Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

La 105 - BAIBLO ALOO NGMAMI KLƆUKLƆU Ɔ


Mawu kɛ e ma a
( Kronika I, 16.8-22 )

1 Nyɛɛ na Yawɛ si; nyɛɛ wo e biɛ ta; nyɛ ha je ma amɛ nɛ a le e ní peemi ní ɔmɛ.

2 Nyɛ la kɛ je Yawɛ yi, nyɛɛ sɛɛ nyakpɛ níhi nɛ e pee ɔ.

3 Nyɛ ha nɛ wa bua nɛ jɔ wa he kaa Yawɛ níhi ji wɔ; nɔ tsuaa nɔ nɛ jaa lɛ ɔ, e nya!

4 Nyɛ hla Yawɛ se blɔ, konɛ e ha nyɛ he wami; nyɛ ja lɛ daa.

5-6 Nyɛ, Mawu tsɔlɔ Abraham nina! Yakob nina, nyɛ nɛ Mawu hla! Nyɛ kai nyakpɛ níhi nɛ Mawu pee, kɛ bɔ nɛ e kojo je ma amɛ.

7 Yawɛ ji wa Mawu; e woɔ e mlaa kɛ haa je ɔ tsuo.

8 E kaiɔ e somi ɔ daa. Si ko nɛ e wo ɔ, e yeɔ nɔ yi nɔhi tsuo.

9 Somi nɛ e kɛ Abraham so ɔ, e kaiɔ; kita nɛ e ka Isak hu e maa ye nɔ.

10 Yawɛ kɛ Yakob so, nɛ somi nɛ ɔ ngɛ kɛ yaa neneene.

11 E ke, “Ma ngɔ Kanaan zugba a kɛ ha mo, nɛ zugba a ma ba pee o weto ní.”

12 Jamɛ a be ɔ, Israel bi ɔmɛ a he pi; a be blɔ nya ko kulaa, nɛ nibwɔhi ji mɛ ngɛ zugba a nɔ.

13 A nyɛɛɔ kɛ jeɔ ma kake mi kɛ yaa ma kake mi. A woɔ lalaalo kɛ jeɔ nɔ yemi he kake kɛ yaa nɔ yemi he kake.

14 Se Mawu ngmɛ́ blɔ nɛ nɔ ko nɛ hao mɛ; a he ɔ, e je blɔ de matsɛmɛ ɔmɛ ke,

15 “Ye nihi nɛ i pɔ mɛ nu ji nɛ ɔmɛ nɛ; nyɛ ko ye mɛ awi! Ye gbali ji nɛ ɔmɛ nɛ, nyɛ ko ta a he.”

16 Jehanɛ, Yawɛ ha nɛ hwɔ ba zugba a nɔ, nɛ Kanaan bi ɔmɛ a niye ní tsuo ta.

17 Se e tsɔ nɔ ko kɛ nyɛɛ a hɛ mi momo; lɛ ji Yosef nɛ a jua lɛ kaa nyɔguɛ ɔ.

18 A wo e nane kɔsɔkɔsɔ, nɛ a kɛ e kuɛ wo dade pã mi

19 kɛ ya si nɔ́ nɛ e de to ɔ ba mi. Yawɛ munyu ɔ wo lɛ nguɔ.

20 Kɛkɛ nɛ Egipt matsɛ ɔ tsɔ nɛ a ya je lɛ; je ma amɛ a nɔ yelɔ ɔ ha e ye e he.

21 Matsɛ ɔ pee lɛ nɔkɔtɔma ngɛ e we ɔ, kɛ e nɔ yemi he ɔ tsuo nɔ yelɔ,

22 konɛ e tsɔse e ganɔ ɔmɛ bɔ nɛ sa, nɛ e tsɔɔ e ma nimeli ɔmɛ nile.

