Kronika II, 34 - BAIBLO ALOO NGMAMI KLƆUKLƆU Ɔ

Yuda matsɛ, Yosia

¹ Yosia ye jeha kpaanyɔ benɛ e bɔni tsɛ yemi ngɛ Yuda ma a nɔ, nɛ e hi Yerusalem kɛ ye matsɛ jeha nyingmi etɛ kɛ kake.

² E pee Yawɛ suɔmi nya ní; e ya wo e nɛ̃ David nane, nɛ e ye Mawu mlaa amɛ tsuo a nɔ sisiisi.

Yosia te si kɛ wo amaga jami

³ Yosia matsɛ yemi be ɔ jeha nɛ ji kpaanyɔ ɔ mi ɔ, be mi nɛ e wɛ saasaa a, e bɔni e nɛ̃ David Mawu ɔ jami. Jeha nɛ ji nyɔngma kɛ enyɔ ɔ mi ɔ, e bɔni jami he ɔmɛ nɛ ngɛ Yerusalem kɛ Yuda a gbɛmi; e ywia yo mawu ɔ nɛ a tsɛɛ Ashera a we amaga amɛ, kɛ amaga kpa amɛ tsuo.

⁴ Bɔ sami la tɛhi nɛ ngɛ Baal jami he ɔ, kɛ tsopa kɛ e he via sami la tɛhi nɛ ngɛ lejɛ ɔ, Yosia ha nɛ a ku mɛ tsuo ngɔ pue si ngɛ e hɛ mi. Ashera amaga amɛ, kɛ amaga kpa amɛ tsuo lɛɛ a wɛɛ mɛ mɔnyɔmɔnyɔ kaa la zu, nɛ a ngɔ kɛ fĩa nihi nɛ sã bɔ ha mɛ ɔ a yɔkɔhi a nɔ.

⁵ Yosia sã osɔfo ɔmɛ a wuhi ngɛ mɛ nitsɛmɛ a bɔ sami la tɛ ɔmɛ a nɔ. E pee ní nɛ ɔmɛ nɛ e kɛ tsukɔ Yuda kɛ Yerusalem a he ekohu.

⁶ Yosia tsu kikɛmɛ a ní tsumi nɛ ɔ ngɛ Manase, Efraim, kɛ Simeon ma amɛ, kɛ ma doku ɔmɛ tsuo a mi hulɔ hluu kɛ ya su Naftali, ngɛ omleyi je tɔɔ.

⁷ Yosia ywia bɔ sami la tɛ ɔmɛ, kɛ Ashera amaga amɛ. E wɛɛ amaga amɛ nɛ a pee mɔnyɔmɔnyɔ kaa la zu, nɛ e ywia tsopa kɛ e he via bɔ sami la tɛ ɔmɛ ngɛ Israel zugba a nɔ tsuo loko e kpale kɛ ba Yerusalem.

A na mlaa womi ɔ

⁸ Matsɛ Yosia yi nɔ jeha nɛ ji nyɔngma kɛ kpaanyɔ ɔ, e julaa zugba a, nɛ e tsukɔ Yawɛ, e Mawu ɔ we ɔ he. Be nɛ e gbe nya a, e tsɔ nihi etɛ konɛ a ya dla Yawɛ, e Mawu ɔ we ɔ. Ni ɔmɛ ji Azalia bi Shafan, amlaalo ɔ nɛ ngɛ Yerusalem, nɛ a tsɛɛ lɛ Maaseya a, kɛ Yoahaz bi Yoa, ma ní tsulɔ nɔkɔtɔma kake.

⁹ Shafan, Maaseya, kɛ Yoa ngɔ sika nɛ nihi kɛ ba Mawu we ɔ ya ha osɔfo nɔkɔtɔma pe kulaa a nɛ a tsɛɛ Hilkia a. Sika nɛ ɔ ji sika nɛ Levi bi nɛ tsuɔ ní ngɛ Yawɛ we ɔ agbo ɔ nya a bua nya ngɛ wɛtso nɛ ɔmɛ a mi ɔ a dɛ: Manase, Efraim, Israel ma nɛ piɛ ɔ, Yuda, Benyamin, kɛ Yerusalem ma mi bi ɔmɛ.

