Kronika II, 6 - BAIBLO ALOO NGMAMI KLƆUKLƆU Ɔ

Salomo kɛ ma a tu munyu

¹ Kɛkɛ nɛ Salomo sɔle ke, “Yawɛ, o ke o maa hi diblii kpii mi.

² Jehanɛ lɛɛ i po we saminyayoo ko ha mo nɛ o hi lejɛ ɔ kɛ ya neneene.”

³ Israel ma kpekpemi ɔ tsuo daa si ngɛ lejɛ ɔ kɛ mwɔɔ. Kɛkɛ nɛ Matsɛ Salomo plɛ e hɛ mi ngɔ kpee mɛ, nɛ e gbaa mɛ.

⁴ E de ke, “A je Yawɛ, Israel Mawu ɔ yi; ejakaa si ko nɛ e wo tsaatsɛ David ɔ, e ye nɔ. Yawɛ de David ke,

⁵ ‘Kɛ je be nɛ i jé ye ma Israel kɛ je Egipt ɔ, i hla we ma ko ma ko kɛ ji Israel wɛtso ko mi nɛ a po we ha mi, nɛ a ja mi ngɛ lejɛ ɔ; nɛ i hla we nɔ ko nɔ ko nɛ ba ye ganɔ ngɛ ye ma Israel ɔ nɔ.

⁶ Se jehanɛ lɛɛ i hla Yerusalem, konɛ a ja mi ngɛ lejɛ ɔ; i hla mo David hulɔ, nɛ o ye ye ma Israel ɔ nɔ.’ ”

⁷ Salomo ya nɔ nɛ e de ke, “Jinɛ tsaatsɛ David to kaa e maa po we nɛ a ja Yawɛ, Israel Mawu ɔ ngɛ mi,

⁸ se Yawɛ de lɛ ke, ‘O pee saminya kaa o to o yi mi kaa o maa po we ha mi.

⁹ Se kɛ̃ ɔ, tsa pi mo nɛ o maa po we ɔ; mo nitsɛ o bi lɛ ma ba po we ɔ ha mi.’

¹⁰ “Amlɔ nɛ ɔ, Yawɛ ye e siwo ɔ nɔ. Kaa bɔ nɛ e de to ɔ, i ba ngɛ tsɛ yee ngɛ tsaatsɛ David se, nɛ we ɔ, he nɛ a ma ja Yawɛ, Israel Mawu ɔ ngɛ ɔ, i po.

¹¹ I ngɔ somi daka a kɛ ma Yawɛ we ɔ mi. Somi nɛ Yawɛ kɛ e ma Israel so ɔ ngɛ daka nɛ ɔ mi.”

Salomo fa kue ha Yawɛ

¹² Jehanɛ benɛ Israel ma kpekpemi ɔ tsuo ngɛ Salomo hyɛe ɔ, e ho ya da bɔ sami la tɛ ɔ hɛ mi, nɛ e wo e nine nɔ kɛ ya hiɔwe, nɛ e sɔle.

¹³ (Salomo pee akɔblee kpoku ko nɛ a maa da nɔ kɛ ma kue ɔ kpɛti tutuutu. E kami ji nine mi blimi nyɔngma, e blimi ji nine mi blimi nyɔngma, nɛ e hiɔwe yami ji nine mi blimi ekpa. Salomo kuɔ kpoku nɛ ɔ, nɛ e kpla si ngɛ Israel ma kpekpemi ɔ tsuo a hɛ mi, nɛ e wo e nine nɔ kɛ ya hiɔwe.)

¹⁴ E sɔle ke, “Yawɛ, Israel Mawu lee, mawu ko mawu ko be hiɔwe, loo zugba nɛ ngɛ kaa mo! Somi nɛ o kɛ o ma a so ɔ, o yeɔ nɔ; nɛ ke a bu mo tue kɛ a tsui tsuo ɔ, o jeɔ o suɔmi nɛ se pui ɔ kpo ngɔ tsɔɔ mɛ.

¹⁵ Si ko nɛ o wo tsaatsɛ David ɔ, o ye nɔ; nɛ mwɔnɛ ɔ, nɔ́ tsuaa nɔ́ nɛ o de to ɔ ba mi.

¹⁶ Lɔ ɔ he ɔ, Yawɛ, Israel Mawu lee, i kpa mo pɛɛ, si nɛ o wo tsaatsɛ, benɛ o de lɛ ke, ke e binyumu ɔmɛ maa ye o mlaa a nɔ sisiisi kaa bɔ nɛ e pee ɔ, a maa ye tsɛ ngɛ Israel kɛ maa ya neneene ɔ, ha jamɛ a siwo ɔ hu nɛ ba mi.