23 Kɛkɛ nɛ Yakob pue nɔ kɛ ho Egipt ya ya to nubwɔ ngɛ jamɛ a zugba a nɔ.

24 Yawɛ ha nɛ e ma a bɔ, nɛ a he hiɛ babauu. E ha a he hu wa kulaa pe a he nyɛli ɔmɛ.

25 E puɛ Egipt bi ɔmɛ a juɛmi ngɛ Israel he; a nyɛ mɛ, nɛ a pee mɛ nisɛ níhi.

26 Kɛkɛ nɛ e tsɔ e tsɔlɔ Mose, kɛ Aaron nɛ e hla mɛ ɔ.

27 Mawu ha nɛ a pee okadihi, kɛ nyakpɛ níhi ngɛ Egipt zugba a nɔ.

28 Mawu ha nɛ diblii wo ngɛ zugba a nɔ. Se nɔ́ nɛ e fa Egipt bi ɔmɛ ke a pee ɔ, a bui fɛɛ.

29 E ha nɛ a pa amɛ tsuo plɛ pee muɔ, nɛ a mi lo ɔmɛ tsuo gbo.

30 Ovɔnɔhi babauu ba zugba a nɔ; matsɛ we ɔ mi pohu ovɔnɔhi hyi lejɛ ɔ tɔtɔɔtɔ.

31 Mawu tu munyu, nɛ pwɔlwɔɛ munomunohi babauu ba zugba a tsuo nɔ.

32 E ha nɛ gbiɛ ngo ngu nɛ ngɛ hiɔmi nane mi, nɛ oslabai gba ngɛ zugba a nɔ tsuo.

33 E kpata wai tsohi, ngmɔkɔ tsohi, kɛ tso kpahi tsuo a hɛ mi ngɛ zugba a nɔ.

34 E tu munyu, nɛ baalɛhi ba babauu, baalɛ nguahi kɛ wawi nɛ hí kanemi.

35 Baalɛ ɔmɛ ye ngmɔ si níhi, kɛ ba mumu tsuo ngɛ zugba a nɔ.

36 Jehanɛ, e gbe bitɛtehi nɛ ji Egipt nyumuhi a kekleekle ngmɛduhi tsuo ngɛ zugba a nɔ.

37 Kɛkɛ nɛ e kpaka Israel bi ɔmɛ kɛ je; nɔ tsuaa nɔ hɛɛ sika hiɔ, kɛ sika tsu. Nɔ ko nɔ ko be a kpɛti nɛ ji hiɔtsɛ; mɛ tsuo pɛpɛɛpɛ a ngɛ kpakpataa.

38 Benɛ Israel bi ɔmɛ je ɔ, Egipt bi ɔmɛ na bua jɔmi wawɛɛ nitsɛ; ejakaa a ye Israel bi ɔmɛ gbeye.

39 Mawu ha nɛ bɔku ba ha Israel bi ɔmɛ a he; e ha mɛ la, nɛ a kɛ hyɛ nɔ́ nyɔ mi.

40 A bi lɛ niye ní, nɛ e ha mɛ hɔne. E ha mɛ niye ní kɛ je hiɔwe, nɛ a ye nɛ a tɔ.

41 E bli tɛ sa nya, nɛ nyu je mi pue si; nyu ɔ be lalaala ngɛ nga a nɔ kaa pa.

42 E kai e tsɔlɔ Abraham, kɛ si nɛ e wo lɛ ɔ.

43 Kɛkɛ nɛ e kpaka e ma nɛ e hla a kɛ je; a la, nɛ a hwɔ lele.

44 Mawu ngɔ ma je li ɔmɛ a zugba a kɛ ha mɛ; nɛ nɔ́ nɛ ni kpahi gbo he dengme ɔ ba plɛ pee a nɔ́.

45 E pee enɛ ɔ, konɛ a kai e mlaa amɛ, nɛ a ye nɔ. A je Yawɛ yi!

Bible in Dangme © Bible Society of Ghana, 2018.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