La 141 - BAIBLO ALOO NGMAMI KLƆUKLƆU ƆKue nɛ a faa gbɔkuɛ 1 Yawɛ, mo i ngɛ tsɛe; o he nɛ sɔ ha mi; mo i ngɛ tsɛe boboobo ɔ nɛ, bu mi tue koo! 2 Ha nɛ ye kue fami ɔ nɛ je via kaa tsopa kɛ e he via ngɛ o hɛ mi; nɛ ye nine nɛ i wo nɔ kɛ ya hiɔwe ɔ, e pee kaa bɔ nɛ i ngɛ sãe gbɔkuɛ nya si ha mo. 3 Yawɛ, moo to bulɔ nɛ hyɛ ye nya nɔ, konɛ e hyɛ ye munyu tumi nɔ. 4 Piɛ ye he, konɛ ma ko na yayami peemi he bua jɔmi; piɛ ye he, konɛ i kɛ yayami peeli ko bɔ; nɛ ko ha ma ya ye a niye ní ngɔngɔɛ ɔ eko. 5 Ha nɛ dalɔ nɛ gba mi ma, nɛ e ngɔ e mi mi himi ɔ kɛ ka ye hɛ mi; se ko ha nɛ yayami peeli nɛ a je ye yi; ejakaa be tsuaa be ɔ, i faa kue kɛ siɔ a yayami ɔmɛ. 6 Ke a ngɔ a matsɛmɛ ɔmɛ kɛ wo nihi nɛ ma kpata a hɛ mi a dɛ mi ɔ, ma a ma na maa le kaa Yawɛ munyu ɔ, anɔkuale sisiisi. 7 Ke a ngɛ tɛ sa gbae ɔ, bɔ nɛ tɛ ɔ gbɛɛ kɛ fĩaa zugba a tsuo nɔ ɔ, ja a ma sake a wuhi kɛ pue gbeje agbo ɔ nya. 8 Se mo Yawɛ ye Nyɔmtsɛ i ngɛ hyɛe; mo ji ye wesa he; koo ngmɛɛ ye he kulaa kɛ fɔ si; bu ye he. 9 Je mi kɛ je klama nɛ he nyɛli tsɔ mi ɔ mi. Je mi kɛ je yayami peeli a klama mi. 10 Ha nɛ yiwutsotsɛmɛ tsuo nɛ a ya nɔ mɛ nitsɛmɛ a klamahi a mi, se imi lɛɛ ha ma je a mi slɔkee. |
Bible in Dangme © Bible Society of Ghana, 2018.
Bible Society of Ghana