Kronika II, 5 - BAIBLO ALOO NGMAMI KLƆUKLƆU Ɔ

¹ Benɛ Matsɛ Salomo gbe Yawɛ we ɔ he ní tsumi ɔ tsuo nya a, e ngɔ níhi tsuo nɛ e tsɛ David gbaa nɔ ngɔ ha Yawɛ ɔ ngɔ to nito hehi ngɛ lejɛ ɔ. Ní ɔmɛ ji sika hiɔ, sika tsu, kɛ ní kpa komɛ.

A ngɔ somi daka a kɛ ba Yawɛ we ɔ mi

² Enɛ ɔ se ɔ, Matsɛ Salomo ya kpee Israel ma nimeli ɔmɛ, kɛ wɛtsoyi ɔmɛ tsuo kɛ ba e ngɔ ngɛ Yerusalem, konɛ a ya ngɔ Yawɛ somi daka a kɛ je Zion, David ma a mi kɛ ba Yawɛ we ɔ mi.

³ Mɛ tsuo a ba bua a he nya ngɛ Gbasisihimi nyami be ɔ nɔ.

⁴ Benɛ Israel ma nimeli ɔmɛ tsuo ba bua a he nya a, osɔfo ɔmɛ ba wo somi daka a nɔ,

⁵ nɛ a hɛɛ kɛ ho Yawɛ we ɔ mi ya. Osɔfo ɔmɛ, kɛ Levi bi ɔmɛ hɛɛ kpe he bo tsu ɔ, kɛ ní klɔuklɔu ɔmɛ nɛ ngɛ mi ɔ hulɔ kɛ ho Yawɛ we ɔ mi ya.

⁶ Jehanɛ, Matsɛ Salomo kɛ Israel ma kpekpemi ɔ tsuo ya bua a he nya ngɛ somi daka a hɛ mi, nɛ a gbe to kɛ na babauu nɛ a li nya kɛ sã bɔ.

⁷ Enɛ ɔ se ɔ, osɔfo ɔmɛ ngɔ somi daka a ya ma e blɔ he ngɛ he klɔuklɔu pe kulaa a, ngɛ kerub ɔmɛ a pɛli ɔmɛ a sisi.

⁸ Kerub ɔmɛ gbɛ a pɛlihi a mi kɛ ha daka a, kɛ tsohi nɛ a kɛ hɛɛ daka a a he.

⁹ Tso ɔmɛ ka gagaa bɔ nɛ ke nɔ ko daa si ngɛ he klɔuklɔu pe kulaa a hɛ mi ɔ, e maa na a nya amɛ nɛ je kpo; se a nya amɛ ji kpo ngɛ kpo nɔ je. Tso ɔmɛ ngɛ lejɛ ɔ kɛ ba si mwɔnɛ ligbi nɛ ɔ.

¹⁰ Nɔ́ ko nɔ́ ko be somi daka a mi, kaa ja tɛ tɛtlɛɛ enyɔ ɔmɛ nɛ Mose ngɔ to lejɛ ɔ ngɛ Sinai yo ɔ nɔ ɔ. Yawɛ kɛ Israel ma a so somi ngɛ Sinai, be mi nɛ a je Egipt zugba a nɔ kɛ ma a.

Yawɛ hɛ mi nyami ɔ

^11-14 Osɔfo ɔmɛ tsuo nɛ ba bua a he nya a tsu a he, tsa pi ngɛ a kuu ɔmɛ a mi kɛkɛ. Levi bi, ni nɛmɛ nɛ ji lali ɔmɛ tsuo bu kploba saminyawiiwi. Mɛ ji Asaf, Heman, kɛ Yedutun, kɛ a bimɛ, kɛ a nyɛmimɛ. Levi bi ɔmɛ ya da si ngɛ bɔ sami la tɛ ɔ beleku je kɛ a dɛ mi ngmlɛhi, bɛhi, kɛ sakuhi. Osɔfohi lafa kɛ nyingmi enyɔ piɛ a he ngɛ lejɛ ɔ, nɛ mɛɛ lɛɛ a ngɛ titimati kpae. Titimati kpali ɔmɛ, ngmlɛ fiali ɔmɛ, kɛ saku fiali ɔmɛ piɛ lali ɔmɛ a he, nɛ mɛ tsuo a nya sɔ kɛ wo la a nɔ. A la kɛ je Yawɛ yi ke, “A je Yawɛ yi, ejakaa e hi, ejakaa e suɔmi ɔ ngɛ kɛ yaa neneene.” Benɛ osɔfo ɔmɛ ngɛ kpo jee ngɛ Yawɛ we ɔ mi ɔ, bɔku ba ha lejɛ ɔ tlukaa. Bɔku nɛ ɔ ngɛ kpɛe kaa Yawɛ hɛ mi nyami; enɛ ɔ he je ɔ, osɔfo ɔmɛ nyɛ we nɛ a kpale kɛ ya lejɛ ɔ nɛ a ya tsu ní.