Kronika II, 32 - BAIBLO ALOO NGMAMI KLƆUKLƆU Ɔ

Asiria bi ɔmɛ ba tua Yerusalem

¹ Matsɛ Hezekia ye Yawɛ anɔkuale, nɛ e sɔmɔ lɛ kɛ e tsui tsuo. Pee se ɔ, Asiria matsɛ, Senakerib ba tua Yuda. E sa mahi nɛ a fia gbogbo ngɔ wo a he ɔ a yi, nɛ e hla kaa e maa ku gbogbo ɔmɛ ngɔ pue si.

² Benɛ Hezekia na kaa Senakerib to e yi mi kaa e ma tua Yerusalem hulɔ ɔ,

^3-4 e kɛ e ma nimeli ɔmɛ, kɛ e ta buli ɔmɛ na kpe, nɛ a to kaa a maa tsi vuhi nɛ ngɛ ma a nya a. A juɛmi ji, ke a tsi vu ɔmɛ nɛ Asiria bi ɔmɛ ba sɛ ma a mi ɔ, a be nyu nae. Lɔ ɔ he ɔ, ma nimeli ɔmɛ ya bua nihi babauu a nya nɛ a kɛ mɛ ya tsi vu ɔmɛ tsuo; pa nɛ bee ngɛ zugba a mi ɔ hu a tsi lɛ, nɛ nyu bi ngɛ mi hu.

⁵ Matsɛ ɔ dla Yerusalem ma a he fami ní ɔmɛ; gbogbohi nɛ ku ɔ, e kpale fia mɛ ekohu, nɛ e ma mɔhi ngɛ a nɔ; e fia gbogbo enyɔne hulɔ kɛ wo ma a he. Jehanɛ se hu, e dla Milo mɔ ɔ nɛ ngɛ David ma a mi ɔ, nɛ e sɔ kɛ̃ɛ̃hi kɛ tsɛ̃ihi babauu.

⁶ E ngɔ tatsɛmɛ ngɔ to ma a nya, nɛ e bua a nya ngɛ ma agbo ɔ nya. E de mɛ ke,

⁷ “Nyɛ wlua nyɛ, nɛ nyɛɛ pee kã. Nyɛ ko ye Asiria matsɛ ɔ kɛ e ta babauu ɔ gbeye; ejakaa nɔ nɛ kɛ wɔ ngɛ ɔ, e he wa kulaa pe nɔ nɛ kɛ mɛ ngɛ ɔ.

⁸ Niinɛ, Asiria matsɛ ɔ ngɛ ta buli babauu, se mɛ tsuo pɛpɛɛpɛ ɔ, nimli adesahi kɛkɛ ji mɛ. Wɔɔ lɛɛ Yawɛ, wa Mawu ɔ maa piɛ wa he; lɛ ji nɔ nɛ maa hwu ta amɛ ha wɔ!” Munyu nɛ ɔ nɛ Yuda matsɛ, Hezekia tu ɔ, wo ma a he wami.

⁹ Pee se ɔ, benɛ Senakerib kɛ e tabo ɔ tsuo ngɛ Lakish kɛ mwɔɔ ɔ, e tsɔ nɛ a kɛ sɛ gbi nɛ ɔ ya ha Hezekia, kɛ Yuda ma a ngɛ Yerusalem ke,

¹⁰ “Imi Asiria matsɛ, Senakerib, i ngɛ nyɛ bie ke mɛni nɔ nyɛ ngɔ nyɛ hɛ kɛ fɔ loko nyɛ hii si ngɛ Yerusalem kɛ mwɔɔ be mi nɛ a sa ma a yi ɔ?

¹¹ Hezekia deɔ nyɛ ke Yawɛ, nyɛ Mawu ɔ ma kpɔ nyɛ kɛ je wa dɛ mi. Se anɛ nyɛ li kaa Hezekia ngɛ nyɛ mlɔɔe, nɛ e ma ha nɛ mi mi hwɔ, kɛ kuma maa gbe nyɛ lo?

