La 144 - BAIBLO ALOO NGMAMI KLƆUKLƆU Ɔ

Matsɛ ko ye kunimi nɛ e na Mawu si

¹ Nyɛ je Yawɛ yi, lɛ ji ye yi baalɔ. E tsɔɔ mi bɔ nɛ a gbaa ta, kɛ bɔ nɛ a miaa kɛ hwuu ta.

² Lɛ ji ye yi baalɔ, ye wesa he nitsɛnitsɛ, kɛ ye kpɔlɔ; lɛ ji ye tsɛ̃i, nɛ e ngɔ i ya saa we ngɛ. Lɛ ji nɔ nɛ baa ma a si kɛ woɔ ye sisi.

³ Yawɛ, mɛnɔ kulaa ji nɔmlɔ nɛ o peeɔ e he akɔtaa, loo nɔmlɔ adesa nɛ o susuɔ e he ɔ?

⁴ Nɔmlɔ adesa ngɛ kaa mumu nɛ a woɔ ɔ; e ligbi ɔmɛ ngɛ kaa hɔ̃ nɛ bee kɛ yaa.

⁵ Yawɛ, ha nɛ hiɔwe ɔ nɛ ba si, nɛ o kple si kɛ ba. Moo ta yo ɔmɛ a he, konɛ a je la su ku.

⁶ Ha nɛ oslabai nɛ gba, nɛ o gbɛ o he nyɛli ɔmɛ ngɔ fĩa; tsɛ̃ o kɛ̃ɛ̃ mi bi ɔmɛ, nɛ o wo mɛ fo.

⁷ Kpa o nine mi kɛ je hiɔwe, nɛ o sá mi; jé mi kɛ je nyu babauu ɔ mi; jé mi kɛ je nibwɔhi a dɛ mi;

⁸ a nya mi munyu ɔ, lakpa sɔuu, nɛ a yeɔ lakpa kɛ kaa kita po.

⁹ Mawu, ma la la he ha mo, ma fia kpa saku nɛ hɛɛ kpa nyɔngma kɛ je o yi.

¹⁰ Mo lɛ o haa matsɛmɛ yeɔ kunimi, nɛ o heɔ o tsɔlɔ David yi wami.

¹¹ He mi kɛ je klaate nɛ yeɔ awi ɔ nya, mo kpɔ mi kɛ je nibwɔhi a dɛ mi, nihi nɛ a nya mi munyu ɔ, lakpa sɔuu, nɛ kita po a yeɔ lakpa kɛ kaa a.

¹² Ha nɛ wa binyumuhi nɛ ngɛ nihe mi ɔ, a he nɛ wa kaa tso nɛ maa si saminya. Ha nɛ wa biyihi nɛ a pee kaa tɛ titima kɛ ha matsɛ mɔ fiami.

¹³ Wa blɛfo gba amɛ nɛ a hyi tɔ kɛ ngma, nɛ a na niye ní slɔɔtoslɔɔtohi ngɛ lejɛ ɔ; wa to ɔmɛ hu nɛ a fɔ babauu akpeakpe abɔ ngɛ kɔpe ɔmɛ a mi.

¹⁴ Wa na amɛ hu nɛ a fɔ babauu ja nɔuu; a mi ko sane; nɛ a ko nu bubuubui ko ngɛ wa gbɛjegbɛ ɔmɛ a nɔ.

¹⁵ Nihi nɛ a gbaa kikɛ nɛ ɔ, a bua maa jɔ. Nihi nɛ Yawɛ ji a Mawu ɔ, a bua maa jɔ.