La 119 - BAIBLO ALOO NGMAMI KLƆUKLƆU Ɔ

Yawɛ mlaa a

¹ A gbaa ni nɛmɛ nɛ piami ko be a he ngɛ a si himi mi, nihi nɛ baa a je mi ngɛ Yawɛ mlaa a nya.

² A gbaa nihi nɛ yeɔ e mlaa amɛ a nɔ, ni nɛmɛ nɛ kɛ a tsui tsuo hlaa e se blɔ,

³ nihi nɛ pee we nɔ́ nɛ dɛ, se mohu a baa a je mi kaa bɔ nɛ Yawɛ suɔ ɔ.

⁴ Yawɛ, o wo o mlaa amɛ, konɛ a ye nɔ sisiisi.

⁵ I na nɛ i nyɛ ye o mlaa amɛ a nɔ sisiisi.

⁶ Ke i hyɛ saminya, nɛ i ye o mlaa amɛ tsuo a nɔ ɔ, lɛɛ zo be mi gbee.

⁷ Ke i kase o mlaa kpakpa nɛ ɔmɛ ɔ, ma je o yi kɛ tsui nɛ mi tsɔ.

⁸ Ma ye o mlaa amɛ a nɔ; ko kua mi pɛsɛpɛsɛ!

Ye Yawɛ mlaa a nɔ

⁹ Ke niheyo ngɛ hlae nɛ e ba e je mi bɔ nɛ sa a, kɛ e maa pee kɛɛ? Bɔ nɛ e maa pee ji e maa ye o mlaa amɛ a nɔ.

¹⁰ I suɔ kaa ma nyɛɛ o se kɛ ye tsui tsuo, ko ha nɛ ma je o mlaa amɛ a he.

¹¹ I ngɔ o munyu ɔ kɛ to ye tsui mi tɔɔ, konɛ ma ko pee yayami kɛ si mo.

¹² Yawɛ, ma je o yi; tsɔɔ mi o mlaa amɛ.

¹³ Mlaahi tsuo nɛ je o nya a, imi hu ma fiɛ.

¹⁴ Ye bua jɔɔ o mlaa amɛ a he pe ní nami babauu.

¹⁵ Ma susu o mlaa amɛ a he, nɛ o blɔ ɔmɛ maa hi ye hɛ mi daa.

¹⁶ Ye bua jɔɔ o mlaa amɛ a he; ye hɛ be o munyu ɔmɛ a nɔ jee.

Yawɛ mlaa a haa nɔ bua jɔmi

¹⁷ O tsɔlɔ ji mi, naa mi mɔbɔ; ha nɛ ye yi nɛ na wami, konɛ ma ye o mlaa a nɔ.

¹⁸ Bli ye hɛngmɛ, konɛ ma na nyakpɛ níhi nɛ ngɛ o mlaa a mi.

¹⁹ Nubwɔ ji mi ngɛ je ɔ mi; koo ngɔ o mlaa a kɛ laa mi.

²⁰ Daa nɛ ɔ, i ngɛ ye tsui yee kaa ma le o mlaa amɛ.

²¹ O kaa he woli a hɛ mi; á gbiɛ nihi nɛ tlaa blɔ kɛ jee o mlaa amɛ a he.

²² Mo je mi kɛ je a we ahlua bɔmi, kɛ he guɛ gbemi mi; ejakaa i ye o mlaa amɛ a nɔ.

²³ Ke ganɔhi ya kpe nɛ a ngɛ ye yi nɔ soe tete po, imi, o tsɔlɔ lɛɛ o mlaa amɛ a he pɛ ma susu.

²⁴ O mlaa amɛ jɔɔ ye bua; mɛ nɔuu ji ye ga woli.

Yé Yawɛ mlaa a nɔ

²⁵ I tlɔ zugba mɔbɔmɔbɔ; ha nɛ ma na he wami ekohu kaa bɔ nɛ o wo si ɔ.

