La 102 - BAIBLO ALOO NGMAMI KLƆUKLƆU Ɔ

Niheyo nɔ́ nalɔ ko kue fami

¹ Yawɛ, i ngɛ mo tsɛe nɛ o ba piɛ ye he. Moo bu ye kue fami ɔ tue koo!

² Ke i ngɛ haomi mi ɔ, koo je ye he. Ke i tsɛ mo ɔ, he nɔ esɔ, nɛ o pee ye hiami ní ɔmɛ ha mi.

³ Ye wami ligbi ɔmɛ ngɛ bee kaa la su ku, nɛ ye nɔmlɔ tso ɔ dɔ la hɛii kaa flɔɔnɔɔ ɔ mi.

⁴ I pee kaa nga gbigbli nɛ a gbee nɔ, nɛ niye ní pa jlo we mi hu.

⁵ Daa nɛ ɔ, kɛmɛmi kɛkɛ lɛ i ngɛ kɛmɛe. Enɛ ɔ ha nɛ ye wuhi tsuo je kpo, nɛ i pee kanyakanya.

⁶ I pee kaa okpoku ngɛ nga nɔ, loo klomi ngɛ we doku mi.

⁷ I hwɔ we mahe; i pee kaa ohwe pɛlitsɛ kake too nɛ maa si ngɛ tsu yi mi.

⁸ Daa ligbi ɔ, jɛmi kɛkɛ ye he nyɛli hii mi jɛe. Ni nɛmɛ nɛ yeɔ ye he fɛu ɔ ngɔɔ ye biɛ kɛ gbiɛɛ ni kpahi.

⁹ Ye niye ní ɔ, la zu sɔuu; nɔ nɛ i nuɔ ɔ, vo nyu futu mi,

¹⁰ ejakaa o mi mi fu mi wawɛɛ nitsɛ. O wo ye nɔ, nɛ o sake mi kɛ fɔ he.

¹¹ Ye wami ligbi ɔmɛ ngɛ kaa hɔhɔmi nɛ bee kɛ yaa. I pee kaa nga gbigbli.

¹² Se mo Yawɛ, moo lɛɛ matsɛ ji mo kɛ yaa neneene; yi nɔhi tsuo ma kai mo.

¹³ O maa te si, nɛ o maa na Zion mɔbɔ. Be ɔ su nɛ o maa na lɛ mɔbɔ; be ɔ nɛ a to ɔ su.

¹⁴ Ejakaa o tsɔli ɔmɛ suɔ Zion tɛ ɔmɛ; nɛ lejɛ ɔ zu ɔ po, a mi mi sãã mɛ ngɛ he.

¹⁵ Je ma amɛ tsuo maa ye Yawɛ gbeye. Zugba a nɔ matsɛmɛ ɔmɛ tsuo maa ye e hɛ mi nyami ɔ gbeye.

¹⁶ Yawɛ kpale ma Zion ekohu; e ma je e he wami kpetekpleenyɛ ɔ kɛ tsɔɔ.

¹⁷ E maa bu e nihi nɛ e kua mɛ ɔ a kue fami ɔ tue, nɛ e maa pee a hiami ní ɔmɛ ha mɛ.

¹⁸ A maa ngma nɔ́ nɛ ɔ kɛ to ha yi nɔ bi nɛ maa ba ngɛ se, konɛ nihi nɛ a na we nɛ a fɔ mɛ lolo ɔ nɛ a ba je Yawɛ yi.

¹⁹ Yawɛ hyɛ zugba a kɛ je e he klɔuklɔu ɔ ngɛ tsitsaa lokoo. E hyɛ zugba a kɛ je hiɔwe,

²⁰ konɛ e nu pamitsɛmɛ ɔmɛ a kɛmɛmi ɔ he, nɛ nihi nɛ a bu mɛ gbenɔ fɔ ɔ, e ha nɛ a ye a he.

²¹ Kɛkɛ ɔ, a maa wo Yawɛ biɛ ta ngɛ Zion; a ma je e yi ngɛ Yerusalem.

²² Jamɛ a be ɔ, je ma amɛ, kɛ matsɛmɛ ɔmɛ tsuo ma ba bua a he nya nɛ a ma ja Yawɛ.

²³ Yawɛ ha nɛ i gbɔjɔ be mi nɛ i ngɛ he wami mi kɛ mwɔɔ. E po ye wami be ɔ nɔ kpiti.

²⁴ Ye Mawu, mo nɛ o ngɛ daa! Koo ngɔ mi kɛ ho amlɔ nɛ ɔ, be mi nɛ i wɛ lolo.

²⁵ Blema lokoo nɛ o bɔ je ɔ; mo nitsɛ o nine o kɛ pee hiɔwe ɔ.

²⁶ Ní nɛ ɔmɛ a hɛ mi ma kpata; se moo lɛɛ o ngɛ kɛ yaa neneene. Ee, mɛ tsuo a ma ba pee momo kaa bɔ nɛ bo he ba peeɔ bo momo ɔ. O ma sake mɛ kɛ fɔ he kaa bɔ nɛ a sakeɔ bo momo kɛ fɔɔ he ɔ. Nɛ a maa laa kulaa.

²⁷ Se moo lɛɛ, bɔ nɛ o ngɛ ɔ, ja ko lɛ o ngɛ. O wami be ɔ be nyagbe.

²⁸ Wɔ, o tsɔli ɔmɛ, wa bimɛ ɔmɛ a yi ma na wami, nɛ a nina kɛ mo maa hi si ngɛ he jɔmi mi.