¹⁰ A tu sika a ngɔ wo ni etɛ komɛ a dɛ. Mɛ ji nihi nɛ hyɛɛ ní tsuli ɔmɛ nɛ ngɛ Yawɛ we ɔ dlae ɔ a nɔ ɔ nɛ.

¹¹ Mɛ hu a ngɔ sika a kɛ ha kapitɛhi, kɛ tsu mali, konɛ a kɛ he tɛ, kɛ tso nɛ a kɛ dla tsuhi nɛ Yuda matsɛmɛ ɔmɛ ngmɛɛ a he nɛ a puɛ ɔ.

¹² Ní tsuli nɛ ɔmɛ yeɔ anɔkuale saminya. Levi bi eywiɛ lɛ hyɛɛ a nɔ. Mɛ ji Yahat, kɛ Obadia nɛ a je Merari weku ɔ mi ɔ, kɛ Zakaria kɛ Meshulam nɛ a je Kohat weku ɔ mi ɔ. Saku fiali kpakpahi ji Levi bi ɔmɛ tsuo.

¹³ Levi bi kpa komɛ hu hyɛɛ tlomi tlooli, kɛ ní tsuli kpahi a nɔ. A ti ni komɛ hu ji womi ngmali, ma ní tsuli, kɛ agbo nya buli.

¹⁴ Benɛ a ngɛ sika a nɛ a kɛ ba to Yawɛ we ɔ jee ɔ, osɔfo Hilkia ya na Yawɛ mlaa womi ɔ nɛ Mawu ngɔ kɛ ha Mose ɔ.

¹⁵ Hilkia de womi ngmalɔ ɔ nɛ a tsɛɛ lɛ Shafan ɔ ke, “I na mlaa womi ɔ ngɛ Yawɛ we ɔ.” Nɛ́ e de ja kɛkɛ nɛ e kɛ womi ɔ ha Shafan.

¹⁶ Shafan hu ngɔ womi ɔ kɛ ba ha matsɛ ɔ, nɛ e bɔ lɛ amaniɛ ke, “Nɔ́ tsuaa nɔ́ nɛ o fa wɔ ke waa pee ɔ, wa pee.

¹⁷ Sika a nɛ a kɛ ya to Yawɛ we ɔ, wa ya ngɔ nɛ waa kɛ wo ní tsuli ɔmɛ, kɛ a nɔ hyɛli ɔmɛ a dɛ.”

¹⁸ Shafan ya nɔ nɛ e de matsɛ ɔ ke, “Osɔfo Hilkia ha mi womi ko; womi ɔ ji nɛ ɔ nɛ.” Kɛkɛ nɛ Shafan kane womi ɔ kɛ ha matsɛ ɔ.

¹⁹ Benɛ matsɛ ɔ nu mlaa womi ɔ mi munyu ɔmɛ nɛ a ngɛ kanee ɔ, e hía e tade ɔmɛ ngɛ e he,

²⁰ nɛ e fa Hilkia, Shafan bi Ahikan, Mikaya bi Abdon, matsɛ pɛdiyo ɔ nɛ a tsɛɛ lɛ Shafan ɔ, kɛ matsɛ tsɔlɔ Asaya ke,

²¹ “Nyɛɛ ya nɛ nyɛ ya bi Yawɛ ga womi ha imi, kɛ nihi tsuo nɛ piɛ ngɛ Israel, kɛ Yuda a. Nyɛ ya bi lɛ womi nɛ a ya na nɛ ɔ mi munyu ɔmɛ a he sane. Yawɛ mi mi fu wɔ wawɛɛ nitsɛ, ejakaa wa nɛmɛ ɔmɛ yi Yawɛ mlaa a nɔ; níhi nɛ a ngma ngɛ womi nɛ ɔ mi ke a pee ɔ, a pee we fɛɛ.”

²² Kɛkɛ nɛ Hilkia, kɛ nihi nɛ matsɛ ɔ tsɔ ɔ pue nɔ kɛ ho nɛ a ya bi gbalɔyo ɔ nɛ a tsɛɛ lɛ Hulda a ní ngɛ Yerusalem ma he ɔ mi he nɛ e hii ɔ. Hulda huno ji Tikva bi Shalum, Harhas bibi ɔ; nɛ Shalum nɛ ɔ ji nɔ nɛ hyɛɛ tadehi a nɔ ngɛ Yawɛ we ɔ. Osɔfo Hilkia kɛ tsɔli ɔmɛ ngɔ matsɛ ɔ sɛ gbi ɔ ya ha gbalɔyo ɔ.

