Kronika II, 30 - BAIBLO ALOO NGMAMI KLƆUKLƆU Ɔ

A dla kɛ ha Hetsɔmi nyami ligbi ɔ

^1-3 Ma a nyɛ we nɛ a ye Hetsɔmi nyami be ɔ ngɛ e be mi ngɛ kekleekle nyɔhiɔ ɔ mi, ejakaa osɔfo ɔmɛ babauu na we nɛ a pee a he klɔuklɔu jamɛ a be ɔ mi. Jehanɛ hu, nihi babauu na we nɛ a ba Yerusalem. Enɛ ɔ he je ɔ, Matsɛ Hezekia, kɛ e ganɔ ɔmɛ, kɛ Yerusalem bi ɔmɛ kplɛɛ kaa a maa ye Hetsɔmi nyami be ɔ ngɛ nyɔhiɔ nɛ ji enyɔ ɔ mi; nɛ matsɛ ɔ tsɔ ya bɔ Israel kɛ Yuda tsuo amaniɛ. E je blɔ ngma womi ya kpee Efraim kɛ Manase wɛtso ɔmɛ ke a ba Yawɛ we ɔ ngɛ Yerusalem, nɛ a ba ye Hetsɔmi ɔ kɛ wo Yawɛ, Israel Mawu ɔ hɛ mi nyami.

⁴ Blɔ nya tomi nɛ ɔ sa matsɛ ɔ, kɛ ma a tsuo a hɛ mi.

⁵ Lɔ ɔ he ɔ, a to kaa á ya kpee Israel bi ɔmɛ tsuo kɛ ba Yerusalem, konɛ a ba ye Hetsɔmi ɔ kaa bɔ nɛ mlaa a tsɔɔ ɔ. Á je Dan ngɛ omleyi je, kɛ Beersheba ngɛ leneyi je kɛ ba, nɛ a he nɛ hiɛ babauu pe bɔ nɛ a baa daa a.

⁶ Tsɔli ɔmɛ ngɔ matsɛ ɔ, kɛ ganɔ ɔmɛ a sɛ gbi ɔ kɛ ya kpa Israel kɛ Yuda tsuo, nɛ a de ke, “Israel ma! Asiria bi ba tua nyɛ, nɛ nyɛ je a dɛ mi. Lɔ ɔ he ɔ, nyɛɛ kpale kɛ ba Yawɛ, Abraham, Isak, kɛ Yakob a Mawu ɔ ngɔ, konɛ lɛ hu e kpale nɛ e he nyɛ.

⁷ Nyɛ ko pee kaa nyɛ nɛmɛ ɔmɛ, kɛ nyɛ nyɛmimɛ ɔmɛ nɛ a pee yayami kɛ si Yawɛ, a Mawu ɔ. Kaa bɔ nɛ nyɛ na a, Mawu gbla a tue wawɛɛ nitsɛ.

⁸ Nyɛ ko wa tue kaa bɔ nɛ nyɛ nɛmɛ ɔmɛ pee ɔ; mohu ɔ, nyɛɛ bu Yawɛ tue. Nyɛɛ ba Yawɛ we ɔ ngɛ Yerusalem, we nɛ e pee klɔuklɔu kɛ yaa neneene ɔ. Nyɛ ba ja lɛ ngɛ lejɛ ɔ, konɛ e mi mi nɛ fu nyɛ wawɛɛ ɔ se nɛ po.

⁹ Ke nyɛ kpale kɛ ba Yawɛ ngɔ ɔ, nyɛ nyɛmimɛ ɔmɛ, kɛ nyɛ bimɛ ɔmɛ a ní maa pee nihi nɛ ba nuu mɛ nyɔguɛ kɛ ho ɔ mɔbɔ. A maa ngmɛɛ a he, nɛ a maa kpale kɛ ba we ekohu. Yawɛ, nyɛ Mawu ɔ mi mi jɔ, nɛ e naa mɔbɔ. Ke nyɛ kpale kɛ ba e ngɔ ɔ, e ma he nyɛ atuu.”

¹⁰ Tsɔli ɔmɛ ya kpa ma amɛ tsuo a mi ngɛ Efraim kɛ Manase zugba amɛ a nɔ kɛ ya si Zebulun tɔɔ ngɛ omleyi je. Nihi muɔ mɛ nɛ a ye a he fɛu.

¹¹ Se kɛ̃ ɔ, Asher, Manase, kɛ Zebulun bi ɔmɛ a ti nihi bɔɔ ba a he si, nɛ a kplɛɛ kaa a maa ba Yerusalem.