¹⁷ Yawɛ, Israel Mawu lee, i kpa mo pɛɛ, níhi tsuo nɛ o de o tsɔlɔ David ɔ, ha nɛ a ba mi.

¹⁸ “Se anɛ mo Mawu, o kɛ nɔmlɔ adesa ma nyɛ maa hi zugba nɛ ɔ nɔ niinɛ lo? Mo, nɛ hiɔwe kɛ hiɔwe se lokoo po kpi mo ɔ, kɛ maa pee kɛɛ nɛ we nɛ i po nɛ ɔ maa kpe mo?

¹⁹ Yawɛ, ye Mawu lee, o tsɔlɔ ji mi. I kpa mo pɛɛ nɛ o bu ye kue fami ɔ tue, nɛ níhi nɛ i ngɛ mo bie mwɔnɛ nɛ ɔ, o pee ha mi.

²⁰ Bu we nɛ ɔ he nyɔ kɛ pia. O wo si kaa hiɛmɛ nɛ ɔ ji he nɛ a ma ja mo ngɛ. Lɔ ɔ he ɔ, ke i plɛ ye hɛ mi ngɔ kpee we nɛ ɔ nɛ i fa kue ha mo ɔ, moo bu mi tue.

²¹ Ke imi, o tsɔlɔ ɔ, aloo o ma Israel ba hiɛmɛ nɛ ɔ ba fa kue ha mo ɔ, o nu ngɛ o hi he ɔ ngɛ hiɔwe, nɛ o ngɔ wa he yayami ngɔ pa wɔ.

²² “Ke a po nɔ ko nya kaa e tɔ e nyɛmi nɔ, nɛ a kɛ lɛ ba da o bɔ sami la tɛ ɔ hɛ mi ngɛ we nɛ ɔ mi, nɛ a ke e ka kita kɛ tsɔɔ kaa e pee we yayami ko ɔ,

²³ Yawɛ lee, moo bu tue ngɛ hiɔwe, nɛ o kojo o tsɔli ɔmɛ. Nɔ nɛ ye fɔ ɔ, gbla e tue bɔ nɛ sa lɛ; se nɔ nɛ pee we yayami ko ɔ lɛɛ o wo lɛ nguɔ.

²⁴ “Ke o ma Israel he nyɛli ba ye a nɔ ngɛ yayami ko nɛ a pee kɛ si mo ɔ he, nɛ a pia a he, nɛ a ba we nɛ ɔ mi nɛ a ba kpa mo pɛɛ kɛ he si bami ɔ,

²⁵ moo bu tue ngɛ hiɔwe. Ngɔɔ yayami nɛ o ma a pee ɔ ngɔ pa mɛ, nɛ o kpale mɛ kɛ ba zugba a nɛ o ngɔ kɛ ha a nɛmɛ ɔmɛ ɔ nɔ ekohu.

²⁶ “Ke o tsi hiɔmi nya ngɛ yayami ko nɛ o ma Israel pee kɛ si mo ɔ he, nɛ pee se ɔ, a tsake a tsui nɛ a ba we nɛ ɔ mi ba kpa mo pɛɛ kɛ he si bami ɔ,

²⁷ Yawɛ lee, moo bu mɛ tue ngɛ hiɔwe, nɛ o ngɔ o tsɔli ɔmɛ, nɛ ji Israel ma a a he yayami ɔmɛ ngɔ pa mɛ. Tsɔɔ mɛ nɛ a pee nɔ́ nɛ da. Lɔ ɔ se ɔ, Yawɛ lee, ha nɛ hiɔmi nɛ nɛ ngɛ o zugba a nɛ o ngɔ ha o ma a kaa a weto ní kɛ yaa neneene ɔ nɔ.

²⁸ “Ke hwɔ, loo gbenɔ hiɔ, loo tsohi a he hiɔ, loo baalɛ ba zugba a nɔ, aloo ke he nyɛli ba sa o ma mi bi ɔmɛ a yi ngɔ wo a ma amɛ eko mi, haomi tsuaa haomi, aloo hiɔ tsuaa hiɔ nɛ ji ɔ,

²⁹ bu a kue fami ɔ tue. Ke o ma Israel bi ɔmɛ ba we nɛ ɔ mi kakaaka, loo kutuu, nɛ a ba wo a nine nɔ nɛ a fa kue ha mo kɛ je a tsui mi ɔ, bɔ tsuaa bɔ nɛ a hiami ní ɔmɛ ngɛ ɔ,

³⁰ moo nu a kue fami ɔ. Bu mɛ tue ngɛ o hi he ɔ ngɛ hiɔwe, nɛ o ngɔ a he yayami ɔmɛ ngɔ pa mɛ. Mo pɛ lɛ o le nɔmlɔ adesa tsui mi. Moo pee nɔ tsuaa nɔ hiami ní ha lɛ,

³¹ konɛ o ma mi bi ɔmɛ nɛ a ye mo gbeye nɛ a bu mo, ligbi abɔ nɛ a ngɛ zugba a nɛ o ngɔ kɛ ha wa nɛmɛ ɔmɛ ɔ nɔ ɔ.