¹² Anɛ pi Hezekia nɛ ɔ nɔuu nɛ ku Yawɛ jami he ɔmɛ, kɛ bɔ sami la tɛ ɔmɛ ngɔ pue si, nɛ pee se ɔ, e de Yuda bi ɔmɛ, kɛ Yerusalem bi ɔmɛ ke a ja Yawɛ, nɛ a sã tsopa kɛ e he via ha lɛ ngɛ bɔ sami la tɛ kake pɛ nɔ lo?

¹³ Anɛ nɔ́ nɛ ye nɛmɛ ɔmɛ, kɛ imi nitsɛ wa pee je ma kpa amɛ ɔ, nyɛ li lo? Anɛ jamɛ a je ma amɛ a mawu ɔmɛ nyɛ́ kpɔ mɛ kɛ je imi, Asiria matsɛ, ye dɛ mi lo?

¹⁴ Mɛni be lɛ je ma nɛ ɔmɛ tsuo a mawu ɔmɛ eko nyɛ́ kpɔ a zugba kɛ je wa dɛ mi hyɛ? Lɛɛ mɛni haa nɛ nyɛɛ lɛɛ nyɛ susuɔ kaa nyɛ Mawu ɔ ma nyɛ he nyɛ yi wami ɔ?

¹⁵ Lɔ ɔ he ɔ, nyɛ ko ha nɛ Hezekia nɛ sisi nyɛ, loo e mlɔɔ nyɛ kikɛ nɛ ɔ. Nyɛ ko he lɛ nyɛɛ ye! Je ma ko je ma ko mawu kpɔ we e ma hyɛ kɛ ji Asiria matsɛ ko matsɛ ko dɛ mi. Enɛ ɔ he je ɔ, e fɔɔ si paa kaa nyɛ hu nyɛ Mawu nɛ ɔ be nyɛe ma he nyɛ yi wami!”

¹⁶ Senakerib tsɔli ɔmɛ nitsɛmɛ hu tu munyuhi babauu kɛ si Yawɛ Mawu, kɛ e tsɔlɔ Hezekia.

¹⁷ Asiria matsɛ ɔ bɔ Yawɛ, Israel Mawu ɔ ahlua ngɛ womi ɔ nɛ e ngma ba ha Hezekia a mi ke, “Je ma amɛ a mawu ɔmɛ nyɛ we nɛ a je a ma amɛ kɛ je ye dɛ mi. Hezekia Mawu ɔ hu be nyɛe ma je e ma a kɛ je ye dɛ mi.”

¹⁸ Tsɔli ɔmɛ nɛ ngɔ womi ɔmɛ kɛ ba a kpa ngmlaa kɛ tu munyu nɛ ɔmɛ ngɛ Hebri gbi mi, bɔ nɛ pee nɛ a kɛ wo Yerusalem ma mi bi ɔmɛ nɛ ngɛ gbogbo ɔ nɔ ɔ a he gbeye, nɛ sawale nu mɛ. A pee ja konɛ ma a ngɔmi nɛ ko wa ha mɛ.

¹⁹ Tsɔli nɛ ɔmɛ tu Yerusalem Mawu ɔ he munyu kaa nɔ́ nɛ je ma amɛ a mawu ɔmɛ nɛ nimli kɛ a nine pee ɔ eko ji lɛ.

²⁰ Kɛkɛ nɛ Matsɛ Hezekia kɛ gbalɔ Yesaya, Amoz binyumu ɔ fa kue ha Mawu.

²¹ Yawɛ tsɔ bɔfo ko nɛ e ba gbe Asiria ta buli ɔmɛ, kɛ asafoatsɛmɛ ɔmɛ tsuo ngɛ a sito he ɔ, nɛ Asiria matsɛ ɔ kɛ zo kpale kɛ ho e ma mi ya. Ligbi ko, benɛ a ngɛ e jami he ɔ, e binyumu ɔmɛ ekomɛ ya gbe lɛ kɛ klaate.

²² Bɔ nɛ Yawɛ pee kɛ kpɔ Matsɛ Hezekia, kɛ Yerusalem ma mi bi ɔmɛ kɛ je Asiria matsɛ, Senakerib, kɛ a he nyɛli kpa amɛ a dɛ mi ji nɛ ɔ nɛ. Yawɛ ha nɛ Hezekia kɛ e ma a, kɛ ma amɛ nɛ bɔle mɛ ɔ hi si ngɛ tue mi jɔmi mi.

