Kronika II, 8 - BAIBLO ALOO NGMAMI KLƆUKLƆU Ɔ

Níhi nɛ Salomo tsu

¹ Salomo kɛ jeha nyingmi enyɔ ma Yawɛ we ɔ, kɛ matsɛ we ɔ.

² Jehanɛ, e dla mahi nɛ Matsɛ Hiram ha lɛ ɔ, nɛ e ha Israel bi komɛ ya hi a mi.

³ Salomo ya ngɔ Hamat kɛ Zoba zugba a pani nya,

⁴ nɛ e fia gbogbo ngɔ wo ma a nɛ a tsɛɛ Palmira a he ngɛ nga a nɔ. Mahi tsuo nɛ ngɛ Hamat nɛ a toɔ ní ngɛ a mi ɔ, Salomo dla po jamɛ a ma amɛ ehe.

⁵ E po ma nɛ ɔmɛ hu ehe: Bet Horon nɛ ngɛ yiti je ɔ, kɛ Bet Horon nɛ ngɛ sisi je ɔ. E fia gbogbo ngɔ wo ma nɛ ɔmɛ a he, nɛ e wo a nya agbohi kɛ a se lami dade.

⁶ Ma kpahi nɛ Salomo dla po ji Baalat, mahi tsuo nɛ e toɔ ní ngɛ a mi ɔ, kɛ mahi he nɛmɛ nɛ e we okpɔngɔ ɔmɛ, kɛ ta zugba lɛ ɔmɛ ngɛ ɔ. E po mahi bɔ nɛ e suɔ ngɛ Yerusalem, kɛ Lebanon, kɛ e nɔ yemi he kpa amɛ.

^7-8 Benɛ Israel bi ɔmɛ ya ngɔ Kanaan zugba a, Kanaan bi nɛ piɛ ngɛ lejɛ ɔ nɛ Israel bi ɔmɛ gbi mɛ ɔ ji nihi nɛ Matsɛ Salomo nyɛ a nɔ kɛ tsu ní tsumi kpakpataahi. Mɛ ji Hit bi, Amor bi, Periz bi, Hiv bi, kɛ Yebus bi; nɛ a nina ngɛ nyɔguɛ yee kɛ ba si mwɔnɛ ligbi nɛ ɔ.

⁹ Israel bi ɔmɛ nitsɛmɛ lɛɛ Salomo ngɔɛ a ti nɔ ko nɔ ko kɛ pee we nyɔguɛ; mɛɛ a tsu ní kaa e ta buli tsɔli, asafoatsɛmɛ, ta zugba lɛ nyatsɛmɛ, kɛ okpɔngɔ nɔ hili.

¹⁰ Matsɛ Salomo tsɔli nikɔtɔmahi nɛ ngɛ ní tsumi ɔmɛ a nya, nɛ a hyɛɛ ní tsumi slɔɔto ɔmɛ a nɔ ɔ, a hiɛmi ji lafa enyɔ kɛ nyingmi enuɔ.

¹¹ Salomo klɛ̃ e yo, Egipt matsɛ biyo ɔ kɛ je David ma a mi kɛ ho we ko nɛ e po ha lɛ ɔ mi ya. Salomo de ke, “E sɛ́ kaa ye yo ɔ hii Israel matsɛ, David we ɔ mi; ejakaa he tsuaa he nɛ Yawɛ somi daka a ba a, lejɛ ɔ peeɔ klɔuklɔu.”

¹² Enɛ ɔ se ɔ, Salomo sã bɔhi kɛ ha Yawɛ ngɛ bɔ sami la tɛ ɔ nɛ e ma ngɛ Yawɛ we ɔ hɛ mi ɔ nɔ.

¹³ E sã sami bɔhi, kaa bɔ nɛ Mose mlaa a tsɔɔ kaa a pee nyami be ɔmɛ, Hejɔɔmi ligbihi, Nyɔhiɔhe nyami behi, kɛ nyami be etɛ ɔmɛ nɛ a yeɔ ngɛ jeha mi ɔ. Mɛ ji Abolokplolo nyami be, Ngmakpami nyami be, kɛ Gbasisihimi nyami be.

¹⁴ Blɔ nya nɛ Salomo tsɛ, David to kɛ fɔ si ɔ, Salomo hyɛ jamɛ a blɔ nya tomi ɔ nɔ kɛ dla ní tsumi kɛ ha osɔfo ɔmɛ. E ngɔ Levi bi ɔmɛ a ní tsumi hu ngɔ wo a dɛ; mɛɛ a ní tsumi ji kaa a la kɛ je Yawɛ yi, nɛ a piɛ osɔfo ɔmɛ a he kɛ tsu a daa ligbi ní tsumi ɔmɛ. Jehanɛ, Yawɛ we ɔ agbo nya buli ɔmɛ hu Salomo dla mɛ ngɔ wo kuuhi a mi kɛ ha agbo slɔɔto ɔmɛ a nya bumi kaa bɔ nɛ Mawu nɔmlɔ, David fa ke a pee ɔ.

¹⁵ Mlaahi nɛ David wo osɔfo ɔmɛ, kɛ Levi bi ɔmɛ, nɛ kɔɔ nito hehi, kɛ ní kpa komɛ a he ɔ, a ye a nɔ sisiisi.

¹⁶ Jehanɛ lɛɛ Salomo gbe e ní tsumi ɔmɛ tsuo a nya, kɛ je be nɛ a to Yawɛ we ɔ sisi kɛ ya si a ma lɛ kɛ gbe nya. A gbe ní tsumi ɔ tsuo nya kɛ manye.

¹⁷ Pee se ɔ, Salomo pue nɔ kɛ ho wo nya ma enyɔ komɛ a mi ya ngɛ Edom zugba a nɔ. Ma kake biɛ ji Eziongeber, nɛ kake hu biɛ ji Elat.

¹⁸ Matsɛ Hiram wo lɛ komɛ blɔ kɛ mane Salomo. Hiram nitsɛ we akua hluili nɛ a kɔni si wa hlui lɛ ɔmɛ; lɛ nɔuu e tsɔli ji ni nɛmɛ nɛ hyɛ a nɔ kɛ ya. A kɛ Salomo tsɔli ɔmɛ hlui lɛ kɛ ya Ofir zugba a nɔ, nɛ a ya ngɔ sika tsu kilo akpe nyɔngma kɛ enuɔ kɛ se ngɛ lejɛ ɔ kɛ ba ha Matsɛ Salomo.