Kronika II, 36 - BAIBLO ALOO NGMAMI KLƆUKLƆU Ɔ

Yuda matsɛ, Yehoahaz

¹ Yuda ma a hla Yosia binyumu Yehoahaz, nɛ a pɔ lɛ nu, nɛ a wo lɛ matsɛ ngɛ Yerusalem.

² Yehoahaz ye jeha nyingmi enyɔ kɛ etɛ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ nyɔhiɔ etɛ.

³ Egipt matsɛ, Neko kpa lɛ matsɛ yemi ngɛ Yerusalem, nɛ e tsu tó sika hiɔ nɛ jiimi ji kilo akpe etɛ kɛ e nya lafa eywiɛ, kɛ sika tsu nɛ jiimi ji kilo nyingmi etɛ kɛ eywiɛ ngɛ Yuda ma a dɛ.

⁴ Neko wo Yehoahaz nyɛminyumu Eliakim matsɛ ngɛ Yuda ma a nɔ, nɛ e tsake e biɛ Eliakim ɔ kɛ pee Yehoyakim. Se e nyɛmi Yehoahaz ɔ lɛɛ Neko ngɔ lɛ kɛ ho Egipt ya.

Yuda matsɛ, Yehoyakim

⁵ Yehoyakim ye jeha nyingmi enyɔ kɛ enuɔ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyɔngma kɛ kake. E pee yayami kɛ si Yawɛ, e Mawu ɔ.

⁶ Benɛ Yehoyakim ngɛ matsɛ yee ɔ, Babilonia matsɛ, Nebukadnezar hia ta ba tua Yuda, nɛ e nu Yehoyakim kɛ ho Babilonia ya, ngɛ pã mi.

⁷ Nebukadnezar muɔ june nɛ ngɛ Yawɛ we ɔ eko kɛ ho, nɛ e kɛ ya to e we mi ngɛ Babilon.

⁸ Yehoyakim he sane kpahi, musu nɛ e bɔ, kɛ yayami nɛ e pee ɔ, a ngma ngɛ Israel kɛ Yuda Matsɛmɛ ɔmɛ a Blema Sanehi Womi ɔ mi. Yehoyakim bi Yehoyakin ba ye matsɛ ngɛ e se.

Yuda matsɛ, Yehoyakin

⁹ Yehoyakin ye jeha nyɔngma kɛ kpaanyɔ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ nyɔhiɔ etɛ kɛ ligbi nyɔngma. Lɛ hu e pee yayami kɛ si Yawɛ.

¹⁰ Benɛ jeha su ɔ, Matsɛ Nebukadnezar tsɔ nɛ a ba ngɔ lɛ kɛ ho Babilonia ya; a muɔ Yawɛ we ɔ mi june ɔmɛ hu kɛ je. Nebukadnezar wo Yehoyakin nyɛminyumu Zedekia matsɛ ngɛ Yuda, kɛ Yerusalem a nɔ.

Yuda matsɛ, Zedekia

¹¹ Zedekia ye jeha nyingmi enyɔ kɛ kake benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyɔngma kɛ kake.

¹² E pee yayami kɛ si Yawɛ, e Mawu ɔ, nɛ e bɛ e he si ngɔ ha gbalɔ Yeremia, nɔ nɛ ngɔɔ Yawɛ sɛ gbi ba haa lɛ ɔ.

Yerusalem hɛ mi kpatami

¹³ Babilonia matsɛ, Nebukadnezar nɛ ha Zedekia kɛ Mawu biɛ ka lɛ kita ke e maa bu lɛ ɔ, lɛ hu Zedekia tsɔ atuã kɛ wo lɛ. Zedekia wa tue; e tsakee we e tsui, nɛ e kpale we kɛ ba nyɛɛ Yawɛ, Israel Mawu ɔ se.

¹⁴ Jehanɛ se hu, Yuda ma nimeli ɔmɛ, osɔfo ɔmɛ, kɛ ma a tsuo pee yayami kɛ si Yawɛ. A ya sɔmɔ je ma amɛ nɛ bɔle mɛ ɔ a mawu ɔmɛ, nɛ a kɛ nɔ́ nɛ ɔ ble Yawɛ we ɔ nɛ lɛ Yawɛ ɔ nitsɛ pee klɔuklɔu ngɛ Yerusalem ɔ.

