Kronika II, 35 - BAIBLO ALOO NGMAMI KLƆUKLƆU Ɔ

Yosia ye Hetsɔmi ɔ

¹ Matsɛ Yosia ye Hetsɔmi ɔ ngɛ Yerusalem kɛ wo Yawɛ hɛ mi nyami; a gbe lohwehi nɛ a kɛ maa ye nyami be ɔ ngɛ kekleekle nyɔhiɔ ɔ we ligbi nɛ ji nyɔngma kɛ eywiɛ ɔ nɔ.

² Yosia dla ní tsumi ngɔ ha osɔfo ɔmɛ, nɛ e wo mɛ he wami konɛ a tsu ní ɔ saminya.

³ Levi bi ɔmɛ nɛ a pee a he klɔuklɔu kɛ ha Yawɛ, nɛ mɛ lɛ a tsɔɔ Israel ma a ní ɔ, Yosia de mɛ ke, “Nyɛ wo somi daka klɔuklɔu ɔ kɛ ya ma Yawɛ we ɔ nɛ Israel matsɛ, David bi Salomo po ɔ. Jehanɛ lɛɛ nyɛ be somi daka a hɛɛe kɛ ya kɛ ba hu; nyɛ ní tsumi ji nyɛ sɔmɔ Yawɛ, nyɛ Mawu ɔ, kɛ e ma Israel.

⁴ Nyɛ ya hi nyɛ blɔ hehi ngɛ Yawɛ we ɔ we puɔ nya we puɔ nya kaa bɔ nɛ Israel matsɛ, David kɛ e bi Salomo dla ní tsumi ɔmɛ ngɔ ha nyɛ ɔ.

⁵ Nyɛɛ hi he klɔuklɔu ɔ kaa nyɛ nyɛmimɛ ɔmɛ a we puɔ nya amɛ a nya dali; Levi bi a kuu kake maa da si ha we puɔ nya kake.

⁶ Nyɛɛ gbe jijɔhi, kɛ to akpakpohi nɛ a kɛ maa ye Hetsɔmi ɔ. Jehanɛ, nyɛɛ pee nyɛ he klɔuklɔu, nɛ nyɛ dla kɛ ha bɔ ɔmɛ a sami. Nyɛɛ pee enɛ ɔ, bɔ nɛ pee nɛ nyɛ nyɛmimɛ Israel bi ɔmɛ nɛ a ye mlaa amɛ nɛ Yawɛ wo kɛ gu Mose nɔ ɔ a nɔ.”

⁷ Matsɛ Yosia ke ma a nɛ ba bua ngɛ lejɛ ɔ lohwe nɛ ɔmɛ, konɛ nɔ tsuaa nɔ nɛ ye Hetsɔmi ɔ bɔ nɛ sa: jijɔ kɛ akpakpo akpe nyingmi etɛ, kɛ na ku akpe etɛ. Matsɛ ɔ nitsɛ lohwehi ji enɛ ɔmɛ tsuo.

⁸ Ganɔ ɔmɛ hu ke ma a, osɔfo ɔmɛ, kɛ Levi bi ɔmɛ níhi babauu kɛ je a tsui mi faa. Tsɔli nikɔtɔmahi nɛ hyɛɛ Mawu we ɔ nɔ ɔ, mɛ hu a ha osɔfo ɔmɛ to akpe enyɔ kɛ e nya lafa ekpa, kɛ na lafa etɛ, nɛ a kɛ sã bɔhi Hetsɔmi be ɔ. Tsɔli nɛ ɔmɛ ji osɔfo nɔkɔtɔma pe kulaa Hilkia, Zakaria, kɛ Yehiel.

⁹ Nikɔtɔma komɛ nɛ je Levi wɛtso ɔ mi hu ha Levi bi ɔmɛ to akpe enuɔ, kɛ na lafa enuɔ, nɛ a kɛ sã bɔhi. A biɛhi ji Konania, Shemaya kɛ e nyɛminyumu Netanel, Hashabia, Yeyel, kɛ Yozabad.

