La 27 - BAIBLO ALOO NGMAMI KLƆUKLƆU Ɔ

I ngɔ ye hɛ kɛ fɔ Mawu nɔ

¹ Yawɛ ji ye la; lɛ ji ye yi wami helɔ. lɔ ɔ he ɔ, i yi nɔ ko nɔ ko gbeye. Yawɛ ji ye he wami nɛ buu ye he; mɛnɔ gbeye ma ye mɔ?

² Ke ye he nyɛli, yayami peeli ba tua mi nɛ́ a gbe mi ɔ, a ma tɛ nɔ, nɛ a maa nɔɔ si.

³ Ke ta ba tua mi, nɛ tabohi ba sa ye yi po, i be gbeye yee. Mawu nɔ kɛkɛ lɛ ma ngɔ ye hɛ kɛ fɔ.

⁴ Nɔ́ kake kɛkɛ lɛ i bi Yawɛ; nɔ́ kake pɛ lɛ i ngɛ hlae ngɛ e dɛ. Lɔ ɔ ji kaa ma hi Yawɛ we ɔ ye wami be ɔ tsuo; ma na Yawɛ he fɛu ɔ, nɛ ma fa kue ngɛ e we ɔ.

⁵ Haomi be mi ɔ, e maa ngɔ mi kɛ laa ngɛ laami he ɔ, ngɛ e we ɔ; e maa ngɔ mi kɛ da tɛ sa nɔ.

⁶ Kikɛ nɛ ɔ ma pee kɛ ye ye he nyɛli tsuo nɛ bɔle mi ɔ a nɔ kunimi. I kɛ bua jɔmi maa sã bɔ ngɛ Yawɛ we ɔ, nɛ ma la kɛ je e yi.

⁷ Yawɛ lee, ke i tsɛ mo ɔ, moo bu tue. Naa mi mɔbɔ, nɛ o he mi nɔ.

⁸ O de ke, “Nyɛɛ ba ye ngɔ.” Imi hu i kɛ bua jɔmi he nɔ ke, “Yawɛ, i ma;

⁹ koo laa mi.” Koo ngɔ abofu kɛ fie imi, o tsɔlɔ ɔ. Mawu, mo ji ye yi wami helɔ; mo lɛ o piɛɔ ye he. Koo je ye he; ko kua mi.

¹⁰ Ke tsaatsɛ kɛ maa kua mi po, Yawɛ maa hyɛ ye nɔ.

¹¹ Yawɛ, tsɔɔ mi nɔ́ nɛ o ngɛ hlae nɛ ma pee, nɛ o kpaka mi kɛ gu blɔ nɛ da nɔ, ejakaa i ngɛ he nyɛli babauu.

¹² Koo ngmɛɛ ye he kɛ ha ye he nyɛli, ejakaa lakpa odasehi, kɛ yiwutsotsɛmɛ te si kɛ wo mi.

¹³ I heɔ yeɔ kaa ma hi je mi kɛ yaa si ma na Yawɛ mi mi himi ɔ ngɛ wami nɛ ɔ mi.

¹⁴ Ngɔɔ o hɛ kɛ fɔ Yawɛ nɔ. Na tsui; o kɔni mi ko jɔ̃, nɛ e maa wo mo he wami. Ee, ngɔɔ o hɛ kɛ fɔ Yawɛ nɔ.