Kronika II, 4 - BAIBLO ALOO NGMAMI KLƆUKLƆU Ɔ

Yawɛ we ɔ mi níhi

¹ Matsɛ Salomo ha nɛ a pee akɔblee bɔ sami la tɛ; e kami ji gugue enuɔ, e blimi ji gugue enuɔ, nɛ e hiɔwe yami ji gugue enyɔ kɛ fa.

² Jehanɛ, e pee akɔblee nyu nɔ́ ko; e ngɛ kokloo, nɛ e mi kuɔmi ji nine mi blimi nyɔngma. Kɛ je e nya hiɛ kɛ ya si hiɛ ɔ, e peeɔ gugue enyɔ kɛ fa, nɛ kpa nɛ kami ji gugue kpaago kɛ fa maa kpe he.

³ A pee akɔblee tɔhi gbaka enyɔ kɛ bɔle nyu nɔ́ ɔ kuɔ si kɛ kpe; a sile akɔblee kɛ pee a kɛ nyu nɔ́ ɔ tsuo kake.

⁴ Nyu nɔ́ ɔ maa si ngɛ akɔblee na nyɔngma kɛ enyɔ a nɔ; etɛ plɛ a hɛ mi ngɔ kpee omleyi je, etɛ plɛ a hɛ mi ngɔ kpee bonyoku je, etɛ plɛ a hɛ mi ngɔ kpee leneyi je, nɛ etɛ hu plɛ a hɛ mi ngɔ kpee beleku je. Mɛ tsuo a plɛ a se ngɔ wo nyu nɔ́ ɔ.

⁵ Nyu nɔ́ ɔ timi ngɛ kaa dɛ mi blimi. A pee e nya kaa bɔ nɛ kplu nya ngɛ ɔ, kaa mɔmɔ nɛ blɛke; nɛ nyu maa pee buɛ akpe etɛ lɛ yaa mi.

⁶ Jehanɛ, a pee akɔblee kã nyɔngma; a kɛ enuɔ ma Yawɛ we ɔ leneyi je, nɛ a kɛ enuɔ ma omleyi je. A pee akɔblee kã nɛ ɔmɛ, nɛ́ a fɔ lohwe ɔmɛ nɛ a kɛ ba sã sami bɔ ɔ a he, nɛ a jale a he ngɛ a mi. Nyu ɔ nɛ ngɛ nyu nɔ́ agbo ɔ mi ɔ lɛɛ osɔfo ɔmɛ kɛ ma fɔ a he.

⁷ Jehanɛ, a pee sika tsu kane tso nyɔngma kaa bɔ nɛ a tsɔɔ ke a pee ɔ, nɛ a kɛ ma Yawɛ we ɔ; enuɔ ngɛ hiɔ nɔ, nɛ enuɔ ngɛ muɔ nɔ.

⁸ A kpɛ okplɔɔ nyɔngma kɛ ma Yawɛ we ɔ mi; enuɔ ngɛ hiɔ nɔ, nɛ enuɔ ngɛ muɔ nɔ. A pee sika tsu kã lafa hulɔ.

⁹ A pee kue kɛ ha osɔfo ɔmɛ, kɛ kue ngua a. A kpɛ sinya kɛ wo kue ɔmɛ a nya, nɛ a kɛ akɔblee ha sinya amɛ a he.

¹⁰ A kɛ nyu nɔ́ ɔ ma Yawɛ we ɔ leneyi je kɛ beleku je a kpɛti kɔ nya he ko.

^11-16 Jehanɛ, Huram pee buɛhi, sofihi, kɛ kãhi. Mawu we ɔ he ní tsumi nɛ Matsɛ Salomo ha lɛ tsumi ɔ, e gbe lɛ tsuo nya. Níhi nɛ e pee ɔ ji nɛ ɔmɛ nɛ: Akɔblee titima enyɔ ɔmɛ Akɔblee kpɔ enyɔ ɔmɛ nɛ ma titima amɛ a yi mi ɔ Ya enyɔ ɔmɛ nɛ a lo kɛ mɔmɔ nɛ a pee kaa kɔsɔkɔsɔ ngɔ ma titima enyɔ ɔmɛ a yi mi ɔ Akɔblee kpɔ kokloohi kaa tso yiblii lafa eywiɛ nɛ a pee ngɔ wo kla enyɔɔnyɔ a mi kɛ bɔle kpɔ ɔmɛ ɔ Tlɔɔke nyɔngma amɛ Kã nyɔngma amɛ Nyu nɔ́ ɔ Akɔblee na ku nyɔngma kɛ enyɔ ɔmɛ nɛ nyu nɔ́ ɔ maa si ngɛ a nɔ ɔ Buɛ ɔmɛ, sofi ɔmɛ, kɛ faka amɛ. Yawɛ we ɔ he ní nɛ ɔmɛ tsuo nɛ Huram pee ha Matsɛ Salomo ɔ, akɔblee nɛ a sa he lɛ a kɛ pee.

¹⁷ Matsɛ ɔ ha nɛ a sɔ ní nɛ ɔmɛ ngɛ akɔblee galɔ ní tsumi he ɔ nɛ ngɛ Sukot kɛ Zereda a kpɛti ngɛ Yordan kɔ̃ ɔ mi ɔ.

¹⁸ Ní ɔmɛ nɛ a pee ɔ hiɛ babauu nitsɛ nɛ nɔ ko li akɔblee nɛ a kɛ pee mɛ ɔ nya.

¹⁹ Matsɛ Salomo ha a kɛ sika tsu pee ní nɛ ɔmɛ hulɔ kɛ ma Yawɛ we ɔ mi: bɔ sami la tɛ ɔ, okplɔɔ ɔ nɛ a kɛ abolo klɛdɛɛ ɔ maa nɔ ngɛ Yawɛ hɛ mi ɔ;

²⁰ kane tso ɔmɛ, kɛ kane ɔmɛ nɛ a kɛ sika tsu ngmingmiingmi pee, nɛ a maa su kɛ ma he klɔuklɔu pe kulaa a hɛ mi kaa bɔ nɛ a tsɔɔ ɔ,

²¹ mɔmɔ ɔmɛ, kane ɔmɛ, abɛɛle ɔmɛ,

²² la gbemi ní ɔmɛ, kã amɛ, ngɛyu ɔmɛ nɛ a kɛ tsopa kɛ e he via woɔ a mi ɔ, kɛ ngɛyu ɔmɛ nɛ a kɛ jeɔ la a. A kɛ sika tsu ngmingmiingmi pee ní nɛ ɔmɛ tsuo. A kɛ sika tsu ha Yawɛ we ɔ kpo nɔ je sinya amɛ, kɛ he klɔuklɔu pe kulaa a sinya amɛ a he.