²⁶ I jaje níhi nɛ i pee ɔ tsuo kɛ tsɔɔ mo, nɛ o he mi nɔ; tsɔɔ mi o mlaa amɛ.

²⁷ Ha nɛ ma nu o mlaa amɛ a sisi, konɛ ma susu nyakpɛ níhi nɛ o pee ɔ a he.

²⁸ Kɔmɔ yemi sɔuu ha nɛ i pee vii. Wó mi he wami ekohu kaa bɔ nɛ o wo si ɔ.

²⁹ Je mi kɛ je yayami peemi mi. Naa mi mɔbɔ, konɛ o tsɔɔ mi o mlaa a.

³⁰ I pee ye yi mi ke anɔkuale pɛ ma ye; i ngɔ o mlaa amɛ kɛ to ye hɛ mi.

³¹ Yawɛ, i pɛtɛ o mlaa amɛ a he wawɛɛ; ko ha zo nɛ gbe mi.

³² Ma ye o mlaa amɛ a nɔ kɛ gɛjɛmi; ejakaa o ha nɛ i nu mlaa amɛ a sisi saminya.

Ha nɛ ma nu mlaa a sisi

³³ Yawɛ, tsɔɔ mi o mlaa amɛ a sisi, konɛ ma ye a nɔ sisiisi.

³⁴ Ha nɛ ma nu mlaa a sisi, konɛ ma ye nɔ kɛ ye tsui tsuo.

³⁵ Ha nɛ ma ye mlaa a nɔ; ejakaa e haa mi bua jɔmi.

³⁶ Ha nɛ ma suɔ o mlaa amɛ mohu pe kaa ma na ní kpɔtɔɔ.

³⁷ Níhi nɛ a he be se nami ɔ, ko ha ma hyɛ. Mo ha ye yi nɛ na wami kaa bɔ nɛ o wo si ɔ.

³⁸ Si nɛ o wo nihi nɛ buɔ mo tue ɔ, ha nɛ e ba mi ha imi, o tsɔlɔ ɔ hulɔ.

³⁹ Ahlua nɛ i ngɛ gbeye yee kaa a maa bɔ mi ɔ, ha nɛ e tsɔ ye he kɛ ho, ejakaa o mlaa amɛ hi.

⁴⁰ Hyɛ kaa i suɔ o mlaa amɛ; ha mi wami he, ejakaa o peeɔ nɔ nɛ da.

Ngɔɔ hɛ kɛ fɔ Yawɛ mlaa a nɔ

⁴¹ Yawɛ, je o we anɔkuale suɔmi nɛ ngɛ daa a kpo kɛ tsɔɔ mi, nɛ o he ye yi wami kaa bɔ nɛ o wo si ɔ.

⁴² Kɛkɛ ɔ, ma na heto ma ha ni nɛmɛ nɛ ngɛ mi ahlua bɔe ɔ, ejakaa i ngɔ ye hɛ kɛ fɔ o munyu ɔ nɔ.

⁴³ Ha nɛ ma nyɛ ma tu anɔkuale be tsuaa be; ejakaa i ngɔ ye hɛ kɛ fɔ o mlaa amɛ a nɔ.

⁴⁴ Ma ye o mlaa a nɔ daa; ma ye nɔ kɛ maa ya neneene;

⁴⁵ nɛ ma hi si ngɛ he jɔmi mi; ejakaa o mlaa nɔ i hlaa kaa ma ye.

⁴⁶ Matsɛmɛ a hɛ mi tete po ma fiɛ o mlaa a, nɛ e be mi zo pee.

⁴⁷ I naa o mlaa amɛ a he bua jɔmi, ejakaa i suɔ o mlaa amɛ.

⁴⁸ I buu o mlaa amɛ, nɛ i suɔ mɛ hulɔ; o mlaa amɛ a he ma susu.