¹⁵ Se kɛ̃ ɔ, Yawɛ, a nɛmɛ a Mawu ɔ ngmɛɛ we e ma a he. Daa nɛ ɔ, e tsɔɔ e gbali ɔmɛ nɛ a ya bɔɔ mɛ kɔkɔ, ejakaa e sume kaa e ma a, loo Yerusalem hɛ mi nɛ kpata.

¹⁶ Se mɛɛ lɛɛ, Mawu tsɔli ɔmɛ a he fɛu mohu a yeɔ; a bui Mawu munyu ɔ tue, nɛ e gbali ɔmɛ hu muɔ sɔuu a hii mɛ muɔe hluu kɛ ya si be nɛ Yawɛ mi mi ba fu e ma a wawɛɛ nitsɛ nɛ nɔ́ ko hi peemi ngɛ he hu.

¹⁷ Enɛ ɔ he je ɔ, Yawɛ ngɔ Babilonia matsɛ ɔ kɛ ba tua mɛ. Babilonia matsɛ ɔ kɛ klaate gbe Yuda nihewi ɔmɛ ngɛ Yawɛ we ɔ mi po. E nɛ́ nɔ ko nɔ ko mɔbɔ, jokuɛyo jio, nɔkɔtɔma jio, yo jio, nyumu jio, hiɔtsɛ jio, nɔ nɛ ngɛ he wami jio. Mawu ngɔ mɛ tsuo pɛpɛɛpɛ ngɔ wo e dɛ mi.

¹⁸ Babilonia matsɛ ɔ ha ní ngɛ Yawɛ we ɔ; e muɔ june ngɛ nito he ɔ, kɛ Matsɛ Zedekia, kɛ e ganɔ ɔmɛ hu a june kɛ ho Babilon ya.

¹⁹ E sã Yawɛ we ɔ, kɛ Yerusalem ma a kɛ e mi mɔ ɔmɛ; e kpata ní kpakpahi tsuo a hɛ mi, nɛ e ku Yerusalem gbogbo ɔ ngɔ pue si.

²⁰ Ni nɛmɛ nɛ a yi na wami ɔ, e muɔ mɛ kɛ ho Babilonia ya, nɛ a ya sɔmɔ lɛ, kɛ e nina hluu kɛ ya si be nɛ a to Persia matsɛ yemi ɔ sisi.

²¹ Lɔ ɔ he ɔ, nɔ́ nɛ Yawɛ de to kɛ gu gbalɔ Yeremia nɔ ɔ ba mi. Yawɛ lɛ de ke, “Zugba a maa fɔ si jeha nyingmi kpaago, konɛ Hejɔɔmi ligbi ɔmɛ nɛ a yi ɔ, a kɛ tsɔ.”

Sirus fa Yuda ma a ke a kpale kɛ ba

²² Benɛ Sirus ngɛ matsɛ yee ngɛ Persia a, jamɛ a kekleekle jeha a mi ɔ, Yawɛ ha nɛ nɔ́ ko nɛ e de to kɛ gu gbalɔ Yeremia nɔ ɔ ba mi. Yawɛ ha nɛ Sirus wo mlaa nɛ ɔ, nɛ a ngma ngɔ wo womi mi, nɛ e tsɔ ke a ya kane ngɛ e nɔ yemi he ɔmɛ tsuo, konɛ nɔ tsuaa nɔ nɛ nu. E ke,

²³ “Nɔ́ nɛ imi Persia matsɛ, Sirus, i ngɛ dee ji nɛ ɔ nɛ: ‘Yawɛ, hiɔwe Mawu ɔ tu je ma amɛ a matsɛ yemi ɔmɛ tsuo ngɔ wo ye dɛ mi; nɛ e fa mi ke ma ya po we ngɔ ha lɛ ngɛ Yerusalem ngɛ Yuda. Lɔ ɔ he ɔ, nyɛ ti nɔ tsuaa nɔ nɛ ngɛ Mawu blɔ fa mi ɔ, e ba be kɛ ho lejɛ ɔ ya. Yawɛ, nyɛ Mawu ɔ nɛ piɛ nyɛ he.’ ”