²³ Gbalɔyo ɔ hu de mɛ ke a kpale kɛ ho matsɛ ɔ ngɔ ya nɛ a ngɔ

²⁴ sɛ gbi nɛ je Yawɛ ngɔ nɛ ɔ ya ha lɛ ke, “I kɛ gbiɛmi munyuhi nɛ a ngma ngɛ womi ɔ nɛ a kane ha lɛ matsɛ ɔ maa gbla Yerusalem, kɛ Yerusalem ma mi bi ɔmɛ tsuo a tue.

²⁵ A kua mi, nɛ a sã bɔhi kɛ ha mawu kpahi, nɛ a kɛ níhi nɛ a pee nɛ ɔ tsuo wo ye mi mi la. Ye mi mi fu Yerusalem wawɛɛ nitsɛ, nɛ nɔ́ ko be hie peemi ngɛ he.

²⁶ Se Yuda matsɛ ɔ nitsɛ, nɔ nɛ tsɔ nyɛ ke nyɛ ba bi imi Yawɛ, ye ga womi ɔ, bɔ nɛ imi Yawɛ, Israel Mawu ɔ, i ngɛ lɛ dee ji nɛ ɔ nɛ: o nu munyuhi nɛ a ngma ngɛ mlaa womi ɔ mi ɔ,

²⁷ nɛ o tsake o tsui, nɛ o ba o he si ngɛ ye hɛ mi. Benɛ o nu bɔ nɛ i to nɛ ma gbla Yerusalem, kɛ Yerusalem ma mi bi ɔmɛ a tue ha a, o hía o he tade ɔmɛ, nɛ o wo ya. I nu o kue fami ɔ.

²⁸ Enɛ ɔ he je ɔ, tue gblami nɛ i to nɛ e ba ma nɛ ɔ, kɛ ma mi bi ɔmɛ a nɔ ɔ, i be hae nɛ o na kɛ o hɛngmɛ. O ma ba gbo nɛ a maa pu mo ngɛ he jɔmi mi loko ma pee nɔ́ nɛ ɔ.” Kɛkɛ nɛ ni ɔmɛ kpale a se nɛ a kɛ sɛ gbi nɛ ɔ ba ha Matsɛ Yosia.

Yosia wo si veveeve kaa e maa bu Yawɛ tue

²⁹ Matsɛ Yosia tsɔ ya kpee Yuda, kɛ Yerusalem ma nimeli ɔmɛ kɛ ba,

³⁰ nɛ e kɛ mɛ, osɔfo ɔmɛ, Levi bi ɔmɛ, kɛ ma a tsuo, nimli nguahi, kɛ nimli wawihi tsuo ho Yawɛ we ɔ ya. Matsɛ ɔ ya kane mlaa womi ɔ nɛ a na ngɛ Yawɛ we ɔ mi munyu ɔmɛ tsuo ngɔ tsɔɔ ma a ngɛ lejɛ ɔ.

³¹ Kɛkɛ nɛ e ho ya da kpoku ko nɔ nɛ e ka Yawɛ kita ke e maa bu lɛ tue, nɛ e maa ye e mlaa amɛ a nɔ kɛ e tsui tsuo, kɛ e klaa tsuo. E ka kita ke níhi nɛ a ngma ngɛ mlaa womi ɔ mi ɔ, e maa pee mɛ tsuo pɛpɛɛpɛ.

³² E ha nɛ Benyamin bi ɔmɛ, kɛ nihi tsuo nɛ ba bua ngɛ Yerusalem ɔ wo si kaa a maa ye somi nɛ a kɛ a nɛmɛ a Mawu ɔ so ɔ nɔ. Nɛ mɛ tsuo a pee ja.

³³ Matsɛ Yosia je amagahi tsuo kɛ je zugba a nɔ he nɛ Israel ma a ngɛ ɔ, nɛ e ha nɛ ma a tsuo sɔmɔ Yawɛ, a nɛmɛ a Mawu ɔ e wami be ɔ tsuo.