La 30 - BAIBLO ALOO NGMAMI KLƆUKLƆU Ɔ

Sina la

¹ Ma je o yi Yawɛ, ejakaa o he ye yi wami. O ha we nɛ ye he nyɛli nɛ nya; o ngmɛ́ mɛ blɔ nɛ a ye ye he fɛu.

² Yawɛ, ye Mawu, i fa kue ha mo, nɛ o tsa mi.

³ O je mi kɛ je gbenɔ dɛ mi. Yawɛ, jinɛ i miɔ nɛ ma gbo, se o ha nɛ i na he wami ekohu.

⁴ Nyɛ, Yawɛ ni klɔuklɔuhi, nyɛ la kɛ je Yawɛ yi. Nyɛ kai níhi nɛ nɔ klɔuklɔu ɔ tsu, nɛ nyɛɛ na lɛ si.

⁵ E mi mi fuɔ be kuku kɛkɛ; se e mɔbɔ nami lɛɛ e ngɛ daa. O maa wo ya nyɔ mi, se ke je na pɛ bua jɔmi ba.

⁶ I susu kaa i ngɛ he jɔmi mi, nɛ i de ngɛ ye yi mi ke, “Nɔ́ ko nɔ́ ko be mi pee!”

⁷ Yawɛ, o na mi mɔbɔ nɛ o bu ye he kaa yo nguaa ko. Se o ba laa mi, nɛ i ye gbeye.

⁸ Yawɛ, i fa kue ha mo; i kpa mo pɛɛ ke o na mi mɔbɔ.

⁹ Ke i gbo nɛ a pu mi ɔ, mɛni se o ma na? Anɛ zu ma nyɛ ma je o yi lo? O we anɔkuale yemi ɔ, anɛ zu ma nyɛ maa ye he odase lo?

¹⁰ Yawɛ, moo bu mi tue nɛ o na mi mɔbɔ! Yawɛ, moo piɛ ye he!

¹¹ O ha nɛ i kpa kɔmɔ yemi nɛ i bɔni domi. O je kpekpe ya bo ɔ ngɛ ye he, nɛ o ha mi bua jɔmi.

¹² Enɛ ɔ he je ɔ, i be ye nya mae; se mohu ma la kɛ je o yi. Yawɛ, ye Mawu, ma na mo si daa.