La 115 - BAIBLO ALOO NGMAMI KLƆUKLƆU Ɔ

Anɔkuale Mawu kake too ɔ

¹ Yawɛ, pi wɔ oo, pi wɔ, se mo nɛ o sa hɛ mi nyami; ejakaa o suɔmi ngɛ daa, nɛ o we anɔkuale yemi hu be nyagbe.

² Mɛni he je je ma amɛ ma bi ke, “Jije a Mawu ɔ ngɛ” ɔ?

³ Wa Mawu ɔ, hiɔwe e ngɛ; nɔ́ tsuaa nɔ́ nɛ e suɔ ɔ, lɔ ɔ e peeɔ.

⁴ Se ni ɔmɛ a we amaga amɛ lɛɛ sika hiɔ, kɛ sika tsu ji mɛ, níhi nɛ nimli adesahi ngɔ a nine kɛ pee kɛkɛ.

⁵ A ngɛ nya, se a tu we munyu; a ngɛ hɛngmɛ, se a hyɛ we nɔ́.

⁶ A ngɛ tue, se a nui nɔ́; a ngɛ gugwɔ, se a fu we nɔ́.

⁷ A ngɛ nine, se a pɛtɛ we nɔ́ he; a ngɛ nane, se a nyɛɛ we; a kuɛ si po a kpɛ we.

⁸ Nihi nɛ pee mɛ ɔ ngɛ kaa amaga amɛ nɔuu. Ni nɛmɛ nɛ ngɔɔ a hɛ kɛ fɔɔ a nɔ ɔ, jã kɛ̃ a ngɛ.

⁹ Israel ma, nyɛɛ ngɔ nyɛ hɛ kɛ fɔ Yawɛ nɔ. Lɛ ji nyɛ he piɛlɔ, kɛ nyɛ yi baalɔ.

¹⁰ Aaron nina, nyɛɛ ngɔ nyɛ hɛ kɛ fɔ Yawɛ nɔ. Lɛ ji nyɛ he piɛlɔ, kɛ nyɛ yi baalɔ.

¹¹ Nyɛ nihi nɛ nyɛ yeɔ Yawɛ gbeye, nyɛɛ ngɔ nyɛ hɛ kɛ fɔ Yawɛ nɔ. Lɛ ji nyɛ he piɛlɔ, kɛ nyɛ yi baalɔ.

¹² Yawɛ hɛ ngɛ wa nɔ, nɛ e maa gbaa wɔ; ee, e maa gbaa Israel ma a; e maa gbaa Israel osɔfo ɔmɛ a nina a.

¹³ E maa gbaa nihi tsuo nɛ yeɔ lɛ Yawɛ ɔ gbeye, ni wawihi kɛ ni nguahi tsuo.

¹⁴ Yawɛ nɛ ha nyɛɛ bɔ saminya, nyɛɛ kɛ nyɛ bimɛ tsuo.

¹⁵ Yawɛ nɛ bɔ hiɔwe kɛ zugba a, é gbaa nyɛ.

¹⁶ Hiɔwe ɔ tsuo e nɔ́, se zugba a lɛɛ e ngɔ kɛ ha nimli adesahi.

¹⁷ Ni gbogboehi je we Yawɛ yi; nɔ ko je we Yawɛ yi ngɛ gbeje.

¹⁸ Se wɔɔ lɛɛ wa ma je Yawɛ yi kɛ je be nɛ ɔ mi kɛ ya neneene. A je Yawɛ yi!