La 22 - BAIBLO ALOO NGMAMI KLƆUKLƆU Ɔ

Awe nyami kɛ yi jemi la

¹ Ye Mawu, ye Mawu, mɛni he je o kua mi? Mɛni he je i ngɛ awe nyae nɛ o daa si ngɛ se, nɛ o bɛ nɛ o ba je ngmlaa ha mi ɔ?

² Ye Mawu, ke i tsɛ mo piani ɔ, o he we mi nɔ. Ke i tsɛ mo nyɔ mi hu, ja nɔuu. Mɛni he je?

³ Se kɛ̃ ɔ, mo ji Mawu klɔuklɔu ɔ nɛ hii si ngɛ matsɛ sɛ ɔ nɔ. Mo, o yi lɛ Israel jeɔ.

⁴ Wa nɛmɛ ɔmɛ ngɔ a hɛ kɛ fɔ o nɔ. A ngɔ a hɛ kɛ fɔ o nɔ, nɛ o he a yi wami.

⁵ A fa kue ha mo, nɛ o he a yi wami. A ngɔ a hɛ kɛ fɔ o nɔ, nɛ a pia we a he kaa a pee ja.

⁶ Se imi lɛɛ, pi nɔmlɔ ji mi hu; i ngɛ kaa gɔgɔ. Nihi tsuo pɛpɛɛpɛ hiee mi, nɛ a bɔɔ mi ahlua.

⁷ Nɔ tsuaa nɔ nɛ maa na mi ɔ, e yeɔ ye he fɛu. A plɛɔ a nya, nɛ a mimiɛɔ a yi.

⁸ A deɔ ke, “Tse e ke e ngɔ e hɛ kɛ fɔ Yawɛ nɔ? Yawɛ nɛ he e yi wami koo? Ke Yawɛ suɔ lɛ ɔ, mɛni he je e ba píɛ we e he?”

⁹ Se, mo lɛ o je mi kɛ je maa muklii mi; nɛ o hyɛ ye nɔ kɛ je be mi nɛ i ngɛ nyɔ nya tɔɔ.

¹⁰ Kɛ je be mi nɛ maa fɔ mi tɔɔ lɛ i ngɔ ye hɛ ngɔ fɔ o nɔ. Mo nɔ kake too ji ye Mawu.

¹¹ Koo je ye he; ejakaa i miɔ nɛ ma sɛ haomi mi, nɛ nɔ ko be nɛ maa je ngmlaa ha mi.

¹² He nyɛli kpanakuhi babauu bɔle mi kɛ kpe; a he ngɛ gbeye kaa na kuhi nɛ je Bashan zugba a nɔ.

¹³ A gbɛɔ a nya mi hatoo kɛ woɔ mi kaa jata nɛ ngɛ huãe nɛ e hɛ mi pee klamaklama.

¹⁴ Ye he wami ta kaa nyu nɛ kpa pue si. Ye wuhi je a blɔ hehi, nɛ ye tsui pee kaa hwo gbaku nɛ sile.

¹⁵ Ye kuɔ si gbli kaa ngɛyu kokoe mi, nɛ ye lilɛ mɛtɛ ye nya mi. O si mi ngɛ tabo zu mi kaa nɔ nɛ gbo.

¹⁶ Nimli yayamihi ba bɔle mi kɛ kpe kaa gbehi, nɛ a ngɛ ye nine kɛ ye nane tsɔtslɔɔe.

¹⁷ Ye wuhi tsuo pɛpɛɛpɛ je kpo. Nimli yayami ɔmɛ muɔ a hɛngmɛ ngɔ pue ye nɔ, nɛ a ngɛ ye he fɛu yee.

¹⁸ A dla ye tade ɔmɛ ngɔ ha a he, nɛ ye bo ɔ lɛɛ a fɔ nɔ sɔ.

¹⁹ Yawɛ, koo je ye he! Ba esɔ nɛ o ba piɛ ye he, ejakaa mo lɛ o haa mi he wami.

²⁰ Mo je mi kɛ je klaate nya. Mo he ye yi wami kɛ je gbe nɛ ɔmɛ a dɛ mi.

²¹ Mo je mi kɛ je jata nɛ ɔmɛ a nya mi; i be pu mi na ku nɛ ɔmɛ a nya nyɛe ma da.

²² Ma wo o biɛ ta ngɛ ye nyɛmimɛ ɔmɛ a hɛ mi. Nɛ ma je o yi ngɛ a he nya buami he ɔ.

²³ Nyɛ nɛ nyɛ yeɔ Yawɛ gbeye, nyɛ je e yi. Nyɛ Yakob nina tsuo, nyɛɛ wo e hɛ mi nyami. Nyɛ Israel ma, nyɛɛ ye lɛ gbeye.

²⁴ Ejakaa, e kua we nɔ́ nali; e hɛ ji a nɔ hulɔ. Ke a fa kue ha lɛ ɔ, e nuɔ; e laa we mɛ.

²⁵ Ma je o yi ngɛ ma kpekpemi ɔ a hɛ mi. Ma ye ye siwo ɔ nɔ ngɛ ni nɛmɛ nɛ yeɔ mo gbeye ɔ a hɛ mi.

²⁶ Ohiatsɛmɛ maa ye ní nɛ a maa tɔ. Nihi nɛ hlaa Yawɛ se blɔ ɔ ma je e yi; a bua maa jɔ a he kɛ maa ya neneene.

²⁷ Je mahi tsuo ma kai Yawɛ; a maa je he tsuaa he kɛ ba e ngɔ ba ja lɛ.

²⁸ Yawɛ ji matsɛ; lɛ nɛ e yeɔ je ma amɛ a nɔ.

²⁹ He nɔ woli tsuo ma ba kpla si ha lɛ. Niinɛ, nimli adesahi tsuo ma ba kpla si ngɛ e nane nya.

³⁰ Yi nɔhi nɛ maa ba hwɔɔ se ɔ ma sɔmɔ lɛ. Nihi maa sɛɛ Nyɔmtsɛ ɔ he ní kɛ ha hwɔɔ se bimɛ.

³¹ Bimɛ nɛ a na we nɛ a fɔ mɛ lolo po, a maa sɛɛ ha mɛ ke, “Yawɛ he e ma a yi wami.”