La 116 - BAIBLO ALOO NGMAMI KLƆUKLƆU Ɔ

Nɔ ko nɛ a he e yi wami je Yawɛ yi

¹ I suɔ Yawɛ, ejakaa e nuɔ ye kue fami ɔ, nɛ e buɔ mi tue.

² Akɛnɛ e buɔ mi tue he je ɔ, ma tsɛ lɛ ye wami be tsuo.

³ Gbenɔ klama amɛ bɔle mi kɛ kpe, gbeje nɔ́ nami ɔmɛ wo ye he gbeye; ye ní pee mɔbɔ, nɛ i hao wawɛɛ.

⁴ Kɛkɛ nɛ i kpa ngmlaa kɛ tsɛ Yawɛ ke, “Yawɛ, i kpa mo pɛɛ, he ye yi wami!”

⁵ Dloolɔ, kɛ dalɔ ji Yawɛ; ee, wa Mawu ɔ, mɔbɔ nalɔ ji lɛ.

⁶ Nihi nɛ peepee ta a he ɔ, Yawɛ baa a yi; benɛ i gbɔjɔ ɔ, lɛ nɛ e he ye yi wami.

⁷ Ye nɔ gbagba maa te, nɛ ye bua maa jɔ ekohu; ejakaa Yawɛ dloo mi babauu.

⁸ Gbenɔ mi nitsɛ nɛ Yawɛ je mi kɛ je; ye hɛngmɛhi loloo we kɛ vo nyu hu, nɛ ye nanehi tɛ we si hu.

⁹ Lɔ ɔ he ɔ, ma ba ye je mi bɔ nɛ sa ngɛ Yawɛ hɛ mi, ngɛ hɛ kali a zugba a nɔ.

¹⁰ Benɛ i de ke, “Ye hɛ mi miɔ nɛ e kpata pɛsɛpɛsɛ” ɔ, jamɛ a be ɔ mi po, i hɛɛ ye hemi kɛ yemi ɔ mi.

¹¹ Benɛ ye tsui po hu i de ke, “E sɛ kaa a ngɔɔ hɛ kɛ fɔɔ nɔmlɔ adesa ko kulaa nɔ.”

¹² Mɛni ma kɛ na Yawɛ si ngɛ kpakpa tsuo nɛ e pee mi ɔ he?

¹³ Ma ngɔ wai kɛ sã bɔ kɛ na Yawɛ si; ejakaa e he ye yi wami.

¹⁴ Ma ye ye siwo nɔ ha Yawɛ ngɛ ma kpekpemi ɔ tsuo hɛ mi.

¹⁵ Yawɛ ni klɔuklɔu ɔmɛ a gbenɔ dɔɔ lɛ wawɛɛ.

¹⁶ Yawɛ, o tsɔlɔ ji mi; mo lɛ i sɔmɔɔ kaa bɔ nɛ ye nyɛ pee ɔ pɛ. O je mi kɛ je gbenɔ mi.

¹⁷ Ma sã bɔ kɛ na mo si; mo Yawɛ ma fa kue ha.

^18-19 Ma ye ye siwo ɔ nɔ ha mo ngɛ mo Yawɛ, o we klɔuklɔu ɔ ngɛ Yerusalem, ngɛ ma kpekpemi ɔ tsuo a hɛ mi. A je Yawɛ yi!