²³ Nihi babauu ba Yerusalem, ba sã bɔ ha Yawɛ, nɛ a ke Matsɛ Hezekia hu níhi nɛ a he jua wa. Nɛ kɛ je jamɛ a be ɔ kɛ yaa a, je ma amɛ tsuo buɔ Hezekia saminya.

Hezekia hiɔ kɛ e he nɔ womi

²⁴ Jamɛ a be ɔ mi ɔ, Matsɛ Hezekia ba nu hiɔ, nɛ e piɛ nguɛ nya nɛ e gbo. E fa kue ha Yawɛ, nɛ Yawɛ ha lɛ okadi kɛ tsɔɔ kaa e ma na he wami.

²⁵ Se kpakpa nɛ ɔ nɛ a pee Hezekia a, e nɛ Yawɛ si, nɛ e je we Yawɛ yi kɛ to nane mi; mohu ɔ, e wo e he nɔ. Enɛ ɔ he je ɔ, Yawɛ mi mi fu lɛ, kɛ Yuda, kɛ Yerusalem.

²⁶ Se nyagbe ɔ, Hezekia kɛ Yerusalem ma mi bi ɔmɛ ba a he si. Lɔ ɔ he ɔ, Yawɛ gbla we ma a tue kɛ ya si Hezekia gbenɔ se.

Hezekia ní kɛ agboje

²⁷ Hezekia ba na ní babauu nitsɛ, nɛ nɔ tsuaa nɔ buɔ lɛ. E pee nito hehi, nɛ e to ní nɛ ɔmɛ ngɛ lejɛ ɔmɛ: sika tsu, sika hiɔ, tɛhi nɛ a he jua wa, tsopahi kɛ a he via, tsɛ̃ihi, kɛ ní kpa komɛ nɛ a he jua wa.

²⁸ Jehanɛ hu, e pee nito hehi kɛ ha e blɛfo, wai, kɛ oliv nu; nɛ e po piɛ kɛ ha e nahi kɛ tohi.

²⁹ Mawu ha Hezekia to, na, kɛ ní kpahi babauu nitsɛ, nɛ lɔ ɔ he je ɔ, e po mahi babauu.

³⁰ Matsɛ Hezekia nɛ ɔ nɔuu tsi Gihon pa a ngɛ yiti je nɛ e ha nɛ nyu ɔ ba be ngɛ David ma a bonyoku je. Nɔ́ tsuaa nɔ́ nɛ Hezekia pee ɔ, e ye manye ngɛ mi.

³¹ Benɛ ni ɔmɛ nɛ Babilonia ganɔ ɔmɛ tsɔ kɛ ba Hezekia ngɔ ba bi lɛ sane ngɛ nyakpɛ níhi nɛ ba zugba a nɔ ɔ a he pohu ɔ, Mawu ngmɛɛ Hezekia jemi he ngɔ ha lɛ. Mawu pee kikɛmɛ a nɔ́ nɛ ɔ konɛ e kɛ ka lɛ, nɛ e kɛ na nɔ́ tsuaa nɔ́ nɛ ngɛ e tsui mi.

Hezekia matsɛ yemi ɔ nyagbe

³² Matsɛ Hezekia he sane kpahi, kɛ ní kpakpahi tsuo nɛ e pee ɔ, a ngma ngɛ gbalɔ Yesaya, Amoz binyumu ɔ nina a nɛ ngɛ Yuda kɛ Israel Matsɛmɛ ɔmɛ a Blema Sanehi Womi mi ɔ mi.

³³ Hezekia ba gbo, nɛ a pu lɛ ngɛ matsɛmɛ ɔmɛ a gɔ ɔ mi, ngɛ yiti je ɔ. Benɛ e gbo ɔ, Yuda kɛ Yerusalem tsuo wo e hɛ mi nyami. Hezekia bi Manase ba ye matsɛ ngɛ e se.