³² “Ja kɛ̃, ke nubwɔ ko nɛ je ma se lokoo nu o biɛ, o he wami kpetekpleenyɛ ɔ, kɛ ní nguanguahi nɛ o peeɔ kɛ haa o ma Israel ɔ he, nɛ e ba konɛ e ba fa kue ha mo ngɛ we nɛ ɔ mi ɔ,

³³ moo nu e pɛɛ kpami ɔ ngɛ o hi he ɔ ngɛ hiɔwe, nɛ o pee nɔ́ nɛ e ngɛ hlae ɔ ha lɛ, konɛ nimli tsuo nɛ ngɛ je ɔ mi ɔ nɛ a le mo, nɛ a bu mo kaa bɔ nɛ o ma, Israel buu mo ɔ. Kɛkɛ ɔ, a maa le kaa we nɛ ɔ nɛ i po ɔ, o biɛ ngɛ he.

³⁴ “Ke o fa o ma a ke a kɛ a he nyɛli ya hwu, nɛ a plɛ a hɛ mi ngɔ kpee ma nɛ o hla ngɔ to nɛ ɔ, kɛ we nɛ i po ngɔ ha mo nɛ ɔ, nɛ a fa kue ha mo ɔ,

³⁵ bu mɛ tue. Moo nu ngɛ hiɔwe, nɛ o ha nɛ a ye kunimi.

³⁶ “Nɔ ko nɔ ko be nɛ pee we yayami. Lɔ ɔ he ɔ, Yawɛ lee, ke e ba mi kaa o ma a pee yayami kɛ si mo, nɛ o mi mi fu mɛ nɛ o ngɔ mɛ ngɔ wo a he nyɛli a dɛ mi, nɛ he nyɛli ɔmɛ ngɔ mɛ nyɔguɛ kɛ ho a zugba nɔ ya, lejɛ ɔ kɛ jio, e kɛ we jio,

³⁷ bu o ma mi bi ɔmɛ a kue fami ɔ tue. Ke benɛ a ngɛ jamɛ a zugba a nɔ ɔ, a pia a he, nɛ a tsake a tsui, nɛ a jaje kaa a pee yayami, kɛ yi wu tso níhi ɔ, bu a kue fami ɔ tue.

³⁸ Ke a tsake a tsui niinɛ ngɛ jamɛ a zugba a nɔ, nɛ a plɛ a hɛ mi ngɔ kpee zugba nɛ ɔ nɛ o ngɔ ha wa nɛmɛ ɔmɛ, kɛ ma nɛ ɔ nɛ o hla ngɔ to, kɛ we nɛ ɔ nɛ i po ngɔ ha mo ɔ, nɛ a fa kue ha mo ɔ,

³⁹ bu a kue fami ɔ tue. Moo nu ngɛ o hi he ɔ ngɛ hiɔwe, nɛ o na mɛ mɔbɔ, nɛ o ngɔ o ma a he yayami ɔmɛ ngɔ pa mɛ.

⁴⁰ “Ye Mawu lee, i kpa mo pɛɛ nɛ o ba o tue si ha wɔ nɛ o hyɛ wɔ, konɛ ke nɔ ko ba fa kue ha mo ngɛ hiɛmɛ nɛ ɔ, o bu tue.

⁴¹ Yawɛ Mawu, jehanɛ lɛɛ moo te si nɛ o ba sɛ o we ɔ mi, he nɛ somi daka a nɛ tsɔɔ o he wami ɔ ngɛ ɔ. Moo gbaa o we osɔfo ɔmɛ kɛ yi wami hemi, konɛ nihi nɛ yeɔ mo anɔkuale ɔ nɛ a na bua jɔmi ngɛ ní kpakpahi nɛ o peeɔ kɛ haa mɛ ɔ a he.

⁴² Yawɛ Mawu, matsɛ ɔ nɛ o pɔ lɛ nu ɔ, koo je e se. Mo kai suɔmi nɛ o ngɛ kɛ ha o tsɔlɔ David ɔ.”