La 106 - BAIBLO ALOO NGMAMI KLƆUKLƆU Ɔ

Yawɛ hi

¹ Nyɛ je Yawɛ yi! Nyɛɛ na Yawɛ si, ejakaa e hi; e naa mɔbɔ kɛ yaa neneene!

² Ní nguanguahi tsuo nɛ Yawɛ pee ɔ, mɛnɔ ma nyɛ ma de? Mɛnɔ ma nyɛ ma je e yi bɔ nɛ sa?

³ A gbaa nihi nɛ yeɔ dami sane, nɛ a peeɔ nɔ́ nɛ da be tsuaa be.

⁴ Yawɛ, ke o ngɛ o ma a mɔbɔ nae ɔ, mo kai imi hulɔ; ke o ngɛ a yi wami hee ɔ, ngɔɔ imi hu ngɔ piɛ a he.

⁵ Ha nɛ ma na bɔ nɛ o ma mi bi ɔmɛ a he mi jɔ mɛ ha, konɛ bua jɔmi nɛ ba ma a mi ɔ, imi hu ma piɛ a he kɛ nya.

⁶ Wa pee yayami kaa wa nɛmɛ ɔmɛ nɔuu. Wa pee níhi nɛ sɛ; wa wa nihi yi mi.

⁷ Nyakpɛ níhi nɛ Hiɔwe No ɔ pee ngɛ Egipt ɔ, wa nɛmɛ ɔmɛ nui sisi. Suɔmi babauu nɛ e je kpo kɛ tsɔɔ mɛ ɔ, a kaii we. Mohu ɔ, a te si wo lɛ ngɛ Wo Tsu ɔ nya.

⁸ Se kɛ̃ ɔ, e he a yi wami kaa bɔ nɛ e wo si ɔ; nɛ e kɛ tsɔɔ e he wami kpetekpleenyɛ ɔ.

⁹ E nga Wo Tsu ɔ yi, nɛ nyu ɔ mii, nɛ e kɛ mɛ nyɛɛ kɛ be kaa nɔ́ nɛ nga nɔ lɛ a ngɛ nyɛɛe.

¹⁰ E kpɔ mɛ ngɛ nihi nɛ nyɛɛ mɛ ɔ a dɛ mi; e je mɛ kɛ je a he nyɛli ɔmɛ a dɛ mi.

¹¹ Se nyu ɔ ba ha a he nyɛli ɔmɛ a nɔ, nɛ a ti nɔ kake ngmelu po ji mi.

¹² Kɛkɛ nɛ e ma a he e munyu ɔmɛ ye, nɛ a la kɛ je e yi.

¹³ Se e kɛ we kulaa nɛ a hɛ je níhi tsuo nɛ e pee ha mɛ ɔ nɔ; nɛ a bui e ga womi tue hu.

¹⁴ A ya di jiklɔɔ níhi a se ngɛ nga a nɔ; a pee enɛ ɔ kɛ ka Mawu.

¹⁵ Mawu ha mɛ níhi nɛ a bi lɛ ɔ tsuo; se e ngɔ hiɔ nɛ haa nɛ nɔ flaa kɛ gbla a tue.

¹⁶ Ngɛ nga a nɔ ɔ, ni ɔmɛ a hɛ kɔ̃ Mose nɔ, kɛ jehanɛ Aaron, Yawɛ tsɔlɔ klɔuklɔu ɔ.

¹⁷ Kɛkɛ nɛ zugba a gba, nɛ e mii Datan; e mii Abiram, kɛ nihi nɛ piɛ e he ɔ hulɔ.

¹⁸ La je ngɛ ni ɔmɛ a kpɛti, nɛ e sã yiwutsotsɛmɛ ɔmɛ.

¹⁹ A pee na bi ngɛ Horeb, nɛ a sɔmɔ jamɛ a amaga a nɛ a puɛ ɔ.

²⁰ A ngɔ amaga nɛ a pee kaa na nɛ yeɔ nga a kɛ tsake Mawu nitsɛ hɛ mi nyami ɔ.

²¹ Mawu, a kpɔlɔ ɔ nɛ tsu ní tsumi nguanguahi ngɛ Egipt ɔ, a hɛ je e nɔ.

²² Hyɛ nyakpɛ níhi nɛ e tsu ngɛ lejɛ ɔ! Hyɛ ní nguanguahi nɛ e pee ngɛ Wo Tsu ɔ nya!

²³ Benɛ Mawu de ke e ma kpata e ma a hɛ mi ɔ, e tsɔlɔ Mose nɛ e hla a nɛ da mi ha ma a. Mose lɛ jɔɔ Mawu abofu ɔ he, loko e kpataa we ma a hɛ mi ɔ nɛ.

