La 107 - BAIBLO ALOO NGMAMI KLƆUKLƆU Ɔ

WOMI ENUƆNE ( La 107—150 ) A je Mawu yi, ejakaa e hi

¹ “Nyɛɛ na Yawɛ si, ejakaa e hi, nɛ e suɔmi ɔ ngɛ kɛ yaa neneene!”

² Nyɛ nihi tsuo nɛ Yawɛ he nyɛ yi wami, nɛ e kpɔ nyɛ kɛ je nyɛ he nyɛli a dɛ mi ɔ, nyɛɛ hi enɛ ɔ dee kpamisa, nɛ nyɛ kɛ je e yi.

³ E ngɔ nyɛ kɛ je ma se kɛ ba kɛ je beleku je, kɛ bonyoku je, kɛ je omleyi je, kɛ leneyi je.

⁴ Ni komɛ wo lalaalo ngɛ nga kplanaa nɔ; a nɛ blɔ ko blɔ ko nɛ a kɛ ya ma a mi nɛ a ya hi lejɛ ɔ.

⁵ Hwɔ ye mɛ, nɛ kuma ye mɛ hluu kɛ ya si a mumu nya ta.

⁶ Kɛkɛ nɛ a kpa ngmlaa kɛ tsɛ Yawɛ, nɛ e je mɛ kɛ je a haomi ɔ mi.

⁷ E ngɔ mɛ kɛ gu blɔ tlɔmɔɔ nɔ hluu kɛ ya su ma ko mi he nɛ a maa hi.

⁸ E sa kaa nimli nɛ ɔmɛ nɛ a na Yawɛ si; ejakaa e tsu nyakpɛ níhi ha mɛ; e suɔmi ɔ ngɛ daa.

⁹ Nihi nɛ kuma ye mɛ ɔ, e ha mɛ nyu nɛ a nu; ni nɛmɛ nɛ hwɔ ye mɛ ɔ, e ha mɛ ní nɛ a ye nɛ a tɔ.

¹⁰ Ni komɛ hi si ngɛ diblii, kɛ mɔbɔ si himi mi; a wo mɛ tsu; a kpla mɛ kɔsɔkɔsɔ, nɛ a na nɔ́;

¹¹ ejakaa a tsɔ Hiɔwe No Mawu ɔ hɛ mi atuã, nɛ a bui e munyu, kɛ e ga womi ɔmɛ fɛɛ.

¹² A tsu ní kpakpataa hluu kɛ ya si pɔ tɔ mɛ. Ke a nɔ si ɔ, nɔ ko be nɛ woɔ a nɔ.

¹³ Kɛkɛ nɛ a kpa ngmlaa kɛ tsɛ Yawɛ, nɛ e je mɛ kɛ je a haomi ɔ mi.

¹⁴ E je mɛ kɛ je diblii, kɛ mɔbɔ si himi ɔ mi, nɛ e kplɔ kɔsɔkɔsɔ ɔmɛ ngɛ a he ngɔ pue si.

¹⁵ E sa kaa nimli nɛ ɔmɛ nɛ a na Yawɛ si, ejakaa e tsu nyakpɛ níhi ha mɛ; e suɔmi ɔ ngɛ daa.

¹⁶ E ku akɔblee agbo ɔmɛ, nɛ e poo agbo se lami dade ɔmɛ a mi.

¹⁷ Ni komɛ ya je kuasia, nɛ a blɔ yayami ɔmɛ, kɛ yayamihi nɛ a pee ɔ ha nɛ a na nɔ́.

¹⁸ Niye ní ko niye ní ko pee we mɛ akɔnɔ; a su gbenɔ muɔ nya haa.

¹⁹ Kɛkɛ nɛ a kpa ngmlaa kɛ tsɛ Yawɛ, nɛ e je mɛ kɛ je a haomi ɔ mi.

²⁰ E ngɔ e munyu ɔ kɛ tsa mɛ. E je mɛ kɛ je hɛ mi kpatami nɛ ko ba a nɔ ɔ mi.

²¹ E sa kaa nimli nɛ ɔmɛ nɛ a na Yawɛ si, ejakaa e tsu nyakpɛ níhi ha mɛ; e suɔmi ɔ ngɛ daa.

