La 129 - BAIBLO ALOO NGMAMI KLƆUKLƆU Ɔ

A fa kue kɛ si Israel he nyɛli

¹ Israel, jehanɛ de, “Kɛ je ye jokuɛwi a si tɔɔ ɔ, ye he nyɛli wa mi yi mi wawɛɛ nitsɛ!”

² “Kɛ je ye jokuɛwi a si tɔɔ ɔ, ye he nyɛli wa mi yi mi wawɛɛ nitsɛ, se kɛ̃ ɔ, a nyɛ we mi.

³ A plaa ye se mi wawɛɛ, ye se mi pee kaa ngmɔ nɛ a kɛ kpakplaa hu.

⁴ Yawɛ lɛɛ nɔ́ nɛ da lɛ e peeɔ; e je mi kɛ je yiwutsotsɛmɛ a dɛ mi.”

⁵ Nihi tsuo nɛ sume Zion ɔ, zo nɛ gbe mɛ nɛ a kpale a se!

⁶ A pee kaa nga nɛ ngɛ puɛe ngɛ tsu yi mi; benɛ e na we nɛ e wa, kɛkɛ e gbli momo.

⁷ Nga nɛ ɔ, nɔ ko fa we, nɛ a fi we nɛ a tloo kɛ je.

⁸ Nihi nɛ bee ɔ kó de ke, “Yawɛ nɛ gbaa nyɛ! Wa ngɛ nyɛ gbaae ngɛ Yawɛ biɛ mi!”