La 16 - BAIBLO ALOO NGMAMI KLƆUKLƆU Ɔ

Ngɔɔ o hɛ ngɔ fɔ Mawu nɔ

¹ Mawu, moo bu ye he, ejakaa i ngɔ ye hɛ kɛ fɔ o nɔ.

² I de Yawɛ ke, “Yawɛ, ye Nyɔmtsɛ ji mo; o se ɔ, i pa be nɔ́ kpakpa ko hu.”

³ Hyɛ bɔ nɛ Yawɛ e ni klɔuklɔuhi nɛ ngɛ je ɔ mi ɔ a hɛ mi ngɛ nyami ha! Mɛ ji ni nɛmɛ nɛ i naa a he bua jɔmi.

⁴ Nihi nɛ a he sɔɔ kɛ ya nyɛɛɔ mawu kpahi a se ɔ, a haomi maa hiɛ babauu. I be mɛ futue kɛ pee a tɛlimi kusumi ɔmɛ; i be a biɛ ta woe tete.

⁵ Yawɛ ji ye nɔ́ tsuaa nɔ́; lɛ nɛ e haa mi nɔ́ tsuaa nɔ́ nɛ hia mi. Nɔ́ nɛ maa ba ye nɔ hwɔɔ se hu, Yawɛ dɛ mi lɛ e ngɛ.

⁶ O ke mi ní kpakpahi babauu; niinɛ, i ngɛ weto ní kpakpahi.

⁷ Ma je Yawɛ yi, ejakaa e ha mi juɛmi. Nyɔ mi po, ye he nile kɛ mi tuɔ munyu.

⁸ I susuɔ Yawɛ he daa. Nɛ́ Yawɛ ngɛ ye kasa nya nɛ ɔ, nɔ́ ko nɔ́ ko be mi pee.

⁹ Enɛ ɔ he je ɔ, imi nɔmlɔ ɔ tsuo, i na bua jɔmi, kɛ he jɔmi.

¹⁰ Ejakaa o maa bu ye he, nɛ gbenɔ he wami be ye he blɔ nae. Nɔ nɛ o suɔ lɛ ɔ, o be e he ngmɛɛe nɛ e hɛ mi nɛ kpata.

¹¹ O maa tsɔɔ mi blɔ ɔ nɛ yaa wami mi ɔ. Lejɛ ɔ, ngɛ o hɛ mi ɔ, ma na bua jɔmi nitsɛnitsɛ, bua jɔmi nɛ se be poe kɛ maa ya neneene.