La 145 - BAIBLO ALOO NGMAMI KLƆUKLƆU Ɔ

Yi jemi la

¹ Ye Mawu kɛ ye matsɛ, ma wo o hɛ mi nyami, nɛ ma na mo si daa.

² Ma na mo si daa ligbi, nɛ ma je o yi kɛ maa ya neneene.

³ Yawɛ kle, nɛ e sa kaa a je e yi wawɛɛ nitsɛ. E kle pe bɔ nɛ adesa juɛmi ma nyɛ maa su he.

⁴ Yi nɔ kake ma je níhi nɛ o tsu ɔ a yi kɛ tsɔɔ yi nɔ nɛ nyɛɛ se ɔ; nɛ he wami níhi nɛ o tsu ɔ, a maa sɛɛ kɛ ha mɛ.

⁵ O hɛ mi nyami, o we agboje, kɛ nyakpɛ níhi nɛ o tsu ɔ, ma susu a he saminya.

⁶ Nihi maa fiɛ nyakpɛ ní, kɛ ní nguanguahi nɛ o pee ɔ, nɛ imi hu ma fiɛ ke o kle niinɛ.

⁷ A ma de ke o mi mi hi saminya. A ma la boboobo ke daa nɛ ɔ, nɔ́ nɛ da pɛ o peeɔ.

⁸ Dloolɔ kɛ mɔbɔ nalɔ ji Yawɛ; e mi mi fu we mla, nɛ e suɔmi hiɛ babauu.

⁹ Yawɛ peeɔ nɔ tsuaa nɔ kpakpa, nɛ e nuɔ nɔ́ he ha níhi tsuo nɛ e bɔ ɔ.

¹⁰ Yawɛ, níhi nɛ o pee ɔ tsuo maa na mo si, nɛ o ni klɔuklɔu ɔmɛ ma je o yi!

¹¹ A maa sɛɛ o matsɛ yemi ɔ hɛ mi nyami ɔ he ní, nɛ a ma de ke o kle saminya.

¹² Kɛkɛ ɔ, nihi tsuo maa le ní nguanguahi nɛ o pee, kɛ o matsɛ yemi ɔ we agboje.

¹³ O matsɛ yemi ɔ ngɛ daa, nɛ o nɔ yemi ɔ ngɛ kɛ yaa neneene. Yawɛ yeɔ e siwo nɔ pɛpɛɛpɛ, nɛ nɔ́ tsuaa nɔ́ nɛ e peeɔ ɔ hi saminya.

¹⁴ Nihi nɛ ngɛ haomi mi ɔ, e piɛɔ a he, nɛ nihi nɛ nɔ si ɔ, e woɔ a nɔ kɛ daa si ekohu.

¹⁵ Bɔ níhi tsuo nɛ wami ngɛ a mi ɔ, mo pɛ nɛ a ngɛ blɔ hyɛe; ejakaa mo lɛ o haa mɛ a niye ní ngɛ be nɛ sa mi.

¹⁶ O bliɔ o dɛ mi, nɛ o haa nɔ́ tsuaa nɔ́ nɛ ngɛ hɛ ngmengmle tɔɔ.

¹⁷ Nɔ́ tsuaa nɔ́ nɛ Yawɛ peeɔ ɔ da; e naa mɔbɔ be tsuaa be.

¹⁸ Nɔ tsuaa nɔ nɛ tsɛɔ Yawɛ ngɛ anɔkuale mi ɔ, Yawɛ hɛɛ lɛ kɛ suu e he.

¹⁹ Nihi nɛ yee lɛ gbeye ɔ, e peeɔ a hiami ní kɛ haa mɛ. E buu a kue fami ɔmɛ hu tue, nɛ e heɔ a yi wami.

²⁰ Nihi tsuo nɛ suɔ Yawɛ ɔ, e baa a yi; se yiwutsotsɛmɛ lɛɛ e ma kpata a hɛ mi.

²¹ Ma je Yawɛ yi, nɛ ma ha nimli adesahi tsuo ma je e yi kɛ maa ya neneene.