La 18 - BAIBLO ALOO NGMAMI KLƆUKLƆU Ɔ

David manye la

¹ Yawɛ, i suɔ mo! Mo ji ye yi baalɔ.

² Yawɛ ji nɔ nɛ heɔ ye yi wami; ye tɛ sa, kɛ ye mɔ nguaa. Lɛ ji ye Mawu, kɛ ye wesa he. Yawɛ ngɛ kaa tsɛ̃i kɛ ha mi; e buɔ ye he, nɛ e haa nɛ i yeɔ ye he.

³ Ma tsɛ Yawɛ, nɛ e ma je mi kɛ maa je ye he nyɛli a dɛ mi. A je Yawɛ yi!

⁴ Gbenɔ oslaa bɔle mi kɛ kpe; niinɛ, nimli yayamihi babauu bɔle mi kaa pa nɛ hia kɛ bee.

⁵ Gbeje kpa amɛ fi mi, nɛ gbenɔ tsɔ mi klama.

⁶ Ngɛ ye haomi be ɔ mi ɔ, i tsɛ Yawɛ. I tsɛ ye Mawu, nɛ i de lɛ ke e piɛ ye he. E nu ye gbi ngɛ e we klɔuklɔu ɔ, nɛ e bu ye kue fami ɔ tue.

⁷ Kɛkɛ nɛ zugba mimiɛ, nɛ yo ɔmɛ a sisi tomi ɔmɛ hɛ mɛ kɛ je a blɔ hehi, nɛ a mimiɛ, ejakaa Yawɛ mi mi fu.

⁸ La su ku hia kɛ je e gugwɔ puɔhi a mi; la nɛ ngɛ tsoe je e nya mi, nɛ hã nɛ tsɛ̃ je e mi.

⁹ E ha nɛ hiɔwe nya ba si, nɛ e kple si; nɛ diblii kpii ngɛ e nane sisi.

¹⁰ E hi kerub nɔ kɛ te; e he sɔ kɛ nyɛɛ kɔɔhiɔ mi kɛ ba.

¹¹ E ngɔ diblii kɛ ha e he kaa bo, nɛ bɔku kpii kɛ e mi nyu gbagbaagba ha e yi nɔ.

¹² Gbiɛ ngo ngu, kɛ la je oslabai mi ngɛ e hɛ mi kɛ gblee bɔku kpii ɔ mi kɛ be.

¹³ Jehanɛ Yawɛ ha hiɔwe si; Hiɔwe No ɔ wo gbi; gbiɛ ngo ngu nɛ, nɛ oslabai gba.

¹⁴ Ee, e tsɛ̃ e kɛ̃ɛ̃ mi bi ɔmɛ, nɛ e he nyɛli ɔmɛ gbɛ fĩa. E ha nɛ oslabai gba, nɛ a pee basaa.

¹⁵ Yawɛ, benɛ o ké o he nyɛli ɔmɛ a yi, nɛ o kɛ abofu wo gbi ɔ, nyu dɔ ɔmɛ je kpo, nɛ je ɔ sisi tomi ɔmɛ fɔɔ si paa.

¹⁶ Yawɛ sɔ́le e nine kɛ je hiɔwe; e nu mi, nɛ e gbla mi kɛ je nyu babauu ɔ mi.

¹⁷ E kpɔ mi kɛ je ye he nyɛli ɔmɛ a dɛ mi; e je mi kɛ je nihi tsuo nɛ nyɛɛ mi ɔ a dɛ mi. Niinɛ, a he wa pe mi.

¹⁸ A ba tua mi ngɛ ye haomi ligbi ɔ nɔ, se Yawɛ hede ha mi.

¹⁹ E ngɔ mi kɛ ba he nɛ he jɔmi ngɛ. E he ye yi wami, ejakaa e suɔ mi.

²⁰ Yawɛ wo mi hiɔ bɔ nɛ sa, ejakaa i peeɔ nɔ́ nɛ da. Yawɛ gbaa mi, ejakaa ye he tsɔ.

²¹ I ye Yawɛ mlaa amɛ a nɔ, nɛ i pee we yayami ko kɛ puɛ i kɛ ye Mawu ɔ wa kpɛti.

²² I ye e mlaa amɛ tsuo pɛpɛɛpɛ a nɔ; i tɔ̃ we ekoeko.

²³ Yayami ko yayami ko be ye he; i yi fɔ ngɛ nɔ́ ko mi.

²⁴ Enɛ ɔ he je ɔ, Yawɛ gbaa mi; ejakaa ye he tsɔ, nɛ i peeɔ nɔ́ nɛ da.

²⁵ Yawɛ, nihi nɛ yeɔ anɔkuale ɔ, o jeɔ o he si kɛ tsɔɔ mɛ kaa anɔkualetsɛ. Nihi nɛ peeɔ nɔ́ nɛ da a, o jeɔ o he si kɛ tsɔɔ mɛ kaa dalɔ.

