Kronika II, 33 - BAIBLO ALOO NGMAMI KLƆUKLƆU Ɔ

Yuda matsɛ, Manase

¹ Manase ye jeha nyɔngma kɛ enyɔ benɛ e bɔni tsɛ yemi ngɛ Yuda ma a nɔ, nɛ e hi Yerusalem kɛ ye matsɛ jeha nyingmi enuɔ kɛ enuɔ.

² Je ma amɛ nɛ Yawɛ fie kɛ je Israel bi ɔmɛ a blɔ mi ɔ, Manase ya nyɛɛ a ní yayami ɔmɛ a se, nɛ e pee yayami kɛ si Yawɛ.

³ Jami hehi nɛ e tsɛ Hezekia gbɛ ɔ, e kpale po mɛ ekohu. E ma bɔ sami la tɛhi kɛ ha Baal, nɛ e pee amagahi kɛ ha yo mawu ɔ nɛ a tsɛɛ Ashera a. E ja dodoehi hulɔ.

⁴ Yawɛ we ɔ ngɛ Yerusalem, he nɛ Yawɛ to nɛ a ja lɛ ngɛ daa a, Manase puɛ bɔ sami la tɛhi ngɛ lejɛ ɔ kɛ ha Baal ɔmɛ.

⁵ Jehanɛ e puɛ bɔ sami la tɛhi ngɔ ma kue enyɔ ɔmɛ nɛ ngɛ Yawɛ we ɔ a mi, konɛ a ja dodoehi ngɛ lejɛ ɔmɛ.

⁶ E ngɔ e binyumuhi kɛ sã sami bɔhi ngɛ Hinom kɔ̃ ɔ mi. E kla, e tsu kunya, nɛ e kɛ kpade tsɛli, kɛ azetsɛmɛ bɔ. E pee yayamihi babauu kɛ si Yawɛ, nɛ e kɛ wo e mi mi la.

⁷ E puɛ amaga ko ya ma Yawɛ ɔ we. Mawu, kɛ David, kɛ e binyumu Salomo tu we nɛ ɔ he munyu hyɛ, nɛ e de ke, “I hla we nɛ ɔ ngɛ Yerusalem kɛ je Israel wɛtso ɔmɛ tsuo a kpɛti ngɔ to kaa he nɛ sa nɛ a ja mi ngɛ daa.

⁸ Lɔ ɔ he ɔ, ke Israel bi ɔmɛ maa pee nɔ́ tsuaa nɔ́ nɛ i fa mɛ ke a pee ɔ, nɛ a maa ye mlaa amɛ tsuo nɛ ye tsɔlɔ Mose wo mɛ ɔ a nɔ ɔ, i be hae nɛ a fie mɛ kɛ je zugba a nɛ i ngɔ kɛ ha a nɛmɛ ɔmɛ ɔ nɔ hu.”

⁹ Se Manase mlɔɔ Yuda kɛ Yerusalem ma mi bi ɔmɛ, nɛ a ya pee yayami nɛ kle kulaa pe yayami nɛ je ma amɛ nɛ Yawɛ fie kɛ je Israel bi ɔmɛ a blɔ mi ɔ pee ɔ po.

Manase tsake e tsui

¹⁰ Yawɛ bɔ Manase kɛ e ma a kɔkɔ, se a bui tue.

¹¹ Enɛ ɔ he je ɔ, Yawɛ ha nɛ Asiria tabo ɔ asafoatsɛmɛ ɔmɛ ba tua Yuda. A kɛ gbowehi nu Manase nɛ a wo lɛ kɔsɔkɔsɔ, nɛ a ngɔ lɛ kɛ ho Babilon ya.

¹² Benɛ e ngɛ haomi mi ɔ, e ba e he si, nɛ e fa kue ha Yawɛ, e nɛmɛ a Mawu ɔ.

¹³ Mawu bu Manase kue fami ɔ tue, nɛ e ha nɛ e kpale kɛ ya Yerusalem ya ye matsɛ ekohu. Nɔ́ nɛ ɔ ha nɛ Manase na kaa Yawɛ ɔ, Mawu ji lɛ niinɛ.