Ngɔɔ hɛ kɛ fɔ Yawɛ mlaa a nɔ

⁴⁹ Mo kai si nɛ o wo imi, o tsɔlɔ ɔ; ejakaa i ngɔ ye hɛ kɛ fɔ nɔ.

⁵⁰ Benɛ i ngɛ nɔ nae pohu ye bua jɔ, ejakaa o wo mi si ke o ma he ye yi wami.

⁵¹ Nihi nɛ woɔ a he nɔ ye ye he fɛu hluu, se kɛ̃ ɔ, i ngmɛɛ we o mlaa a he.

⁵² Yawɛ, nyakpɛ níhi nɛ o tsu blema lokoo ɔ, ke i susu a he ɔ, ye bua jɔɔ saminya.

⁵³ Se ke i na yiwutsotsɛmɛ nɛ a ngɛ o mlaa a tɔ̃e ɔ, ye mi mi woɔ la wawɛɛ nitsɛ.

⁵⁴ O mlaa amɛ plɛ pee lahi nɛ i laa ngɛ ye wami be kpiti nɛ ɔ mi ngɛ je ɔ mi.

⁵⁵ I kaiɔ mo Yawɛ nyɔ mi, nɛ i susuɔ o mlaa a he.

⁵⁶ I ye o mlaa amɛ a nɔ, nɛ o gbaa mi.

Pɛtɛ Yawɛ mlaa a he saminya

⁵⁷ Yawɛ, mo pɛ i suɔ; i ngɛ si woe ke ma ye o mlaa amɛ a nɔ.

⁵⁸ I ngɛ mo pɛɛ kpae kɛ ye tsui tsuo ke o na mi mɔbɔ kaa bɔ nɛ o wo si ɔ.

⁵⁹ I susu ye je mi bami he, nɛ i ngɛ si woe ke ma ye o mlaa amɛ a nɔ.

⁶⁰ I ngɛ esɔ hee nɛ ma ye o mlaa amɛ a nɔ; tsle tomi be mi ha mi.

⁶¹ Yiwutsotsɛmɛ tsɔ mi klamahi lɛɛ, se ye hɛ ji o mlaa a nɔ.

⁶² Nyɔ mi kpɛti i teɔ si nɛ i naa mo si, ejakaa o mlaa amɛ da saminya.

⁶³ O tsɔli ɔmɛ nɛ sɔmɔɔ mo, kɛ nihi nɛ yeɔ o mlaa amɛ a nɔ ɔ, ye huɛmɛ ji mɛ tsuo.

⁶⁴ Yawɛ, o suɔmi nɛ ngɛ daa a hyi je ɔ tɔ; moo tsɔɔ mi o mlaa amɛ.

Yawɛ mlaa he jua wa

⁶⁵ Yawɛ, o ye o siwo ɔ nɔ, o kɛ imi, o tsɔlɔ ɔ ye saminya.

⁶⁶ Ha mi juɛmi, kɛ nile; ejakaa i he o mlaa a ye.

⁶⁷ Loko o gbla ye tue ɔ, i pɔɔ blɔ tlami, se jehanɛ lɛɛ i yeɔ o munyu ɔ nɔ.

⁶⁸ O hi, nɛ o peeɔ kpakpa saminya! Moo tsɔɔ mi o mlaa amɛ.

⁶⁹ Nihi nɛ woɔ a he nɔ ɔ tuɔ lakpa munyuhi kɛ siɔ mi; se imi lɛɛ i kɛ ye tsui tsuo yeɔ o mlaa amɛ a nɔ.

⁷⁰ Mɛɛ lɛɛ a nui nɔ́ ko nɔ́ ko sisi, se imi lɛɛ i naa o mlaa a he bua jɔmi.

⁷¹ E hi ha mi kaa o gbla ye tue, konɛ ma kase o mlaa amɛ.

⁷² O mlaa a nɛ o ha mi ɔ hi ha mi pe je nɛ ɔ mi sika tsu, kɛ sika hiɔ babauu.