¹⁰ Benɛ a to blɔ nya kɛ ha Hetsɔmi ɔ gbe nya a, osɔfo ɔmɛ, kɛ Levi bi ɔmɛ ho ya da a blɔ hehi kaa bɔ nɛ matsɛ ɔ fa mɛ ke a pee ɔ.

¹¹ Benɛ a gbe to ɔmɛ ɔ, Levi bi ɔmɛ kpɔ lohwe ɔmɛ a he womi ɔmɛ, nɛ osɔfo ɔmɛ ngɔ muɔ ɔ kɛ fĩa bɔ sami la tɛ ɔ nɔ.

¹² Enɛ ɔ se ɔ, a dla lohwe ɔmɛ nɛ a kɛ maa sã sami bɔ ɔ ngɔ ha ma a we puɔ nya we puɔ nya, konɛ a sã bɔ ɔmɛ kaa bɔ nɛ a ngma ngɛ Mose mlaa a mi ɔ.

¹³ Levi bi ɔmɛ sã lohwe ɔmɛ nɛ a kɛ maa ye Hetsɔmi ɔ ngɛ la nɔ. A hoo bɔ sami ní klɔuklɔu ɔmɛ ngɛ buɛhi, dadesɛhi, kɛ kãhi a mi, nɛ a dla lo ɔ mlamlaamla ngɔ ha nɔ tsuaa nɔ.

¹⁴ Pee se ɔ, Levi bi ɔmɛ dla lo ɔ ngɔ ha mɛ nitsɛmɛ a he, kɛ osɔfo ɔmɛ nɛ ji Aaron nina a. Nɔ́ nɛ he je nɛ a pee ja ji, ligbi mluku ɔ tsuo ɔ, osɔfo ɔmɛ ngɛ sami bɔ ɔmɛ, kɛ zɔ ɔ sãe hluu kɛ ya si nyɔ mi nɛ́ deka be mi.

¹⁵ Lali ɔmɛ nɛ ji Asaf bimɛ ɔmɛ ya hi a blɔ hehi kaa bɔ nɛ Matsɛ David wo mlaa ke a pee ɔ. Mɛ ji Asaf, Heman, kɛ Yedutun, matsɛ ɔ gbalɔ ɔ. Agbo nya buli ɔmɛ ho ya da a blɔ hehi kaa bɔ nɛ a peeɔ daa a; mɛɛ lɛɛ e hia we kaa a si a ní tsumi ɔ, ejakaa a nyɛmimɛ Levi bi ɔmɛ ngɔ a blɔ fa mi nɔ́ ɔ kɛ ba ha mɛ.

¹⁶ Lɔ ɔ he ɔ, kaa bɔ nɛ Matsɛ Yosia fa ma a, a to nɔ́ tsuaa nɔ́ blɔ nya jamɛ a ligbi ɔ kɛ ha Yawɛ sɔmɔmi, Hetsɔmi nyami be ɔ yemi, kɛ sami bɔ sami ngɛ bɔ sami la tɛ ɔ nɔ.

¹⁷ Israel bi tsuo nɛ ba bua ngɛ lejɛ ɔ ye Hetsɔmi ɔ, kɛ Abolokplolo nyami be ɔ ligbi kpaago sɔuu.

¹⁸ Kɛ je gbalɔ Samuel be ɔ mi ɔ, a yi Hetsɔmi ko hyɛ nɛ sɔ kaa nɔ́ nɛ a ye nɛ ɔ. Jehanɛ se hu, Israel matsɛmɛ ɔmɛ a ti nɔ ko yi Hetsɔmi ko hyɛ nɛ sɔ kaa Hetsɔmi nɛ Matsɛ Yosia, osɔfo ɔmɛ, Levi bi ɔmɛ, Yuda ma a tsuo, Israel bi nɛ ba lejɛ ɔ, kɛ Yerusalem ma mi bi ɔmɛ ye nɛ ɔ.

