Kronika II, 9 - BAIBLO ALOO NGMAMI KLƆUKLƆU Ɔ

Sheba manyɛ ba slaa Salomo

¹ Sheba manyɛ ɔ ba nu Salomo he sane, nɛ e hia blɔ kɛ ba Yerusalem, konɛ e ba ka lɛ kɛ sane bimihi nɛ a he wa. Benɛ e ma a, nihi babauu nitsɛ nyɛɛ e se kɛ ba. E kɛ afukpɔngɔhi nɛ a wo a se mi ní babauu hu ba. Ní nɛ ɔmɛ ji tsopa kɛ e he via, sika tsu, kɛ tɛ nɛ he jua wa. Benɛ manyɛ ɔ kɛ Salomo ba bua a, e bi Salomo munyuhi tsuo nɛ ngɛ e yi mi.

² Salomo ha lɛ munyu ɔmɛ tsuo a heto; ekoeko be nɛ wa tsɔ ha lɛ nɛ e nyɛ we nɛ e ha heto.

³ Sheba manyɛ ɔ nu Salomo nile munyu ɔmɛ, nɛ e na matsɛ we ɔ nɛ e po ɔ.

⁴ Jehanɛ se hu, manyɛ ɔ na niye ní nɛ a kɛ to okplɔɔ ha matsɛ ɔ; e na matsɛ sɔmɔli ɔmɛ nɛ a pueɔ si kɛ a he tadehi; e na matsɛ ɔ dã woli, kɛ sami bɔhi nɛ a sãã ngɛ Yawɛ we ɔ. Benɛ Sheba manyɛ ɔ na ní nɛ ɔmɛ tsuo ɔ, e he mi po.

⁵ E de Matsɛ Salomo ke, “O he sane, kɛ o nile nɛ i nu he ngɛ imi nitsɛ ye zugba a nɔ ɔ, anɔkuale sɔuu.

⁶ Se i he we yi kɛ ba si i ba na kɛ ye hɛngmɛ. Mamoo o nile ɔ, pi e mi fa tete po he nɛ i nu ɔ. O we agboje ɔ pe bɔ nɛ a gba mi ɔ kulaa.

⁷ O tsɔli ɔmɛ a he ngɛ ní pɛ. O tsɔli ɔmɛ nɛ sɔmɔɔ mo daa, nɛ a nuɔ o nile munyu ɔmɛ ɔ, a he ngɛ ní pɛ!

⁸ Yawɛ, o Mawu ɔ nɛ na o he bua jɔmi nɛ e ngɔ mo ngɔ hi e sɛ ɔ nɔ, konɛ o ye matsɛ ngɛ e biɛ mi ɔ, a je e yi. Akɛnɛ o Mawu ɔ suɔ Israel, nɛ e suɔ kaa ma a nɛ hi si kɛ ya neneene he je ɔ, e wo mo tsɛ ngɛ a nɔ, konɛ o kojo, nɛ o ye dami sane.”

⁹ Enɛ ɔ se ɔ, Sheba manyɛ ɔ ke Matsɛ Salomo ní nɛ ɔmɛ nɛ e hɛɛ kɛ ba a: sika tsu nɛ jiɔmi ji kilo akpe eywiɛ kɛ se, tsopa kɛ e he via babauu, kɛ tɛ nɛ he jua wa. Tsopa kɛ e he via nɛ Sheba manyɛ ɔ ba ke Salomo ɔ, a nɛ eko hyɛ nɛ kɛ lɛ sɔ.

¹⁰ Hiram tsɔli ɔmɛ, kɛ Salomo tsɔli ɔmɛ nɛ ngɔ sika tsu kɛ je Ofir kɛ ba a, ngɔ tsohi, kɛ tɛhi nɛ a he jua wa hu kɛ ba.

¹¹ Salomo kɛ tso ɔ eko pee kpokuhi ngɛ Yawɛ we ɔ, kɛ matsɛ we ɔ mi, nɛ e kɛ eko hu pee kpa sakuhi, kɛ bɛhi kɛ ha lali ɔmɛ. Tso ɔmɛ nɛ a ngɔ kɛ ba a, a nɛ a henɔ ko hyɛ ngɛ Yuda zugba a nɔ.

¹² Matsɛ Salomo ha Sheba manyɛ ɔ nɔ́ tsuaa nɔ́ nɛ e bi lɛ ɔ; slo níhi tsuo nɛ e kɛ to nike ní nɛ manyɛ ɔ ba ha lɛ ɔ nane mi. Pee se ɔ, manyɛ ɔ kɛ e tsɔli ɔmɛ kpale a se kɛ ho Sheba zugba a nɔ ya.

Matsɛ Salomo ní

¹³ Sika tsu nɛ baa Matsɛ Salomo dɛ mi daa jeha a, e jiɔmi maa pee kilo nyingmi enyɔ kɛ etɛ;

¹⁴ slo sika nɛ a tsuɔ ngɛ jua yeli a dɛ, kɛ se nami nɛ jeɔ jua yemi ní tsumi mi. Arabia matsɛmɛ ɔmɛ, kɛ Israel zugba a nɔ amlaalo ɔmɛ hu ngɔɔ sika hiɔ, kɛ sika tsu kɛ ba haa Salomo.

