La 139 - BAIBLO ALOO NGMAMI KLƆUKLƆU Ɔ

Mawu le nɔ tsuaa nɔ, nɛ e baa wa yi

¹ Yawɛ, o hyɛ ye mi tsuo, nɛ o le bɔ nɛ i ngɛ.

² Ye si himi, kɛ ye si temi tsuo o le, ye yi mi tomi tsuo pɛpɛɛpɛ, o le momo.

³ Ke i ma blɔ ɔ, o le nɛ ke i hwɔ si hu o le; ee, ye ní peemi níhi tsuo o le.

⁴ Loko ma pa ye nya mi ke ma de nɔ́ ko ɔ, mo Yawɛ, o le lɛ tsuo momo.

⁵ O ngɔ o he wami kɛ bɔle mi kɛ kpe, nɛ o buɔ ye he.

⁶ Bɔ nɛ o le mi fitsofitso ɔ ngɛ nyakpɛ tsɔ. Nile nɛ ɔ mi kuɔ pe bɔ nɛ ma nyɛ ma nu sisi.

⁷ Jije ma je o mumi ɔ hɛ mi kɛ maa ya? Jije ma ya laa ye he ngɛ nɛ o be mi nae?

⁸ Ke i kuɔ kɛ ya hiɔwe ɔ, ne mo ngɛ lejɛ ɔ; nɛ ke i ya hwɔ si ngɛ gbeje hu ne mo ngɛ lejɛ ɔ.

⁹ Waa ngɔ lɛ kaa lohwe pɛlitsɛ ji mi, nɛ i te papaapa kɛ je beleku je kɛ ya ma bonyoku je se lokoo;

¹⁰ lejɛ ɔ tete po mo lɛ o maa tsɔɔ mi blɔ, nɛ o hiɔ nine maa su ye nɔ.

¹¹ Ke i de ke diblii ba ha ye nɔ, loo pu la nɛ bɔle mi ɔ nɛ plɛ pee diblii ɔ,

¹² lɔ ɔ lɛɛ yaka gu, ejakaa diblii pee we diblii ha mo, nɛ nyɔ mi tsɔɔ heii kaa piani nɔuu; diblii jio, la jio, lɛ tsuo kake ha mo.

¹³ Ye nɔmlɔ tso ɔ mi níhi tsuo ɔ, mo lɛ o pee. O puɛ mi ngɛ ye nyɛ muklii mi tɔɔ.

¹⁴ I ngɛ o yi jee, ejakaa bɔ nɛ o plɛ kɛ bɔ mi ɔ, e ngɛ gbeye, nɛ e ngɛ nyakpɛ hulɔ. Níhi nɛ o pee ɔ ngɛ nyakpɛ loo! O le mi fitsofitso.

¹⁵ Benɛ a ngɛ mi puɛe ngɛ laami mi, nɛ wu ɔmɛ ngɛ wae ngɛ ye nyɛ muklii mi tɔɔ ɔ, i fɔɔ si paa ngɛ o hɛ mi.

¹⁶ Benɛ a na we nɛ a fɔ mi lolo po ɔ, a ngma ye wami be ɔ tsuo ngɛ o womi ɔ mi momo.

¹⁷ Mawu, yi mi tomi nɛ o ngɛ ha mi ɔ he jua wa wawɛɛ nitsɛ. Ní kpakpahi nɛ o susuɔ ha mi ɔ, a he hiɛ babauu.

¹⁸ Ke i ke ma kane mɛ ɔ, i be nyɛe, ejakaa a he hiɛ babauu pe zia. Loko ye hɛ maa tsɛ po o ngɛ ye he susue momo.

¹⁹ Mawu, i na nɛ o gbe yiwusotsɛmɛ, konɛ ma ye ye he kɛ je muɔ si pueli nɛ ɔmɛ a dɛ mi.

²⁰ Nimli nɛ ɔmɛ tuɔ musu bɔmi munyu, nɛ a teɔ si kɛ woɔ mo.

²¹ Nihi nɛ bui mo ɔ, anɛ imi lɛɛ i buɔ mɛ lo? Nihi nɛ tsɔɔ o hɛ mi atuã a, anɛ i suɔ mɛ lo?

²² Dɛbi, i sume mɛ saasaa; i buɔ mɛ ye he nyɛli.

²³ Mawu, hyɛ ye tsui mi nɛ o le mi. Kaa mi nɛ o hyɛ, nɛ o na níhi nɛ ngɛ ye juɛmi mi.

²⁴ Hyɛ kaa yayami ko pa ngɛ ye mi lo, nɛ o ngɔ mi kɛ fɔ blɔ nɛ kɛ nɔ yaa neneene wami mi ɔ nɔ.