Yawɛ mlaa a da

⁷³ Mo nitsɛ lɛ o bɔ mi, nɛ o baa ye yi. Ha mi juɛmi nɛ kɔɔ nɔ́ se, konɛ ma kase o mlaa amɛ.

⁷⁴ Nihi nɛ yee mo gbeye ɔ maa na mi, nɛ a bua maa jɔ a he; ejakaa i ngɔ ye hɛ kɛ fɔ o munyu ɔ nɔ.

⁷⁵ Yawɛ, i le kaa o ye dami sane, nɛ o gbla ye tue bɔ nɛ sa mi, ejakaa moo lɛɛ anɔkuale pɛ o yeɔ.

⁷⁶ Ha nɛ o suɔmi nɛ ngɛ daa a nɛ jɔɔ ye bua kaa bɔ nɛ o wo imi, o tsɔlɔ ɔ si ɔ.

⁷⁷ Naa mi mɔbɔ, konɛ ye yi nɛ na wami, ejakaa ye bua jɔɔ o mlaa a he.

⁷⁸ Nihi nɛ woɔ a he nɔ ɔ, ha zo nɛ gbe mɛ; ejakaa a po ye nya yaka gu; se imi lɛɛ o mlaa amɛ a he pɛ ma susu.

⁷⁹ Ha nɛ nihi tsuo nɛ suɔ mo nɛ ɔ a ba ye ngɔ, konɛ a ba kase o mlaa amɛ.

⁸⁰ Ha nɛ ma ye o mlaa amɛ a nɔ sisiisi, konɛ zo ko gbe mi!

Ba kpɔ mi

⁸¹ Yawɛ, i hyɛ mo blɔ hluu kaa o ma ba kpɔ mi, nɛ pɔ tɔ mi jehanɛ; se i ngɔ ye hɛ kɛ fɔ o siwo ɔ nɔ.

⁸² Ye hɛngmɛ tlɔ blɔ; i hyɛ blɔ hluu kaa o maa ye o siwo ɔ nɔ lo. Lɔ ɔ he ɔ, i ngɛ bie ke, “Mɛni be po nɛ o ma ha ye bua maa jɔ?”

⁸³ Ejakaa ye he be se nami hu kaa wai tɔ nɛ a je se; se kɛ̃ ɔ, ye hɛ ji o mlaa amɛ a nɔ.

⁸⁴ Mɛni be o tsɔlɔ ɔ ma pa to e tsui si kɛ ya su? Nihi nɛ ngɛ mi yi mi wae ɔ, mɛni be po o maa gbla a tue ha mi?

⁸⁵ Nihi nɛ woɔ a he nɔ tsua muɔhi kɛ tsɔ mi klama, konɛ a nine nɛ su ye nɔ.

⁸⁶ A ngɛ lakpa toe kɛ ngɛ mi yi mi wae gu. Se o mlaa amɛ maa si kpɛii, lɔ ɔ he ɔ, ba he mi!

⁸⁷ E piɛ nguɛ nya nɛ a ko gbe nya ha mi ngɛ je ɔ mi; se kɛ ɔ, i kua we o mlaa amɛ.

⁸⁸ O naa mɔbɔ; he ye yi wami, konɛ ma ye o mlaa amɛ a nɔ.

Wo hɛ kɛ fɔ Yawɛ mlaa a nɔ

⁸⁹ Yawɛ, o munyu ɔ maa hi si daa; e ngɛ kɛ yaa neneene ngɛ hiɔwe lokoo.

⁹⁰ O we anɔkuale yemi maa gblee yi nɔhi tsuo a mi. Mo lɛ o ngɔ zugba a kɛ ma si nɛ e maa si kpɛii nɛ ɔ nɛ.

⁹¹ Níhi tsuo ngɛ kaa bɔ nɛ o fa mɛ ɔ kɛ ba su mwɔnɛ ɔ, ejakaa o tsɔli ji mɛ tsuo.