¹⁵ Matsɛ Salomo pee tsɛ̃i agboagbo lafa enyɔ, nɛ e kɛ sika tsu nɛ a fia nɔ, nɛ e jiɔmi maa pee kilo kpaago ha tsɛ̃i tsuaa tsɛ̃i he.

¹⁶ E ngɔ tsɛ̃i nɛ ɔmɛ tsuo ya to ngɛ Lebanon hue tsu ɔ mi.

¹⁷ Jehanɛ, Salomo kɛ suɔ wu pee matsɛ sɛ agbo ko, nɛ e kɛ sika tsu ngmingmiingmi ha he.

¹⁸ Matsɛ sɛ ɔ ngɛ kpoku ekpa nɛ a kuɔɔ kɛ yaa he. A kpɛ nɔ́ nɛ a kɛ nane maa nɔ kɛ wo kpoku ɔmɛ a he, nɛ a kɛ sika tsu ha he. A pee kɔni enyɔ ngɔ wo matsɛ sɛ ɔ he hiɛ kɛ hiɛ, nɛ jata enyɔ daa si ngɛ a he; jata kake ngɛ hiɛ, nɛ jata kake hu ngɛ hiɛ.

¹⁹ A puɛ jatahi nyɔngma kɛ enyɔ kɛ ma si ngɛ kpoku ekpa amɛ a nya hiɛ kɛ hiɛ; jata kake ngɛ kpoku kake nya hiɛ, nɛ jata kake hu ngɛ kpoku kake nya hiɛ. A pee we matsɛ sɛ nɛ ɔ eko hyɛ ngɛ matsɛ yemi he kpa ko.

²⁰ Matsɛ Salomo nyu numi kpluhi tsuo ɔ, sika tsu a kɛ pee mɛ. Níhi nɛ ngɛ Lebanon hue tsu ɔ mi hu sika tsu ngmingmiingmi sɔuu lɛ a kɛ pee mɛ; sika hiɔ be mi, ejakaa a bui sika hiɔ he akɔtaa ngɛ Salomo be ɔ mi.

²¹ Matsɛ Salomo ngɛ jua yemi lɛhi nɛ yaa Spania. Hiram tsɔli ji nihi nɛ tsuɔ ní ngɛ lɛ ɔmɛ a mi. Daa jeha etɛ ɔ, Salomo lɛ ɔmɛ ngɔɔ sika tsu, sika hiɔ, suɔ wu, siato, kɛ anguɛ kɛ baa we.

²² Matsɛ Salomo na ní, nɛ e le ní pe je nɛ ɔ mi matsɛmɛ ɔmɛ tsuo.

²³ Zugba a nɔ matsɛmɛ ɔmɛ tsuo hlaa kaa a maa ba Salomo ngɔ nɛ a ba bu nile nɛ Mawu kɛ dloo lɛ ɔ tue.

²⁴ Nɔ tsuaa nɔ kɛ nike ní nɛ ɔmɛ ba haa Salomo: sika hiɔ, sika tsu níhi, tade, ta hwumi níhi, tsopa kɛ e he via, okpɔngɔ, kɛ teji okpɔngɔ. A peeɔ nɔ́ nɛ ɔ daa jeha.

²⁵ Jehanɛ, Matsɛ Salomo ngɛ okpɔngɔhi a tsu akpe eywiɛ kɛ ha e ta zugba lɛ ɔmɛ, kɛ okpɔngɔ ɔmɛ. E ngɛ ta okpɔngɔhi hu akpe nyɔngma kɛ enyɔ. Ta okpɔngɔ ɔmɛ ekomɛ ngɛ e ngɔ ngɛ Yerusalem, nɛ e ngɔ ekomɛ hu ya to ma kpa komɛ a mi.

²⁶ Salomo ye matsɛmɛ ɔmɛ tsuo a nɔ, kɛ je Yufrate pa a nya kɛ ya si Filisti bi ɔmɛ a zugba a nɔ, kɛ Egipt huzu ɔ nya.

²⁷ Salomo yi nɔ ɔ, a pee we sika hiɔ, kɛ seda a he nɔ́ ko ngɛ Yerusalem; sika hiɔ ngɛ kaa tɛ, nɛ seda tso hu pɔ he kaa sikamore tso.

²⁸ A kɛ okpɔngɔhi jeɔ Egipt kɛ zugbahi tsuo a nɔ ba haa Salomo.

Salomo matsɛ yemi he sane kuku

²⁹ Salomo he sane kpahi nɛ piɛ, kɛ je sisije kɛ ya si nyagbe ɔ, a ngma ngɛ blema sanehi womi nɛ ɔmɛ a mi: gbalɔ Natan he sane, Ahiya nɛ je Shilo ɔ gbami ɔ, kɛ gbalɔ Ido nina amɛ nɛ kɔɔ Israel matsɛ, Yeroboam hu tsɛ yemi he.

³⁰ Salomo hi Yerusalem nɛ e kɛ ye Israel tsuo nɔ matsɛ jeha nyingmi eywiɛ.

³¹ Salomo ba gbo, nɛ a pu lɛ ngɛ David ma a mi, nɛ e binyumu Rehoboam ba ye tsɛ ngɛ e se.