La 118 - BAIBLO ALOO NGMAMI KLƆUKLƆU Ɔ

Kunimi yemi he sina

¹ Nyɛɛ na Yawɛ si; ejakaa e hi, nɛ e suɔmi ɔ ngɛ kɛ yaa neneene.

² Israel ma a nɛ de ke, “E suɔmi ɔ ngɛ kɛ yaa neneene.”

³ Israel osɔfo ɔmɛ nɛ a de ke, “E suɔmi ɔ ngɛ kɛ yaa neneene.”

⁴ Nihi nɛ yeɔ Yawɛ gbeye ɔ, a de ke, “E suɔmi ɔ ngɛ kɛ yaa neneene.”

⁵ Benɛ i ngɛ amanehlu mi ɔ, i tsɛ Yawɛ; Yawɛ he mi nɔ, nɛ e je mi.

⁶ Nɛ Yawɛ kɛ mi ngɛ nɛ ɔ, i yi gbeye; mɛni adesa ma nyɛ maa pee mi.

⁷ Yawɛ kɛ mi ngɛ. Lɛ nɔuu lɛ e maa piɛ ye he. Nihi nɛ sume mi ɔ, ye hɛngmɛ kɛkɛ ma kɛ na kaa i ye a nɔ kunimi momo.

⁸ E hi kaa o sa we ngɛ Yawɛ ngɔ, pe nɔ́ nɛ o maa ngɔ o hɛ kɛ fɔ nɔmlɔ nɔ.

⁹ E hi kaa o sa we ngɛ Yawɛ ngɔ, pe nɔ́ nɛ o maa ngɔ o hɛ kɛ fɔ ganɔhi a nɔ.

¹⁰ He nyɛli babauu ba bɔle mi kɛ kpe; se ngɛ Yawɛ he wami nya a, i kpata a hɛ mi!

¹¹ A bɔle mi kɛ kpe; a sa ye yi, se ngɛ Yawɛ he wami nya a, i kpata a hɛ mi!

¹² A buble mi kaa hwo; se a ngla kaa mio tso mi la. Yawɛ he wami nya a, i kpata a hɛ mi!

¹³ A ba tua mi kɛ hɛdɔ, nɛ a miɔ nɛ a maa ye ye nɔ, se Yawɛ piɛ ye he.

¹⁴ Yawɛ lɛ woɔ mi he wami; ma la kɛ je e yi, ejakaa e he ye yi wami.

¹⁵ Nyɛɛ bu tue, kunimi la ngɛ pɛe ngɛ dali ɔmɛ a bo tsu ɔmɛ a mi ke, “Yawɛ kɛ e he wami kpetekpleenyɛ ɔ tsu ní nguanguahi!

¹⁶ Yawɛ nine ho hiɔwe ya; Yawɛ kɛ e hɛ mi nyami kpetekpleenyɛ ɔ tsu ní nguanguahi!”

¹⁷ I be gboe, se mohu ma hi je mi, nɛ ma jaje níhi nɛ Yawɛ pee ɔ kɛ tsɔɔ.

¹⁸ Yawɛ gbla ye tue wawɛɛ mohu, se e ha we nɛ ma gbo.

¹⁹ Nyɛ bli Yawɛ we ɔ agbo ɔmɛ ha mi; ma sɛ mi nɛ ma ya na Yawɛ si!

²⁰ Yawɛ we agbo ɔ ji nɛ ɔ nɛ; nihi nɛ peeɔ nɔ́ nɛ da a, mɛ pɛ nɛ a maa sɛ mi.

²¹ Yawɛ, o nɔ́ ji sina; ejakaa o bu mi tue, nɛ o he ye yi wami.

²² Tɛ ɔ nɛ tsu fiali ɔmɛ sake fɔ he ɔ, lɔ ɔ nɔuu ba pee kɔ nya tɛ.

²³ Yawɛ dɛ mi enɛ ɔ je; hyɛ bɔ nɛ e ngɛ nyakpɛ ha!

²⁴ Yawɛ kunimi yemi ligbi ji mwɔnɛ ɔ; nyɛ ha nɛ wa nya, nɛ wa na bua jɔmi.

²⁵ Yawɛ, wa kpa mo pɛɛ, he wa yi wami koo! Yawɛ, wa kpa mo pɛɛ, ha nɛ waa ye kunimi koo!

²⁶ A gbaa nɔ nɛ ma ngɛ Yawɛ biɛ mi ɔ! Wa ngɛ mo gbae kɛ je Yawɛ we ɔ.

²⁷ Yawɛ ji Mawu; e ha wɔ la. Nyɛɛ hɛɛ tã kuɔmi ngɛ nyɛ dɛ, nɛ nyɛɛ bɔ sala kɛ ya bɔle bɔ sami la tɛ ɔ koli ɔmɛ.

²⁸ Mo ji ye Mawu; ma na mo si. Mo ji ye Mawu; ma wo o hɛ mi nyami.

²⁹ Nyɛɛ na Yawɛ si; ejakaa e mi mi hi, nɛ e suɔmi ɔ ngɛ daa.