La 28 - BAIBLO ALOO NGMAMI KLƆUKLƆU Ɔ

Kue fami kɛ ha yemi kɛ buami

¹ Yawɛ, mo nɛ o faa ye he; i ngɛ mo tsɛe, moo bu mi tue koo! Ke o pui ye nya mi ɔ, lɛɛ ma pee kaa nihi nɛ ngɛ gbeje ɔ a ti nɔ kake.

² Ke i wo ye nine nɔ kɛ tsɔɔ o we klɔuklɔu ɔ, nɛ i fa kue kɛ bi mo yemi kɛ buami ɔ, moo bu mi tue.

³ Koo bu mi fɔ kɛ si yiwutsotsɛmɛ, kɛ yayami peeli a nɔ. Nimli nɛ ɔmɛ, kɛ a nyɛmimɛ tuɔ munyu ngɛ he jɔmi mi. Se a tsui mi hyi kɛ yayami.

⁴ Gbla a tue ngɛ a ní peemi ní ɔmɛ a he; gbla a tue ngɛ a yi wu tso ní ɔmɛ a he; wo mɛ hiɔ bɔ nɛ sa mɛ pɛ.

⁵ Akɛnɛ a bui níhi nɛ Yawɛ tsu, kɛ níhi nɛ e pee ɔ he je ɔ, Yawɛ ma kpata a hɛ mi pɛsɛpɛsɛ, nɛ e be mɛ mɔbɔ nae hu.

⁶ A je Yawɛ yi, ejakaa e bu ye kue fami ɔ tue.

⁷ Yawɛ ji ye he bulɔ, kɛ ye yi baalɔ; e nɔ lɛ i ngɔ ye hɛ kɛ fɔ. E piɛɔ ye he, nɛ e haa mi bua jɔmi. Ma la kɛ je e yi.

⁸ Yawɛ buɔ e ma a he. Nɔ nɛ e pɔ lɛ nu ɔ, e faa e he, nɛ e baa e yi.

⁹ Yawɛ, he o ma a yi wami; moo gbaa o nina a. Moo hyɛ mɛ kɛ ya neneene kaa bɔ nɛ to hyɛlɔ hyɛɛ e tohi.