²² E sa kaa a sã bɔhi kɛ na lɛ si; a kɛ bua jɔmi nɛ la nyami la kɛ gba níhi nɛ e tsu ɔ.

²³ Nihi kɛ lɛ ye jua ngɛ wo hɛ mi, nɛ a kɛ na a nya mi ngma.

²⁴ A na níhi nɛ Yawɛ tsu; a na nyakpɛ níhi nɛ e tsu ngɛ wo ɔ nɔ ɔ.

²⁵ E fa nɛ ahumi fia, nɛ wo oslɔkehi te si.

²⁶ Oslɔke ɔmɛ wo lɛ ɔmɛ a nɔ kɛ ya hiɔwe kɛ ba si, kɛ ya wo ɔ sisi tɔɔ. Haomi nɛ ba a nɔ ngɛ lɛ ɔ mi ɔ ha a kã nya ta.

²⁷ Nɛ e pee ja a, a ngɛ kpae, nɛ a ngɛ si tɛe kaa dã deli, nɛ a pa li bɔ nɛ a maa pee hu.

²⁸ Kɛkɛ nɛ a kpa ngmlaa kɛ tsɛ Yawɛ, nɛ e je mɛ kɛ je a haomi ɔ mi.

²⁹ E tsi ahumi ɔ nya nɛ e kpa fiami; oslɔke ɔmɛ a he jɔ, nɛ wo ɔ ngmɛ dii.

³⁰ Ni ɔmɛ a bua jɔ a he jehanɛ, ejakaa nɔ́ tsuaa nɔ́ nya ba si. Yawɛ kɛ mɛ ba su lɛsimuɔ he ɔ nɛ a yaa a fiafiaafia.

³¹ E sa kaa nimli nɛ ɔmɛ nɛ a na Yawɛ si, ejakaa e tsu nyakpɛ níhi ha mɛ; e suɔmi ɔ ngɛ daa.

³² A je e yi; ma kpekpemi ɔ tsuo nɛ je e yi; á je e yi ngɛ ma nimeli a kpe ɔ mi hulɔ.

³³ Yawɛ ha pahi mii kulaa, nɛ nyu hɛngmɛhi tsi, nɛ a bɛ hu.

³⁴ Zugba nɛ baa ní saminya a plɛ pee ngo zɔ zugba; ejakaa nihi nɛ hi lejɛ ɔ, yayami sɔuu a pee.

³⁵ Yawɛ ha nga kplanaa plɛ pee taku kɛ e mi nyu babaaba; nɛ zugba gbigbli plɛ pee he nɛ nyu hɛngmɛhi hia si ngɛ.

³⁶ Ni nɛmɛ nɛ hwɔ ye mɛ ɔ, e ha a to si ngɛ lejɛ ɔ; nɛ a po ma, nɛ a hi lejɛ ɔ.

³⁷ A hu zugba a, nɛ a du wai yiblii ngɛ nɔ; nɛ a kpa ní babauu.

³⁸ Yawɛ gbaa e ma a; e ha nɛ a he ba hiɛ babauu nitsɛ; a lohwehi hu e ha we nɛ a nɔ nɛ gbɔ́.

³⁹ Benɛ a he nyɛli ba ye Mawu ma a nɔ, nɛ a wa mɛ yi mi, nɛ a pee mɛ nisɛ ní babauu ɔ,

⁴⁰ Mawu hu kɛ a ganɔ ɔmɛ to ní saminya, nɛ e ha nɛ a ya wo lalaalo ngɛ nga kplanaa nɔ he nɛ blɔ ko blɔ ko be.

⁴¹ Se nihi nɛ e fi mɛ ɔ, e je mɛ kɛ je a haomihi a mi; nɛ e ha a ngmɛdu he ba hiɛ babauu kaa tohi.

⁴² Nihi nɛ peeɔ nɔ nɛ da a naa nɔ́ nɛ ɔ, nɛ a bua jɔɔ he; se yayami peeli lɛɛ a maa a nya.

⁴³ Nɔ nɛ ji ní lelɔ ɔ, e susu ní nɛ ɔmɛ a he. Nihi tsuo nɛ a susu Yawɛ suɔmi nɛ ngɛ daa a he.