La 140 - BAIBLO ALOO NGMAMI KLƆUKLƆU Ɔ

Kue fami kɛ ha yi baami

¹ Yawɛ, mo he ye yi wami; jé mi kɛ je yiwutsotsɛmɛ a dɛ mi.

² Mɛɛ lɛɛ yayami he pɛ a susuɔ. Daa nɛ ɔ, pɛ kɛkɛ a ngɛ woe.

³ A lilɛ ngɛ kaa sinɔ duɔtsɛ nɔ́. A munyu ngɛ kaa sanga duɔ.

⁴ Yawɛ, bu ye he; jé mi kɛ je yiwutsotsɛmɛ a dɛ mi; ejakaa a to a yi mi kaa a maa tsɛ̃ mi kɛ fia si.

⁵ He nɔ woli tsɔ klamahi ngɛ blɔ ɔmɛ a tue. A tsɔ mi klama, konɛ a du mi.

⁶ I deɔ Yawɛ ke, “Mo ji ye Mawu!” Yawɛ, moo bu ye kue fami ɔ tue!

⁷ Ye Nyɔmtsɛ Yawɛ, ye yi wami helɔ kpanaa, ta be mi ɔ, mo nɔuu lɛ o baa ye yi.

⁸ Yawɛ, koo ngmɛ yayami peeli blɔ nɛ a pee nɔ́ nɛ a suɔ; ko ha nɛ a yi mi tomi yaya amɛ nɛ ba mi.

⁹ Nihi nɛ bɔle mi kɛ kpe ɔ ngɛ ye he gbeye woe. Ha nɛ ga yaya nɛ a ngɛ toe ngɛ ye he ɔ nɛ kpata mɛ nitsɛmɛ a hɛ mi.

¹⁰ Ha nɛ la ngu hɛuu ba pue a nɔ! A ya nɔ muɔ mi nɛ a ko nyɛ kpo nɛ a je gblegbleegble.

¹¹ Ko ha lakpatsɛmɛ nɛ gbeɔ nɔ he guɛ nɛ a plɔke ngɛ zugba a nɔ. Ha nɛ yayami peeli a hɛ mi nɛ kpata amlɔ nɔuu.

¹² Yawɛ, i le kaa nihi nɛ a ní ngɛ mɔbɔ ɔ, mo lɛ o hyɛɛ a nɔ, nɛ o yeɔ ohiatsɛmɛ a sane ha mɛ.

¹³ Niinɛ, nihi nɛ peeɔ nɔ́ nɛ da a maa na mo si; kpakpa peeli kɛ mo maa hi si daa.