⁹² Ke pi o mlaa a nɛ haa mi bua jɔmi ɔ, jinɛ ye hɛ mi kpata momo ngɛ ye amanehlu ɔ mi.

⁹³ Ye hɛ be o mlaa amɛ a nɔ jee gblegbleegble, ejakaa a nɔ o gu kɛ he ye yi wami.

⁹⁴ O nɔ́ ji mi, he ye yi wami; ejakaa i bɔ mɔde kaa ma ye o mlaa amɛ a nɔ.

⁹⁵ Yiwutsosɛmɛ woɔ mi ka nɛ a kpata ye hɛ mi; se imi lɛɛ o mlaa amɛ a he mohu i susuɔ.

⁹⁶ I na le kaa sé ngɛ nɔ́ tsuaa nɔ́ he, se o mlaa a lɛɛ tɔmi ko kulaa be he.

I suɔ Yawɛ mlaa a

⁹⁷ I suɔ o mlaa a kaa nɔ́ ko! Ke je na kikɛ nɛ ɔ, e he pɛ i susuɔ.

⁹⁸ I le ní pe ye he nyɛli tsuo, ejakaa o mlaa a kɛ mi ngɛ daa.

⁹⁹ I nuɔ nɔ́ sisi pe ye tsɔɔli ɔmɛ tsuo, ejakaa o mlaa amɛ a he i susuɔ.

¹⁰⁰ I kɔɔ munyu se pe nikɔtɔmahi po; ejakaa i yeɔ o mlaa amɛ a nɔ.

¹⁰¹ I kpa je mi bami yayami ɔmɛ tsuo; ejakaa i suɔ kaa ma ye o mlaa amɛ a nɔ.

¹⁰² I ji o munyu ɔmɛ a he; ejakaa mo lɛ o tsɔɔ mi ní.

¹⁰³ O mlaa a ngɔɔ loo! E ngɔɔ pe hwo tete po.

¹⁰⁴ O mlaa a jeɔ nile ha mi, lɔ ɔ he ɔ, i hiee je mi bami yaya.

Yawɛ mlaa a ji la

¹⁰⁵ O munyu ɔ ji kane nɛ i kɛ hyɛɔ ye nane nya; o munyu ɔ ji la nɛ haa ye blɔ mi tɛ̃ɔ.

¹⁰⁶ O mlaa amɛ da saminya, lɔ ɔ he ɔ, imi hu i ngɛ mo si woe veveeve ke ma ye a nɔ sisiisi.

¹⁰⁷ Yawɛ, mo he ye yi wami kaa bɔ nɛ o wo si ɔ, se ye we amanehlu ɔ nya wa nitsɛnitsɛ.

¹⁰⁸ Yawɛ, mo he ye bɔ nɛ i kɛ ngɛ mo si nae ɔ, nɛ o tsɔɔ mi o mlaa amɛ.

¹⁰⁹ I dla ye he kɛ to ha gbenɔ be tsuaa be, se kɛ̃ ɔ, i je we ye hɛ kɛ ji o mlaa a he.

¹¹⁰ Yiwutsotsɛmɛ tsɔɔ mi klama mohu, se i tɔ̃ we o mlaa amɛ a nɔ.

¹¹¹ O mlaa amɛ ji ye weto ní kɛ yaa neneene. O mlaa amɛ haa ye tsui nɔɔ ye mi fuaa.

¹¹² I to ye yi mi kaa ma ye o mlaa amɛ a nɔ daa; ma ye a nɔ kɛ yaa si ye gbenɔ ligbi.

Yawɛ mlaa a baa nɔ yi

¹¹³ Nihi nɛ suɔ mo fa kɛ fa a, i sume mɛ; i suɔ o mlaa amɛ mohu.

