La 147 - BAIBLO ALOO NGMAMI KLƆUKLƆU Ɔ

Nyɛ je Mawu Ope ɔ yi

¹ Nyɛ je Yawɛ yi! E hi kaa a la kɛ je wa Mawu ɔ yi; ejakaa dloolɔ ji lɛ, nɛ e sa kaa a la kɛ je e yi.

² Yawɛ ngɛ Yerusalem sisi toe ekohu; e ngɛ Israel bi ɔmɛ nɛ gbɛ fĩa a a nya buae kɛ ba.

³ Ni nɛmɛ nɛ a tsui ku ɔ, e ngɛ mɛ tsae, nɛ e ngɛ a pa amɛ a nɔ fie.

⁴ E le dodoe ɔmɛ tsuo a yibɔ, nɛ e kɛ a biɛhi tsɛɔ mɛ kakaaka.

⁵ Nyɔmtsɛ ɔ kle; e ngɛ he wami babauu, nɛ e nile hu a li nya.

⁶ Yawɛ piɛɔ nihi nɛ a waa mɛ yi mi a he; se yiwutsotsɛmɛ lɛɛ e sakee mɛ ngɔ fiaa si.

⁷ Nyɛ la sina la ha Yawɛ; nyɛɛ fia saku nɛ nyɛ la kɛ je wa Mawu ɔ yi!

⁸ Lɛ nɛ e ngɔɔ bɔku kɛ haa hiɔwe, nɛ e haa hiɔmi nɛɛ kɛ pueɔ zugba a nɔ, nɛ nga mumu puɛɔ ngɛ yo ɔmɛ a nɔ.

⁹ Lɛ nɛ e haa nga mi lohwehi niye ní, nɛ ke kuakualabite bihi ngɛ pɛe hu, lɛ nɛ e haa mɛ ní.

¹⁰ Okpɔngɔ nɛ he wa tete po e bui; fo tulɔ kpanaa hu pi nɔ́ ko kulaa ngɛ e hɛ mi.

¹¹ Se nihi nɛ yeɔ lɛ gbeye, nɛ ngɔɔ a hɛ kɛ fɔɔ e nɔ kaa e maa na mɛ mɔbɔ daa a, mɛɛ e naa a he bua jɔmi.

¹² Yerusalem, mo je Yawɛ yi! Zion, mo je o Mawu ɔ yi!

¹³ Ejakaa e peeɔ o we agbo ɔmɛ a se lami ní ɔmɛ kpɛii, nɛ e gbaa o bimɛ ɔmɛ.

¹⁴ E haa tue mi jɔmi baa o zugba a nɔ, nɛ niye ní buu tɔ.

¹⁵ Ke e wo gbi ɔ, a nuɔ ngɛ zugba a nɔ, nɛ a yeɔ nɔ nɔuu.

¹⁶ E haa nɛ snoo nɛɔ kaa doti, nɛ e gbɛɔ bɔ́ nɛ fi ɔ kɛ fĩaa kaa la zu.

¹⁷ E haa gbiɛ ngo ngu nɛɔ kaa dongo tɛ. Mɛnɔ ma nyɛ maa da e fĩɛ ɔ nya?

¹⁸ Ke e fa a, gbiɛ ngo ngu ɔmɛ sileɔ; e haa kɔɔhiɔ fiaa, kɛkɛ nyu ɔ bɔni nyɛɛmi.

¹⁹ E wo Israel mlaa, nɛ e tsɔɔ mɛ bɔ nɛ a ja Mawu ha.

²⁰ E pee we kikɛ nɛ ɔ ha we ma ko ma ko hyɛ, nɛ e mlaa amɛ hu, ma kpa ko li. Nyɛ je Yawɛ yi!