²⁴ Wa nɛmɛ ɔmɛ tu we zugba saminyayoo ɔ he munyu kpakpa, ejakaa si nɛ Mawu wo mɛ ɔ, a he we yi.

²⁵ A tu munyu huitihuiti ngɛ a bo tsu ɔmɛ a mi; nɛ a bui Yawɛ tue.

²⁶ Enɛ ɔ he je ɔ, e wo e nine nɔ nɛ e ka mɛ kita kaa e ma kpata a hɛ mi ngɛ nga a nɔ,

²⁷ nɛ e ma ha a nina maa gbɛ ngɔ fĩa je ma amɛ a mi ngɛ je ɔ mi tsuo.

²⁸ Jehanɛ, Mawu ma a ya piɛ je ma amɛ a he nɛ a kɛ mɛ ja Baal nɛ ngɛ Peor ɔ. Bɔhi nɛ a sã ha a ni gbogboe ɔmɛ hu a kɛ mɛ ye.

²⁹ A kɛ a ní peemi ní ɔmɛ wo Yawɛ mi mi la, nɛ gbenɔ hiɔ ba sɛ a kpɛti.

³⁰ Se Finehas te si, nɛ e gbla yayami peeli ɔmɛ a tue, kɛkɛ nɛ gbenɔ hiɔ ɔ se po.

³¹ Kɛ je jamɛ a be ɔ, a kaiɔ nɔ́ kpakpa nɛ e pee nɛ ɔ; nɛ a maa ya nɔ ma kai daa.

³² Ma a wo Yawɛ mi mi la ngɛ Meriba pa a nya. A kɛ Mose wo haomi mi ngɛ nɔ́ nɛ a pee ɔ he.

³³ Mose mi mi fu ma a wawɛɛ nitsɛ, nɛ e tu munyu basabasa.

³⁴ A kpataa we je ma amɛ a hɛ mi kaa bɔ nɛ Yawɛ fa mɛ ke a pee ɔ.

³⁵ Mohu ɔ, a ya futu je ma amɛ, nɛ a kase a ní peemi ní ɔmɛ.

³⁶ A sɔmɔ a we amaga amɛ, nɛ enɛ ɔ ha nɛ a kpa Mawu se nyɛɛmi.

³⁷ A kɛ a binyumuhi, kɛ a biyihi sã bɔ ha wɔhi.

³⁸ A pue nihi nɛ pee we yayami a muɔ si; mɛ nitsɛmɛ a binyumuhi, kɛ a biyihi po a ngɔ mɛ kɛ sã bɔ ha Kanaan wɔhi; nɛ a kɛ muɔ ble zugba a.

³⁹ A kɛ a ní peemi ble mɛ nitsɛmɛ a he, nɛ Mawu hu a yi lɛ anɔkuale.

⁴⁰ Enɛ ɔ he je ɔ, Yawɛ mi mi fu lɛ nitsɛ e ma a, nɛ e kua mɛ.

⁴¹ E ngɔ mɛ ngɔ wo je mahi a dɛ mi; nɛ a he nyɛli ɔmɛ ye a nɔ.

⁴² A he nyɛli ɔmɛ ye a nɔ kɛ kɔni si wami; a wa mɛ yi mi, nɛ a ha nɛ a sɔmɔ mɛ.

⁴³ Yawɛ je e ma a kɛ je a haomihi a mi si abɔ. Se pee se ɔ, a tsɔɔ e hɛ mi atuã nɛ a ya peeɔ yayamihi nɛ pe kekle ní ɔmɛ po.

⁴⁴ Se kɛ̃, benɛ e nu nɛ a ngɛ ngmlaa kpae ɔ a ní pee lɛ mɔbɔ.

⁴⁵ E kai somi nɛ e kɛ mɛ so ɔ, nɛ e suɔmi babauu ɔ he je ɔ, e ngɔ a he kɛ ke mɛ.

⁴⁶ E ha nɛ a ní pee nihi tsuo nɛ nuu mɛ nyɔguɛ ɔ mɔbɔ.

⁴⁷ Yawɛ wa Mawu! Mo kpɔ wɔ kɛ je je ma amɛ a dɛ mi, nɛ o kpale wɔ kɛ ba ekohu, konɛ waa na mo si, nɛ wa je o biɛ klɔuklɔu ɔ yi.

⁴⁸ Nyɛ je Yawɛ, Israel Mawu ɔ yi; nyɛ je e yi kɛ je neneene kɛ ya neneene. Nyɛ ha nɛ ma a tsuo nɛ de ke, “Amen!” Nyɛ je Yawɛ yi.