¹⁴ Ní nɛ ɔmɛ a se ɔ, Manase fia gbogbo enyɔne ɔ ngɛ David ma a we beleku je ɔ nɔ kɛ ya hiɔwe. E fia nɔ kɛ je kɔ̃ ɔ mi ngɛ Gihon pa a kasa nya ngɛ omleyi je kɛ ya si lo agbo ɔ nya, hluu kɛ ya bɔle ma a nɛ a tsɛɛ Ofel ɔ. Jehanɛ hu, e ngɔ tatsɛmɛ ngɔ to Yuda mahi nɛ a fia gbogbo ngɔ wo a he ɔ tsuo a mi.

¹⁵ E je ma se mawu ɔmɛ, kɛ amaga a nɛ e ngɔ ya ma Yawɛ we ɔ kɛ je lejɛ ɔ. Bɔ sami la tɛhi nɛ a pee ha mawuhi nɛ ngɛ yoku ɔ nɔ, he nɛ Yawɛ ɔ we ɔ ngɛ ɔ, kɛ ní nɛmɛ nɛ ngɛ he kpahi ngɛ Yerusalem ɔ, e je mɛ tsuo pɛpɛɛpɛ. E muɔ mɛ kɛ ho ya sake ngɔ pue ma a nya.

¹⁶ E dla bɔ sami la tɛ ɔ nɛ ngɛ he nɛ a jaa Yawɛ ngɛ ɔ, nɛ e sã tue mi jɔmi bɔhi, kɛ sina bɔhi ngɛ nɔ. E fa Yuda ma a tsuo ke a sɔmɔ Yawɛ, Israel Mawu ɔ.

¹⁷ E ngɛ mi kaa ma a ya nɔ sã bɔhi ngɛ jami he kpahi mohu, se bɔ ɔmɛ tsuo nɛ a sã a, Yawɛ pɛ a sã kɛ ha.

Manase matsɛ yemi ɔ nyagbe

¹⁸ Manase he sane kpahi nɛ piɛ, kɛ kue nɛ e fa ha e Mawu, kɛ gbali ɔmɛ nɛ kɛ lɛ ba tu munyu ngɛ Israel Mawu ɔ biɛ mi ɔ a sɛ gbi ɔmɛ ɔ, a ngma ngɛ Israel Matsɛmɛ ɔmɛ a Blema Sanehi Womi ɔ mi.

¹⁹ A ngma Manase he ní nɛ ɔmɛ hu ngɛ Gbali ɔmɛ a Blema Sanehi Womi ɔ mi: kue nɛ Manase fa, kɛ bɔ nɛ Mawu bu lɛ tue ha, yayamihi nɛ e pee loko e ba tsake e tsui, jami hehi nɛ e po, yo mawu ɔ nɛ a tsɛɛ Ashera a we amagahi nɛ e puɛ, kɛ amagahi nɛ e ja.

²⁰ Manase ba gbo, nɛ a pu lɛ ngɛ matsɛ we ɔ mi, nɛ e bi Amon ba ye matsɛ ngɛ e se.

Yuda matsɛ, Amon

²¹ Amon ye jeha nyingmi enyɔ kɛ enyɔ benɛ e bɔni tsɛ yemi ngɛ Yuda ma a nɔ, nɛ e hi Yerusalem kɛ ye matsɛ jeha enyɔ.

²² E ya wo e tsɛ Manase nane, nɛ e pee yayami kɛ si Yawɛ; amaga amɛ nɛ e tsɛ puɛ ɔ, e sɔmɔ mɛ tsuo pɛpɛɛpɛ.

²³ Se Amon bɛ e he si, nɛ e kpale we kɛ bɛ Yawɛ ngɔ kaa bɔ nɛ e tsɛ pee ɔ; lɛɛ e pee yayamihi babauu pe e tsɛ ɔ po.

²⁴ Amon tsɔli ɔmɛ so ngɔ wo e he, nɛ a gbe lɛ ngɛ matsɛ we ɔ.

²⁵ Se Yuda bi ɔmɛ gbe nihi tsuo nɛ so ngɔ wo e he ɔ, nɛ a wo e bi Yosia matsɛ ngɛ e se.