¹¹⁴ Mo ji ye he bulɔ, kɛ ye yi baalɔ; i ngɔ ye hɛ kɛ fɔ o siwo ɔ nɔ.

¹¹⁵ Nyɛ yayami peeli, nyɛɛ je ye nɔ kɛ ya se! Ye Mawu ɔ mlaa amɛ a nɔ ma ye.

¹¹⁶ Wo mi he wami kaa bɔ nɛ o wo mi si ɔ; ha nɛ ye yi nɛ na wami. I ngɔ ye hɛ kɛ fɔ o nɔ kulaa; koo gbe mi zo.

¹¹⁷ Pɛtɛ ye he, konɛ ye yi nɛ na wami, nɛ ye hɛ maa hi o mlaa amɛ a nɔ daa.

¹¹⁸ Nihi tsuo nɛ yi o mlaa amɛ a nɔ ɔ, niinɛ, o bui a he akɔtaa; ga yayahi nɛ a kɛ sisiɔ nɔ ɔ peeɔ yaka.

¹¹⁹ Yiwutsotsɛmɛ tsuo nɛ ngɛ je mi ɔ, o buu mɛ kaa kuku nɔ dade. Lɔ ɔ he ɔ, o mlaa amɛ pɛ lɛ i suɔ.

¹²⁰ O he sawale nu mi, nɛ ye he ngɛ doe blibliibli; ejakaa o kojomi ɔmɛ ngɛ gbeye.

Bu Yawɛ mlaa a tue

¹²¹ Nɔ́ nɛ da, kɛ nɔ́ nɛ sa lɛ i peeɔ, lɔ ɔ he ɔ, koo ngmɛɛ ye he ha nihi nɛ ngɛ mi yi mi wae ɔ.

¹²² Moo da mi ha o tsɔlɔ ɔ, nɛ e hi ha lɛ. Ko ha nɛ he nɔ woli nɛ wa mi yi mi.

¹²³ I hyɛ blɔ hluu kaa o ma ba he ye yi wami, kaa o maa ye o siwo ɔ nɔ; se jehanɛ ye hɛ se gbo.

¹²⁴ Mo nɛ o suɔmi be nyagbe, naa imi, o tsɔlɔ ɔ mɔbɔ, nɛ o tsɔɔ mi o mlaa amɛ.

¹²⁵ O tsɔlɔ ji mi, ha mi nile, konɛ ma nu o mlaa amɛ a sisi.

¹²⁶ Yawɛ, nihi ngɛ o mlaa a tɔ̃e; be su nɛ o maa pee he nɔ́ ko.

¹²⁷ Imi lɛɛ i suɔ o mlaa amɛ pe sika tsu, ee, pe sika tsu ngmingmiingmi.

¹²⁸ Lɔ ɔ he ɔ, i buɔ o mlaa amɛ tsuo, se blɔhi nɛ dɛ ɔ lɛɛ i sume.

Ye Yawɛ mlaa a nɔ

¹²⁹ O mlaa amɛ ngɛ nyakpɛ; lɔ ɔ he ɔ, i yeɔ a nɔ kɛ ye tsui tsuo.

¹³⁰ Ke a tsɔɔ o mlaa a sisi ɔ, e ngɛ kaa la, nɛ e haa kuasia po leɔ ní.

¹³¹ I paa ye nya mi hatoo kaa nɔ nɛ nɔ́ ko ngɛ lɛ jloe kɛ hyɛɛ o mlaa amɛ blɔ.

¹³² Mo plɛ nɛ o hyɛ mi nɛ o na mi mɔbɔ kaa bɔ nɛ o peeɔ kɛ haa nihi tsuo nɛ suɔ mo ɔ.

¹³³ Moo ye o siwo ɔ nɔ; ko ha nɛ ma nɔ si; ko ha nɛ yayami nɛ ye ye nɔ.

¹³⁴ Mo kpɔ mi kɛ je nihi nɛ waa mi yi mi ɔ a dɛ mi, konɛ ma ye o mlaa a nɔ.