¹⁹ Yosia yi nɔ, jeha nɛ ji nyɔngma kɛ kpaanyɔ ɔ mi lɛ a ye kikɛmɛ a Hetsɔmi nɛ ɔ nɛ.

Yosia matsɛ yemi ɔ nyagbe

²⁰ Pee se benɛ Matsɛ Yosia to sɔmɔmi ní tsumi ɔ blɔ nya ngɛ Yawɛ we ɔ gbe nya a, Egipt matsɛ ɔ nɛ a tsɛɛ lɛ Neko ɔ ya tua Karkemish, ngɛ Yufrate pa a nya. Yosia ya nɛ e kɛ lɛ ya kpe.

²¹ Se Neko ngɔ sɛ gbi nɛ ɔ mane Yosia ke, “Ta nɛ i gba nɛ ɔ kɔ we mo, Yuda matsɛ, o he. Tsa pi mo nɛ i kɛ na; pe i ba nɛ i kɛ ye he nyɛli ɔmɛ nɛ ba hwu, nɛ Mawu de mi ke ma pee esɔ. Mawu kɛ mi ngɛ. Lɔ ɔ he ɔ, koo te si ngɔ wo mi nɛ e ko ba kpata o hɛ mi.”

²² Se Yosia to e yi mi momo kaa e kɛ lɛ maa hwu. Nɔ́ nɛ Mawu ngɛ lɛ dee kɛ gu Matsɛ Neko nɔ ɔ, e bui fɛɛ; mohu ɔ, e tsake e he nɛ e ya gba ta kɛ ho Megido nga kplanaa a nɔ ya.

²³ Benɛ a ngɛ ta a hwue ɔ, Egipt kɛ̃ɛ̃ tsɛ̃li ɔmɛ tsɛ̃ Matsɛ Yosia kɛ̃ɛ̃. Yosia fa e tsɔli ɔmɛ ke, “Nyɛɛ ngɔ mi kɛ je hiɛ ɔ, ejakaa i plaa yayaa!”

²⁴ E tsɔli ɔmɛ je lɛ ngɛ ta zugba lɛ ɔ mi kɛ wo ta zugba lɛ enyɔne ɔ nɛ e hɛɛ kɛ ba a mi, nɛ a kɛ lɛ ba Yerusalem. Lejɛ ɔ e ba gbo ngɛ, nɛ a pu lɛ ngɛ matsɛmɛ ɔmɛ a yɔkɔ ɔmɛ eko mi. Yuda ma a, kɛ Yerusalem ma mi bi ɔmɛ tsuo nyɛ ya ha lɛ.

²⁵ Gbalɔ Yeremia hu po kɔmɔ yemi la ko ngɛ Matsɛ Yosia he. Nɛ kɛ je jamɛ a be ɔ kɛ ba si mwɔnɛ ligbi nɛ ɔ, lali ɔmɛ tsuo, nyumuhi kɛ yihi laa la nɛ ɔ nɛ a kɛ kaiɔ e gbenɔ ɔ. Nɔ́ nɛ ɔ ba plɛ pee kusumi ngɛ Israel. La nɛ ɔ piɛ kɔmɔ yemi asilɛhi nɛ a bua nya a a he.

²⁶ Níhi tsuo nɛ Yosia pee, bɔ nɛ e sɔmɔ Yawɛ kɛ e tsui tsuo, bɔ nɛ e ye mlaa a nɔ,

²⁷ kɛ e wami he sane kɛ je sisije kɛ ya si nyagbe ɔ, a ngma ní nɛ ɔmɛ tsuo ngɛ Israel kɛ Yuda Matsɛmɛ ɔmɛ a Blema Sanehi Womi ɔ mi.