²⁶ Nihi nɛ a he tsɔ ɔ, o jeɔ o he si kɛ tsɔɔ mɛ kaa o he tsɔ. Se yiwutsotsɛmɛ lɛɛ o ha we mɛ hɛ mi kulaa.

²⁷ Nihi nɛ baa a he si ɔ, o heɔ a yi wami. Se ni nɛmɛ nɛ woɔ a he nɔ lɛɛ o baa mɛ si.

²⁸ Ejakaa mo Yawɛ, ye Mawu ɔ, mo lɛ o haa mi la. Mo lɛ o fieɔ diblii kɛ jeɔ ye he.

²⁹ Mo Mawu, o he wami nya a, ma nyɛ ma tu gbogbo kɛ ya tua ye he nyɛli, nɛ ma ye a nɔ.

³⁰ Mawu nɛ ɔ loo! E ní peemi níhi hi kɛ pi si. Ke e wo si ɔ, e baa mi. Nihi tsuo nɛ ya saa we ngɛ e ngɔ ɔ, e buu a he.

³¹ Se mɛnɔ ji Mawu ngɛ Yawɛ se? Mɛnɔ ji tɛ sa? Pi wa Mawu ɔ lo?

³² Lɛ ji Mawu nɛ haa mi he wami; lɛ nɛ haa ye blɔ daa mi.

³³ Lɛ nɛ haa nɛ ye nane nya sɔɔ kaa odabɔ nane nya. E ngɔ mi ngɔ to yo ɔmɛ a nɔ ngɛ he jɔmi mi.

³⁴ E tsɔɔ mi ta hwumi níhi a he ní tsumi; akɔblee kɛ̃ɛ̃ po ma nyɛ ma tsɛ̃.

³⁵ Yawɛ, o bu ye he, nɛ o he ye yi wami; o hyɛ ye nɔ saminya, nɛ i pee nɔmlɔ. O pɛtɛ ye he wawɛɛ, nɛ lɔ ɔ ha nɛ i ye ye he.

³⁶ O ha we nɛ ye he nyɛli a nine nɛ su ye nɔ; i nɔɛ si hyɛ gblegbleegble.

³⁷ I nyɛɛ ye he nyɛli ɔmɛ a se kɛ fo kɛ ya si i nuu mɛ. I kpale we ye se kɛ ya si i kpata a hɛ mi.

³⁸ I fia mɛ ní, nɛ a nɔɔ si ngɛ ye nane nya; a be nyɛe maa te si hu.

³⁹ Mo lɛ o ha mi he wami nɛ i kɛ hwu ta; mo lɛ o ha nɛ i ye ye he nyɛli ɔmɛ a nɔ.

⁴⁰ Mo lɛ o ha nɛ ye he nyɛli ɔmɛ tu fo. Nihi nɛ nyɛɔ mi ɔ, mo lɛ o ha nɛ i kpata a hɛ mi.

⁴¹ A kpa ngmlaa kaa nɔ ko ma ba piɛ a he lo, se nɔ ko ji ngmlaa ha mɛ. A tsɛ Yawɛ, se e pui a nya mi.

⁴² I wɛɛ mɛ mɔnyɔmɔnyɔ kaa bunyuku nɛ kɔɔhiɔ sɛ mi. I naa a nɔ kaa blɔ nɔ mɔsɔ.

⁴³ O je mi kɛ je atuã tsɔli a dɛ mi, nɛ o pee mi je ma amɛ a nyatsɛ. Ma nɛ i li mɛ po ma ba sɔmɔ mi.

⁴⁴ Nibwɔhi ma ba kpla si ha mi; ke a nu ye he pɛ a maa bu mi tue.

⁴⁵ Nibwɔ ɔmɛ a tsui maa po, nɛ a kɛ he domi maa je a mɔ nguangua amɛ a mi kɛ ba.

⁴⁶ Yawɛ hɛ ngɛ! A je ye he bulɔ ɔ yi! Mawu ɔ nɛ heɔ ye yi wami ɔ, a wo e hɛ mi nyami.

⁴⁷ Mawu nɛ ɔ lɛ gbla ye he nyɛli ɔmɛ a tue; lɛ nɛ ngɔ je ma amɛ kɛ wo ye sisi,

⁴⁸ nɛ e je mi kɛ je ye he nyɛli ɔmɛ a dɛ mi. Yawɛ, mo lɛ o ha nɛ i ye ye he nyɛli ɔmɛ a nɔ, nɛ o je mi kɛ je yiwutsotsɛmɛ a dɛ mi.

⁴⁹ Enɛ ɔ he je ɔ, ma je o yi ngɛ je ma amɛ a hɛ mi; ma la kɛ je mo, Yawɛ o yi.

⁵⁰ Mawu haa nɛ David yeɔ kunimi daa. Matsɛ ɔ nɛ lɛ, Mawu ɔ pɔ nu ɔ, e naa lɛ mɔbɔ daa; lɛ, kɛ e bimɛ, kɛ e nina tsuo.