La 132 - BAIBLO ALOO NGMAMI KLƆUKLƆU Ɔ

Yawɛ we ɔ yi jemi la

¹ Yawɛ, mo kai amanehlu tsuo nɛ David na a.

² E ka mo Yawɛ kita, nɛ e wo mo Yakob Mawu Ope ɔ si ke,

³ “I be ye we mi yae, nɛ i ya be si hwɔe hulɔ.

⁴ I be ye hɛ se jee, nɛ i be kɔnɔɛ tete dee

⁵ kɛ yaa si be nɛ ma na he ko ha mo Yawɛ, Yakob Mawu Ope ɔ, konɛ lejɛ ɔ nɛ pee o hi he!”

⁶ Wa nu somi daka a he ngɛ Betlehem, nɛ wa ya na ngɛ Yearim ngmɔ ɔmɛ a mi.

⁷ Wa de ke, “Nyɛ ha waa ya Yawɛ we ɔ nɛ wa ya kpla si ngɛ e matsɛ sɛ ɔ hɛ mi!”

⁸ Yawɛ, mo wo o he nɔ, nɛ o ba o he jɔɔmi he ɔ; ngɔɔ somi daka a nɛ ji o he wami okadi ɔ hu kɛ ba.

⁹ Ha nɛ o we osɔfo ɔmɛ nɛ a pee nɔ́ nɛ da be tsuaa be, nɛ o ni klɔuklɔu ɔmɛ nɛ a hwɔ lele!

¹⁰ Yawɛ, mo nitsɛ lɛ o wo o tsɔlɔ David si, nɛ o wo lɛ matsɛ, lɔ ɔ he ɔ, ko kua lɛ.

¹¹ Yawɛ, kita nɛ o ka David nɛ o be o nya se kpalee ji, “Ma wo o bimɛ ɔmɛ a ti nɔ kake matsɛ, nɛ e maa ye tsɛ ngɛ o se.

¹² Ke o bimɛ ɔmɛ maa ye ye somi ɔ nɔ, nɛ ye mlaa amɛ nɛ ma wo mɛ ɔ hu a maa ye a nɔ ɔ, lɛɛ a bimɛ hu ma ba hi o sɛ ɔ nɔ kɛ maa ya neneene.”

¹³ Yawɛ nitsɛ lɛ suɔ nɛ e hla Zion kaa lejɛ ɔ nɛ e maa hi.

¹⁴ E de ke, “Hiɛmɛ nɛ ɔ ma hi kɛ maa ya neneene; hiɛmɛ nɛ ɔ ma jɔɔ ye he ngɛ; ejakaa i suɔ hiɛmɛ nɛ ɔ.

¹⁵ Ma ha Zion ma na niye ní babauu, ma a mi ohiatsɛmɛ ɔmɛ maa ye ní maa tɔ.

¹⁶ Ma gbaa osɔfo ɔmɛ a ní tsumi nɔ, nɛ ma a mi bi ɔmɛ ma hwɔ lele!

¹⁷ Ma pee David nina kake matsɛ agbo ngɛ hiɛmɛ nɛ ɔ; ma to lɛ si kaa nɔ nɛ imi nitsɛ i hla, nɛ i wo lɛ matsɛ.

¹⁸ Ma ha zo maa gbe e he nyɛli ɔmɛ kpɔtɔɔ, se e tsɛ yemi ɔ maa bɔ, nɛ e ma he biɛ saminya.”