La 12 - BAIBLO ALOO NGMAMI KLƆUKLƆU Ɔ

Kue fami kɛ ha yemi kɛ buami

¹ Yawɛ, moo piɛ wa he, ejakaa nɔmlɔ kpakpa be hu; anɔkualetsɛmɛ ta zugba a nɔ.

² Nɔ tsuaa nɔ ngɛ e nyɛmi lakpa yee. Nɔ tsuaa nɔ kɛ munyu ngɔngɔɛ ngɛ e nyɛmi sisie.

³ Yawɛ, nihi nɛ tuɔ munyu dɔkɔdɔkɔ, kɛ ni nɛmɛ nɛ fĩaa a, mo kpata mɛ tsuo a hɛ mi.

⁴ A deɔ ke, “Wa ngɔɔ wa nya mi munyu kɛ naa nɔ́ tsuaa nɔ́ nɛ wa ngɛ hlae. Nɔ́ tsuaa nɔ́ nɛ wa suɔ kaa wa ma de ɔ, wa ma de. Mɛnɔ ma nyɛ maa tsi wa nya?”

⁵ Se Yawɛ ke, “Akɛnɛ a ngɛ ohiatsɛmɛ yi mi wae, nɛ dɛgutsɛmɛ ngɛ kɛmɛe he je ɔ, jehanɛ lɛɛ ma te si, nɛ ma ha mɛ he jɔmi nɛ a ngɛ hlae ɔ.”

⁶ Yawɛ siwo ɔmɛ ɔ, anɔkuale sɔuu. A ngɛ kaa sika hiɔ nɛ a tsu he si kpaago ngɛ flɔɔnɔɔ mi.

^7-8 Nimli yayamihi ngɛ he tsuaa he, nɛ nɔ tsuaa nɔ ngɛ nɔ́ yayami yi jee. Yawɛ, wa kpa mo pɛɛ! Mo je wɔ ngɛ kikɛmɛ a nimli a dɛ mi. Nɛ o bu wa he kɛ je yi nɔ nɛ ɔ kɛ ya neneene.