La 10 - BAIBLO ALOO NGMAMI KLƆUKLƆU Ɔ

Dami sane yemi he kue fami

¹ Yawɛ, mɛni hɛ mo kɛ ya se tsitsaa kikɛ nɛ ɔ? Mɛni he je o ya laa o he ngɛ wa haomi be nɛ ɔ mi ɔ?

² Yayami peeli ngɛ a he nɔ woe, nɛ a ngɛ ohiatsɛmɛ yi mi wae. Ha nɛ ga yayamihi nɛ a to ɔ nɛ kpa bu mɛ nitsɛmɛ a nɔ.

³ Yayami peelɔ fĩaa kɛ fɔɔ níhi nɛ e tsui suɔ a nɔ. Nɔmlɔ nɛ hɛ kɔɔ nɔ́ nɔ ɔ, e gbiɛɛ Yawɛ, nɛ e kuaa lɛ.

⁴ Yayami peelɔ ɔ he nɔ womi ha we nɛ e hlaa Mawu se blɔ. E susumi tsuo ji “Mawu ko be.”

⁵ Yayami peelɔ yeɔ manye ngɛ nɔ́ tsuaa nɔ́ mi. E nɛ kaa Mawu tue gblami ko ngɛ ha lɛ. E he nyɛli lɛɛ, pe e yeɔ a he fɛu.

⁶ E deɔ ngɛ e yi mi ke, “Nɔ́ ko nɔ́ ko be mi pee; haomi ko be ye nɔ bae gblegbleegble.”

⁷ Munyuhi nɛ jeɔ e nya ji gbiɛmi kɛ sisimi, kɛ níhi nɛ woɔ nɔ susuma he gbeye. E he sɔɔ kɛ tuɔ yakayaka munyuhi, kɛ munyuhi nɛ kɛ nɔ woɔ haomi mi.

⁸ E woɔ ka ngɛ laami hehi ngɛ kɔpehi a mi, nɛ e gbee nihi nɛ pee we nɔ́ ko yaka gu. Daa nɛ ɔ, e ngɛ nihi nɛ a ní ngɛ mɔbɔ dae.

⁹ E buɔ si ngɛ e laami he ɔ kaa jata ngɛ e muɔ mi. E woɔ ka nɛ e nuu nihi nɛ a ní ngɛ mɔbɔ. Ke e nine su a nɔ kɛkɛ e gbla mɛ kɛ ho.

¹⁰ E kɛ e he wami tsuo fiaa nihi nɛ a ní ngɛ mɔbɔ nɔ́ nɛ a nɔɔ si.

¹¹ Nɔ́ nɛ yiwutsotsɛ nɛ ɔ deɔ ngɛ e yi mi ji, “Oo, Mawu hɛ je nɔ; Mawu má e hɛngmɛ; e hyɛ we mi tete po!”

¹² Yawɛ Mawu, gbla yayami peeli a tue, nɛ o hɛ ko je nɔ́ nali a nɔ.

¹³ Mɛni he je yayami peelɔ ma kua Mawu? Mɛni he je lɛ e ma de ngɛ e yi mi ke, “Oo, e tsa be mi nɔ́ ko pee” ɔ?

¹⁴ Se moo lɛɛ o ngɛ nɔ́ tsuaa nɔ́ hyɛe. Niinɛ, o ngɛ haomi ɔ, kɛ aywilɛho ɔ hyɛe, nɛ o maa pee he nɔ́ ko kɛ̃. Nɔ nɛ e fi lɛ ɔ, o nɔ lɛ e ngɔɔ e hɛ kɛ fɔɔ. Mo ji awusahi a he piɛlɔ.

¹⁵ Moo ku yiwutsotsɛmɛ, kɛ yayami peeli a he wami nya, nɛ o gbla a tue kɛ yaa si yayami peemi se maa po.

¹⁶ Yawɛ ji matsɛ kɛ je neneene kɛ yaa neneene. Je ma amɛ gbo ta e zugba a nɔ.

¹⁷ Yawɛ, hiami níhi nɛ nɔ́ nali kɛ ba fɔ o hɛ mi ɔ, o le. Moo pee a hiami ní ɔmɛ ha mɛ, konɛ a ná he wami he.

¹⁸ Moo ye awusahi, kɛ nɔ́ nali a sane ha mɛ, konɛ nɔmlɔ adesa kó wo a he gbeye hu.