La 135 - BAIBLO ALOO NGMAMI KLƆUKLƆU Ɔ

Yi jemi la

¹ Nyɛ je Yawɛ yi! Nyɛ je Yawɛ biɛ ɔ yi! Nyɛ Yawɛ tsɔli tsuo, nyɛ je e yi!

² Nyɛ nihi nɛ nyɛ daa si ngɛ Yawɛ we ɔ, ngɛ wa Mawu ɔ he klɔuklɔu ɔ, nyɛ je e yi!

³ Nyɛ je Yawɛ yi, ejakaa Yawɛ hi; nyɛ la kɛ je e biɛ ɔ yi, ejakaa e mi mi hi.

⁴ Yawɛ nitsɛ lɛ hla Yakob kɛ ha e he; e hla Israel kɛ pee e ma.

⁵ Imi lɛɛ i le kaa Yawɛ kle; Yawɛ kle pe mawu ɔmɛ tsuo kulaa.

⁶ Hiɔwe ɔ jio, zugba a nɔ jio, wo ɔ mi jio, muɔ voovoo ɔmɛ a mi jio, nɔ́ tsuaa nɔ́ nɛ́ Yawɛ suɔ ɔ, lɔ ɔ e peeɔ.

⁷ Lɛ nɛ e haa bɔku teɔ si ngɛ je ɔ nyagbe he; e pee oslabai kɛ ha hiɔmi, nɛ e jeɔ kɔɔhiɔ kpo kɛ jee e to he ɔmɛ.

⁸ Lɛ nɛ e gbe kekleekle bimɛ tsuo ngɛ Egipt, nimli adesahi a bimɛ, kɛ lohwehi a bimɛ.

⁹ Lɛ nɛ tsu nyakpɛ ní nguanguahi kɛ gbla Egipt matsɛ ɔ, kɛ e tsɔli ɔmɛ a tue.

¹⁰ Lɛ nɛ kpata je mahi babauu a hɛ mi, nɛ e gbe matsɛmɛ nguangua nɛ ɔmɛ:

¹¹ Sihon, Amor bi a matsɛ ɔ, Og, Bashan matsɛ ɔ, kɛ Kanaan matsɛmɛ ɔmɛ tsuo;

¹² nɛ e ngɔ a zugba a kɛ ha e ma, Israel kaa a weto ní.

¹³ Yawɛ, o biɛ ngɛ kɛ yaa neneene; Yawɛ, yi nɔhi tsuo ma kai mo.

¹⁴ Yawɛ ma fa e ma a he; e maa na e tsɔli ɔmɛ mɔbɔ.

¹⁵ Je ma amɛ a we amaga amɛ ɔ, sika hiɔ kɛ sika tsu sɔuu, nimli adesahi a nine nya ní tsumi ji mɛ.

¹⁶ A ngɛ nya, se a tu we munyu; a ngɛ hɛngmɛ, se a hyɛ we nɔ́.

¹⁷ A ngɛ tue, se a nui nɔ́; mumi ko hu be a gugwɔ mi nɛ a woɔ.

¹⁸ I ná nɛ nihi nɛ pee mɛ, kɛ nihi nɛ ngɔ a hɛ kɛ fɔ a nɔ ɔ tsuo pee kaa amaga amɛ nɛ a pee ɔ nɔuu!

¹⁹ Nyɛ Israel ma, nyɛ je Yawɛ yi! Nyɛ Mawu we osɔfohi, nyɛ je Yawɛ yi!

²⁰ Nyɛ Levi bi, nyɛ je e yi; nyɛ nihi tsuo nɛ nyɛ yee Yawɛ gbeye, nyɛ je e yi!

²¹ Nyɛ je Yawɛ yi ngɛ Zion; nyɛ je e yi ngɛ e we ɔ mi ngɛ Yerusalem. Nyɛ je Yawɛ yi!