma a nya.

¹⁹ Nihi nɛ yeɔ mo gbeye ɔ, hyɛ ní kpakpahi babauu nɛ o dla kɛ to ha mɛ! Ni nɛmɛ nɛ ba saa we ngɛ o ngɔ ɔ, hyɛ ni nguanguahi babauu nɛ o pee ha mɛ. O peeɔ ní nɛ ɔmɛ tsuo ngɛ ma hɛ mi paa.

²⁰ O ngɔɔ mɛ kɛ laa ngɛ o laami he ɔ, konɛ nihi kó nyɛ nɛ a so a yi nɔ. O ngɔɔ mɛ kɛ toɔ o laami he ɔ, konɛ nihi kó na a he blɔ nɛ a fia mɛ lilɛ.

²¹ A je Yawɛ yi! Ejakaa benɛ he nyɛli, nɛ a sa ba tua mi ye yi ɔ, e je e suɔmi ɔ kpo kɛ tsɔɔ mi ngɛ nyakpɛ blɔ nɔ.

²² Ye tsui po, nɛ i susu kaa e je e juɛmi kɛ je ye nɔ. Se benɛ i fa kue ha lɛ ɔ, e bu mi tue.

²³ Nyɛɛ suɔ Yawɛ, nyɛ e ni klɔuklɔuhi tsuo! Yawɛ baa nihi tsuo nɛ yeɔ lɛ anɔkuale ɔ a yi, se he nɔ woli lɛɛ e gblaa a tue bɔ nɛ sa mɛ.

²⁴ Nyɛ nihi tsuo nɛ nyɛ ngɔɔ nyɛ hɛ kɛ fɔɔ Yawɛ nɔ ɔ, nyɛ wlua nyɛ! Yawɛ ma ha nyɛ he wami.