La 104 - BAIBLO ALOO NGMAMI KLƆUKLƆU Ɔ

A je bɔlɔ ɔ yi

¹ Ma je Yawɛ yi! Yawɛ ye Mawu, o kle! O hɛ mi nyami, kɛ o he wami kpetekpleenyɛ ɔ ngɛ kaa bo nɛ o kɛ ha o he.

² O ngɔ la kɛ ha o he kaa bo; o blɛke hiɔwe mi kaa bo tsu.

³ O ma o we ɔ ngɔ fɔ nyu nɛ ngɛ hiɔwe ɔ nɔ. O ngɔ bɔku kɛ pee o lɛ, nɛ kɔɔhiɔ mi o nyɛɛɔ.

⁴ O ngɔ kɔɔhiɔ kɛ pee o tsɔlɔ, nɛ oslabai la a pee o sɔmɔlɔ.

⁵ O ngɔ je ɔ ngɔ ma e sisi tomi ɔ nɔ kpɛii, nɛ a be jee ngɛ lejɛ ɔ gblegbleegble.

⁶ O ngɔ nyu kɛ ha je ɔ he kaa bo; nyu ha yo ɔmɛ a yi mi tsuo.

⁷ Benɛ o wo gbi, nɛ hiɔwe si ɔ, a he sɔ kɛ je lejɛ ɔ.

⁸ Nyu ɔ hia kɛ be ngɛ yo ɔmɛ a nɔ kɛ ya pue kɔ̃ ɔmɛ a mi he nɛ o to ha mɛ ɔ.

⁹ O to huzu ha nyu ɔ nɛ e ko be he, konɛ e ko kpale ba ha je ɔ nɔ hu.

¹⁰ O haa nɛ pahi hiaa ngɛ kɔ̃hi a mi, nɛ a mi nyu ɔ ya guu yohi a kpɛ.

¹¹ Pu mi lohwehi tsuo náa nyu nɛ a nuɔ. Nga mi tejihi nuɔ nyu hluu kɛ ya siɔ kuma yi mɛ hu.

¹² Lohwe pɛlitsɛmɛ peeɔ a tsuhi ngɛ tso kɔnihi a nɔ ngɛ pa tue, nɛ a hii lae ngɛ lejɛ ɔ.

¹³ O haa nɛ nyu nɛɛ kɛ jeɔ hiɔwe kɛ pueɔ yo ɔmɛ a nɔ; nɛ je ɔ mi hyi tɔ kɛ o gbaami sɔuu.

¹⁴ O haa nɛ nga puɛɔ ha lohwehi; o haa nɔmlɔ adesa tsohi nɛ e du, konɛ e ná niye ní kɛ je zu mi.

¹⁵ O haa lɛ dã nɛ ma ha lɛ bua jɔmi, nu nɛ ma ha nɛ e he womi nɔ ma tsɔ, kɛ niye ní nɛ maa wo lɛ he wami.

¹⁶ Lebanon seda tso ɔmɛ naa nyu babaaba. Yawɛ nitsɛ e tsohi nɛ e du ji lɔ ɔmɛ nɛ.

¹⁷ Lejɛ ɔ lɛ lohwe pɛlitsɛmɛ peeɔ a tsuhi ngɛ; sɛsɛo ɔ mi lɛ aklawa peeɔ e tsu ngɛ.

¹⁸ Yo gaga amɛ a nɔ lɛ pu mi apletsihi hiɔ; nyu mi kpihi lɛɛ a hi he ji tɛ sahi a kpɛ.

¹⁹ O pee nyɔhiɔ, nɛ o kɛ tsɔɔ be slɔɔtohi; pu hu le be nɛ e kɛ nɔɔ si.

²⁰ O haa nɛ je jɔɔ, kɛkɛ ke diblii wo ɔ, pu mi lohwehi tsuo jeɔ kpo.

²¹ Jata bimɛ huãã nɛ a daa de ke a ngɛ niye ní hlae kɛ je mo Mawu o dɛ mi.

²² Ke pu te si ɔ, a kpaleɔ a se ya buɔ si ngɛ a laami he ɔmɛ.

²³ Kɛkɛ ɔ, nimlihi jeɔ kpo kɛ yaa a ní tsumi hehi ya tsuɔ ní kɛ ya siɔ gbɔkuɛ.

²⁴ Yawɛ, hyɛ kaa o pee níhi babauu! Nile o kɛ pee lɛ tsuo pɛpɛɛpɛ. O nibɔ níhi hyi je ɔ mi tɔ.

²⁵ Wo ɔ ji nɛ ɔ nɛ; e kle nɛ e bli, kɛ e mi lohwe nguanguahi kɛ wawi nɛ a be nyɛe maa kane.

²⁶ Lɛ ɔmɛ ji nɛ ɔmɛ ngɛ wo ɔ nɔ. Nɛ wo nɛ ɔ mi nɛ lohwe kɛ e he gbeyegbeye nɛ o bɔ ɔ fiɛɔ ngɛ.

²⁷ Ní nɛ ɔmɛ tsuo hyɛɛ mo blɔ kaa o ma ha mɛ a niye ní ngɛ be nɛ sa mi.

²⁸ Ke o ha mɛ niye ní ɔ, a yeɔ; o lɛɔ mɛ nɛ a tɔɔ kɛ ní kpakpahi sɔuu.

²⁹ Ke o kua mɛ ɔ, a haoɔ. Ke o ngɔ a mumi ɔ, a gboɔ nɛ a kpaleɔ kɛ yaa zu mi he nɛ a je ɔ.

³⁰ O ngɔɔ o mumi ngɔ woɔ a mi, nɛ a peeɔ nibɔ níhi. Kɛkɛ o haa je ɔ peeɔ ehe ekohu.

³¹ Yawɛ hɛ mi nyami ɔ maa hi si daa! Níhi nɛ Yawɛ pee ɔ, e ma na a he bua jɔmi.

³² Ke Yawɛ hyɛ je ɔ, kɛkɛ je ɔ mimiɛ. Ke e ta yo ɔmɛ a he kɛkɛ a je la su ku.

³³ Ma la kɛ je Yawɛ yi ye wami be ɔ tsuo. Be mi nɛ i ngɛ je mi kɛ mwɔɔ ɔ, ma la kɛ je ye Mawu ɔ yi.

³⁴ Susumi kpakpa nɛ i ngɛ ngɛ e he ɔ, i na nɛ lɛ tsuo sa e hɛ mi, ejakaa lɛ ji nɔ nɛ haa mi bua jɔmi.

³⁵ Yayami peeli tsuo a hɛ mi nɛ kpata, konɛ yiwutsotsɛmɛ ko hi je ɔ mi hu. Ma je Yawɛ yi. Ee, nyɛ je Yawɛ yi.