¹³⁵ Mo je o he si, nɛ o na imi, o tsɔlɔ ɔ mɔbɔ, nɛ o tsɔɔ mi o mlaa amɛ.

¹³⁶ Ye hɛngmɛ tslaa nyu babaaba kaa pa nɛ ngɛ bee, ejakaa nimli adesahi yi o mlaa amɛ a nɔ.

Yawɛ mlaa a da

¹³⁷ Yawɛ, dalɔ ji mo, nɛ o mlaa amɛ hu da pɛpɛɛpɛ!

¹³⁸ Mlaa amɛ nɛ o wo ɔ, a da, anɔkuale sɔuu.

¹³⁹ Ye mi mi ngɛ mi sããe kaa la, ejakaa ye he nyɛli ɔmɛ bui o mlaa amɛ.

¹⁴⁰ Ke o wo si ɔ, o yeɔ nɔ sisiisi; lɔ ɔ he ɔ, imi, o tsɔlɔ ɔ, i suɔ o siwo ɔ tsɔ!

¹⁴¹ Imi lɛɛ nɔ wayoo nɛ a bui ha nɔ́ ko nɔ́ ko ji mi, se ye hɛ ji o mlaa amɛ a nɔ.

¹⁴² Dalɔ ji mo, nɛ ja o ngɛ kɛ yaa neneene; o mlaa a, anɔkuale sɔuu.

¹⁴³ Ke i ngɛ haomi mi, nɛ i ngɛ kɔmɔ yee ɔ, o mlaa amɛ lɛɛ a haa nɛ ye bua jɔɔ saminya.

¹⁴⁴ O mlaa amɛ da kɛ yaa neneene. Ha mi juɛmi nɛ kɔɔ nɔ́ se, bɔ nɛ pee nɛ ye yi nɛ na wami.

Ba he ye yi wami

¹⁴⁵ I ngɛ ngmlaa kpae kɛ ngɛ mo tsɛe kɛ ye tsui tsuo. Yawɛ, mo ha nɛ ma ye o mlaa amɛ a nɔ.

¹⁴⁶ Mo i ngɛ tsɛe ɔ nɛ; mo he ye yi wami, nɛ ma ye o mlaa amɛ a nɔ.

¹⁴⁷ I teɔ si makɛ mla, nɛ i kpaa ngmlaa kɛ tsɛɔ mo ke o ba piɛ ye he. I ngɔ ye hɛ kɛ fɔ o siwo ɔ nɔ.

¹⁴⁸ Nyɔ mi tsuo i hwɔ we mahe; o siwo ɔ he i hii susue.

¹⁴⁹ Bu ye gbi tue koo; ejakaa o suɔmi ɔ be nyagbe. Yawɛ, moo lɛɛ nɔ́ nɛ da pɛ o peeɔ; naa mi mɔbɔ, nɛ o baa ye yi.

¹⁵⁰ Nihi nɛ ngɛ mi yi mi wae nɛ bui o mlaa a, a ngɛ hɛe kɛ ngɛ ye he sue.

¹⁵¹ Se Yawɛ, o ngɛ ye kasa nya haa, nɛ o mlaa amɛ tsuo maa si kpɛii.

¹⁵² I le kɛ je blema lokoo kaa o wo mlaa amɛ nɛ a hi si kɛ ya neneene.

Ba piɛ ye he

¹⁵³ Hyɛ amanehlu nɛ i ngɛ nae nɛ ɔ, nɛ o ba je mi kɛ je mi, ejakaa ye hɛ ji o mlaa a nɔ.

¹⁵⁴ Ba ye ye sane ɔ ha mi, nɛ o kpɔ mi. He ye yi wami kaa bɔ nɛ o wo si ɔ.

¹⁵⁵ A be yiwutsotsɛmɛ a yi wami hee; ejakaa a bui o mlaa amɛ.

