La 143 - BAIBLO ALOO NGMAMI KLƆUKLƆU Ɔ

Kue fami kɛ ha yemi kɛ buami

¹ Yawɛ bu ye kue fami ɔ tue; mo ta tue ha pɛɛ nɛ i ngɛ mo kpae ɔ. Akɛnɛ o yeɔ anɔkuale, nɛ o peeɔ nɔ́ nɛ da a, bu mi tue nɛ o he nɔ ha mi koo!

² O kɛ imi, o tsɔlɔ ɔ kó ye sane; ejakaa nɔmlɔ adesa ko adesa ko be nguɔ yee ngɛ o hɛ mi.

³ Ye he nyɛlɔ ɔ nyɛɛ ye se nɛ e ma kpata ye hɛ mi. E fia mi nɔ́ wawɛɛ, nɛ e tsɛ̃ ye yi se ngɔ wo diblii kpii mi; i pee kaa nɔ ko nɛ gbo momoomo.

⁴ Ye mumu nya ta jehanɛ, nɛ peepee ta ye he!

⁵ I kaii sa blema a, nɛ i susuɔ níhi tsuo nɛ o tsu ɔ a he; i susuɔ níhi nɛ o pee ɔ a he.

⁶ I woɔ ye nine nɔ kɛ yaa hiɔwe kɛ faa kue. Bɔ nɛ zugba gbigbli hlaa nyu kɛ jɔɔ e he ɔ, ja o he kuma ngɛ mi yee.

⁷ Yawɛ, he mi nɔ esɔ koo! Ye hɛ kɛ nɔ fɔmi tsuo miɔ nɛ e ta. Koo ngɔ o he kɛ laa mi; ke pi ja a, i kɛ gbogboe ɔmɛ ngɛ gbeje maa sɔ.

⁸ Mɔtu ɔ, ha ma kai bɔ nɛ o mi mi hi ha; ejakaa o nɔ i ngɔɔ ye hɛ kɛ fɔɔ. Ha nɛ ma le he nɛ ma gu; ejakaa mo pɛ o nɔ i ngɔ ye hɛ kɛ fɔ.

⁹ Yawɛ, jé mi kɛ je ye he nyɛli ɔmɛ a dɛ mi. O ngɔ i ba sa we ngɛ.

¹⁰ Moo tsɔɔ mi nɛ ma pee nɔ́ nɛ o suɔ; ejakaa mo ji ye Mawu. Ha nɛ o mumi kpakpa a nɛ tsɔɔ mi blɔ nɛ hi, nɛ e nɔ jɔ.

¹¹ Yawɛ, mo he ye yi wami kaa bɔ nɛ o wo si ɔ. O peeɔ nɔ́ nɛ da, lɔ ɔ he ɔ, mo je mi kɛ je haomi mi.

¹² O suɔmi nɛ be nyagbe ɔ he je ɔ, moo gbe ye he nyɛli ɔmɛ; nɛ ni nɛmɛ nɛ ngɛ mi haoe ɔ, mo kpata a hɛ mi pɛsɛpɛsɛ; ejakaa o tsɔlɔ ji mi.