La 21 - BAIBLO ALOO NGMAMI KLƆUKLƆU Ɔ

Kunimi yemi sina la

¹ Yawɛ, matsɛ ɔ bua jɔ e he, ejakaa o ha lɛ he wami. Matsɛ ɔ ngɛ nyae, ejakaa o ha nɛ e ye kunimi.

² O ha lɛ nɔ́ nɛ e ngɛ hlae ɔ; nɔ́ nɛ e bi mo ɔ hu, o kua we.

³ O gbaa lɛ kɛ ní kpakpahi babauu; o fi lɛ jlasi nɛ a kɛ sika tsu ngmingmiingmi pee.

⁴ E bi mo ke o ha nɛ e wami se nɛ kɛ, nɛ o kplɛɛ nɔ ha lɛ. O ha lɛ be babauu nitsɛ nɛ nyagbe be he.

⁵ O piɛ e he, nɛ e hɛ mi ba nyami; o ha nɛ e ná biɛ, kɛ agboje.

⁶ Niinɛ, o gbaa lɛ saminya kɛ yaa neneene; o haa nɛ e naa bua jɔmi ngɛ o hɛ mi.

⁷ Matsɛ ɔ ngɔ e hɛ kɛ fɔ mo Yawɛ, Hiɔwe No ɔ, o nɔ. Enɛ ɔ he je ɔ, nɔ́ ko nɔ́ ko be lɛ pee; ejakaa o suɔmi ɔ ngɛ daa.

⁸ Matsɛ, o nine maa su o he nyɛli ɔmɛ tsuo a nɔ. Nihi tsuo nɛ sume mo ɔ, o nine maa su a nɔ.

⁹ Ke o je o he kpo ɔ, a hɛ mi ma kpata kaa nɔ́ nɛ flɔɔnɔɔ kɛ e mi la mi a ngɛ. Mo Yawɛ, o mi mi ma fu mɛ. O maa mii mɛ, nɛ la hu maa sã mɛ.

¹⁰ A bimɛ, loo a nina ko he be mi jee; matsɛ ɔ ma kpata mɛ tsuo a hɛ mi.

¹¹ Ke a so e yi nɔ, aloo a to yi mi yaya ngɔ wo e he po, a nine be e nɔ sue.

¹² E ma ka mɛ kɛ̃ɛ̃ ɔ kaa nɔ́ nɛ e ma tsɛ̃ mɛ, nɛ a maa kpale a se kɛ fo.

¹³ Yawɛ, wa ngɛ o yi jee ngɛ o he wami kpetekpleenyɛ ɔ he. Wa ma la kɛ je o yi, ejakaa o he wa wawɛɛ nitsɛ!