¹⁵⁶ Se Yawɛ, mo nɛ o naa mɔbɔ babauu, nɛ o peeɔ nɔ́ nɛ da; mo he ye yi wami.

¹⁵⁷ Nihi nɛ waa mi yi mi, kɛ ye he nyɛli ɔmɛ a he hiɛ babauu, se kɛ̃ ɔ, ye hɛ ji o mlaa a nɔ.

¹⁵⁸ Ke i na nihi nɛ yi mo anɔkuale kikɛ nɛ ɔ, a he peeɔ mi tãi; ejakaa a yi o mlaa amɛ a nɔ.

¹⁵⁹ Yawɛ, i suɔ o mlaa amɛ kaa nɔ́ ko! O suɔmi nɛ ngɛ daa a he ɔ, mo he ye yi wami.

¹⁶⁰ O munyu ɔ tsuo, anɔkuale sisiisi; o mlaa amɛ da, nɛ eko tsuaa eko maa si kpɛii kɛ yaa neneene.

I suɔ Yawɛ mlaa a kɛ ye tsui tsuo

¹⁶¹ Ganɔhi waa mi yi mi yaka, se kɛ̃ ɔ, i buɔ o mlaa amɛ.

¹⁶² O munyu ɔ ngɔɔ ye nya. Ye bua jɔɔ kaa nɔ ko nɛ e nine ya su ta yibu ní nɛ he jua wa nɔ.

¹⁶³ I sume lakpa kulaa, i hiee lɛ; se o mlaa lɛɛ i suɔ.

¹⁶⁴ I jeɔ o yi si kpaago daa ligbi, ejakaa o mlaa amɛ da.

¹⁶⁵ Nihi nɛ suɔ o mlaa amɛ ɔ, a naa he jɔmi nitsɛnitsɛ, nɛ nɔ́ ko nɔ́ ko be hae nɛ a maa tla blɔ.

¹⁶⁶ Yawɛ, mo o nɔ ye hɛ ngɛ, ba he ye yi wami; i peeɔ níhi nɛ o mlaa a tsɔɔ ɔ.

¹⁶⁷ I yeɔ o mlaa amɛ a nɔ pɛpɛɛpɛ; i suɔ o mlaa amɛ kɛ ye tsui tsuo.

¹⁶⁸ I yeɔ o mlaa amɛ, kɛ blɔ nya tomi ɔmɛ tsuo a nɔ; o le ye yami kɛ bami mi fitsofitso.

Ba piɛ ye he

¹⁶⁹ Yawɛ, ngmlaa nɛ i ngɛ kpae kɛ ngɛ mo tsɛe ɔ, bu tue koo! Ha nɛ ma nu nɔ́ sisi kaa bɔ nɛ o wo si ɔ!

¹⁷⁰ Moo bu ye kue fami ɔ tue nɛ o ba kpɔ mi kaa bɔ nɛ o wo si ɔ!

¹⁷¹ Ma je o yi daa; ejakaa o tsɔɔ mi o mlaa amɛ.

¹⁷² Ma la o mlaa a he la; ejakaa o mlaa amɛ tsuo da saminya.

¹⁷³ Pee klaalo nɛ o ba piɛ ye he; ejakaa i yeɔ o mlaa amɛ a nɔ.

¹⁷⁴ Yawɛ, i ngɛ mo blɔ hyɛe; ba he ye yi wami koo! O mlaa a pɛ lɛ haa ye bua jɔɔ ye he.

¹⁷⁵ Ha nɛ ye yi nɛ na wami, konɛ ma je o yi; ha nɛ o mlaa amɛ nɛ a tsɔɔ mi blɔ.

¹⁷⁶ I ngɛ lalaalo woe kaa to nɛ laa; mo hla imi, o tsɔlɔ ɔ koo! Ejakaa i je we ye hɛ ngɛ o mlaa amɛ a nɔ.