La 109 - BAIBLO ALOO NGMAMI KLƆUKLƆU Ɔ

Nɔ ko nɛ ngɛ haomi mi e kue fami

¹ Mawu, i ngɛ o yi jee; koo pee dii.

² Yiwutsotsɛmɛ, kɛ lakpatsɛmɛ te si kɛ wo mi; lakpa munyu sɔuu a ngɛ tue ngɛ ye he.

³ A te si kɛ wo mi, nɛ a ngɛ nɔ́ yayami dee ngɛ ye he kɛkɛ.

⁴ I suɔ mɛ, nɛ i faa kue kɛ haa mɛ, se mɛɛ lɛɛ a poɔ ye nya yaka gu.

⁵ A ngɔɔ yayami kɛ toɔ kpakpa nɛ i peeɔ mɛ ɔ nane mi. A nyɛɛ mi ngɛ suɔmi nɛ i suɔ mɛ ɔ nane mi.

⁶ A deɔ ke, ha nɛ yiwutsotsɛ ko kɛ lɛ nɛ to ní; lɛ nitsɛ e he nyɛlɔ nɛ ya po e nya ngɛ sane yemi he.

⁷ Ke a kojo lɛ ɔ, ha nɛ a bu lɛ fɔ; e kue fami ɔ hu, a bu kaa yayami.

⁸ E wami se ko kɛ; e blɔ nya nɛ ba pee nɔ kpa nɔ́!

⁹ E bimɛ nɛ a ye awusa, nɛ́ e yo ba pee yalɔyo!

¹⁰ E bimɛ nɛ a kpa si, nɛ a ba ní, nɛ a we doku nɛ a ngɛ mi po, a fie mɛ kɛ je lejɛ ɔ!

¹¹ E hiɔtsɛmɛ nɛ a ba kpɔ e níhi tsuo ngɛ e dɛ; nɛ níhi tsuo nɛ e gbo dengme kɛ na a, nibwɔhi nɛ a ba ha.

¹² Nɔ ko nɔ ko kó na lɛ mɔbɔ; awusa bimɛ nɛ e ma si ɔ, nɔ ko nɔ ko kó hyɛ a nɔ.

¹³ E ngmɛdu hɛ mi nɛ kpata pɛsɛpɛsɛ; nɛ yi nɔ nɛ maa nyɛɛ se ɔ ko le e biɛ tete po.

¹⁴ Yawɛ mo kai yayamihi nɛ e nɛmɛ ɔmɛ pee ɔ, nɛ e nyɛ he yayami po a ko ngɔ kɛ pa lɛ.

¹⁵ Yawɛ nɛ kai a he yayami ɔmɛ daa nɛ, se mɛ nitsɛmɛ lɛɛ a ko kai mɛ gblegbleegble ngɛ zugba a nɔ.

¹⁶ Jamɛ a nɔmlɔ ɔ nlɛ hyɛ kaa e maa na nɔ ko mɔbɔ, se ohiatɛmɛ, dɛgutsɛmɛ, kɛ ni nɛmɛ nɛ a ní ngɛ mɔbɔ ɔ, e wa mɛ yi mi hluu kɛ ya si a gbenɔ mi po.

¹⁷ E suɔ nɔ gbiɛmi, lɛ hu á gbiɛ lɛ ja nɔuu. E sume gbaami, lɔ ɔ he ɔ, nɔ ko nɔ ko kó gbaa lɛ.

¹⁸ Gbiɛmi pee e he nɔ́ kaa tade nɛ e woɔ, lɔ ɔ he ɔ, lɛ nitsɛ e gbiɛmi ɔ nɛ sɛ e nɔmlɔ tso ɔ mi kaa nyu, kɛ e wuhi a mi kaa nu!

¹⁹ Gbiɛmi nɛ pee kaa bo nɛ e kɛ haa e he, kɛ mlɛ mi fimi nɔ́ nɛ e kɛ fii e mlɛ mi daa nɛ.

²⁰ Yawɛ, ye he nyɛli, kɛ nihi tsuo nɛ tuɔ munyu kɛ siɔ mi ɔ, wo mɛ hiɔ kikɛ nɛ ɔ nɔuu.

²¹ Se mo Yawɛ, ye Nyɔmtsɛ, pee ha mi kaa bɔ nɛ o wo si ɔ; he ye yi wami, ejakaa o suɔmi ɔ hi, nɛ e ngɛ daa.

²² Ohiatsɛ ji mi; ye ní ngɛ mɔbɔ, nɛ ye tsui ngɛ mi yee ngɛ ye mi mi tɔɔ.

²³ I laa kulaa kaa bɔ nɛ nini laa gbɔkuɛ nya si; a hu mi ngɔ fɔ he kaa a fieɔ baalɛ.

²⁴ I ha hwɔ hluu kɛ ya si ye nakutsohi a mi gbɔjɔ, nɛ i ta he lo kanakana.

²⁵ I pee ahlua bɔmi nɔ́ ha ye nya poli ɔmɛ. Ke a na mi kikɛ nɛ ɔ, a mimiɛɔ a yi kɛ yeɔ ye he fɛu.

²⁶ Yawɛ ye Mawu, ba piɛ ye he koo! He ye yi wami ngɛ o suɔmi nɛ ngɛ daa a he!

²⁷ Ha nɛ ye he nyɛli ɔmɛ nɛ a le kaa nɔ́ nɛ ɔ, o nine ngɛ mi; mo Yawɛ nitsɛ lɛ o tsu.

²⁸ Ye he nyɛli ɔmɛ nɛ a gbiɛ mi faa; moo lɛɛ o maa gbaa mi sa. Nihi nɛ te si kɛ wo mi ɔ, zo nɛ gbe mɛ, konɛ imi, o tsɔlɔ ɔ, ma na bua jɔmi.

²⁹ Zo nɛ gbe ye he nyɛli ɔmɛ kpɔtɔɔ. Zo nɛ ha a he kaa bo.

³⁰ Ma pa ye nya mi ma la kɛ na Yawɛ si saminya. Ma je e yi ngɛ ma kpekpemi ɔ hɛ mi.

³¹ Ejakaa e yeɔ dɛgutsɛ sane ha lɛ. Nihi nɛ buɔ dɛgutsɛ gbenɔ fɔ ɔ, e jeɔ lɛ kɛ jee a dɛ mi.