¹² Yuda hu, Mawu ngɛ ní tsue ngɛ lejɛ ɔ; Mawu ha nɛ Yuda ma kpekpemi ɔ tsuo a nya sɔ. A to a yi mi kaa a maa bu Yawɛ tue; nɛ nɔ́ nɛ matsɛ ɔ, kɛ ganɔ ɔmɛ fa mɛ ke a pee ɔ, a maa pee.

A ye Hetsɔmi ɔ

¹³ Nyɔhiɔ nɛ ji enyɔ ɔ mi ɔ, nihi babauu nitsɛ ba bua a he nya ngɛ Yerusalem konɛ a ye Abolokplolo nyami be ɔ.

¹⁴ A ya je bɔ sami la tɛhi tsuo nɛ ngɛ Yerusalem, nɛ a sãã bɔhi kɛ tsopa kɛ e he via ngɛ a nɔ ɔ, nɛ a muɔ mɛ kɛ ya pue Kidron pa a mi.

¹⁵ Nyɔhiɔ ɔ ligbi nɛ ji nyɔngma kɛ eywiɛ ɔ, a gbe jijɔ ɔmɛ nɛ a kɛ maa sã Hetsɔmi bɔ ɔ. Osɔfohi kɛ Levi bi nɛ a he tsɔ we ɔ, zo gbe mɛ kpɔtɔɔ. Lɔ ɔ he ɔ, a pee a he klɔuklɔu kɛ ha Yawɛ, nɛ a bɔni sami bɔ sami ngɛ Yawɛ we ɔ.

¹⁶ A ya da a blɔ he ɔmɛ ngɛ Yawɛ we ɔ mi kaa bɔ nɛ a ngma ngɛ Mawu nɔmlɔ Mose mlaa a mi ɔ. Levi bi ɔmɛ ngɔ lohwe ɔmɛ nɛ a kɛ ba sã bɔ ɔ a muɔ kɛ ha osɔfo ɔmɛ, nɛ osɔfo ɔmɛ kɛ muɔ ɔ fĩa bɔ sami la tɛ ɔ nɔ.

¹⁷ Akɛnɛ ni ɔmɛ babauu a he tsɔ we he je ɔ, a nyɛ we nɛ a gbe Hetsɔmi jijɔ ɔmɛ. Enɛ ɔ he je ɔ, Levi bi ɔmɛ gbe lohwe ɔmɛ ha mɛ, nɛ a pee lohwe ɔmɛ klɔuklɔu kɛ ha Yawɛ.

¹⁸ Ní nɛ ɔmɛ a se ɔ, nihi nɛ je Efraim, Manase, Isakar, kɛ Zebulun wɛtso ɔmɛ a mi kɛ ba a, a ti nihi babauu ji ni nɛmɛ nɛ na we nɛ a tsukɔ a he. Lɔ ɔ he ɔ, Hetsɔmi ɔ nɛ a ye ɔ, mɛɛ a yi lɛ kaa bɔ nɛ a to ke a ye ɔ. Hezekia sɔle kɛ ha jamɛatsɛmɛ ɔmɛ, nɛ e de ke,

¹⁹ “Yawɛ, wa nɛmɛ a Mawu nɛ o naa mɔbɔ lee! Nihi tsuo nɛ a ngɛ mo jae kɛ a tsui tsuo, se kɛ̃ ɔ a he tsɔ we ɔ, ngɔɔ a he yayami ɔmɛ kɛ pa mɛ.”

²⁰ Yawɛ bu Hezekia kue fami ɔ tue; e ngɔ ni ɔmɛ a he yayami ɔmɛ kɛ pa mɛ, nɛ e gbla we a tue.

²¹ Israel bi nɛ bua a he nya ngɛ Yerusalem ɔ ye Abolokplolo nyami be ɔ ligbi kpaago sɔuu kɛ bua jɔmi nɛ nya wa. Daa ligbi ɔ, Levi bi ɔmɛ, kɛ osɔfo ɔmɛ fiaa kpa saku, nɛ a laa kɛ jeɔ Yawɛ yi kɛ a tsui tsuo.

²² Hezekia je Levi bi ɔmɛ a yi wawɛɛ nitsɛ, ejakaa a je a he kpo kaa nihi nɛ le Yawɛ sɔmɔmi ní tsumi ɔ saminya. Ma a ye Abolokplolo nyami be ɔ ligbi kpaago sɔuu; a sã tue mi jɔmi bɔhi, nɛ a na Yawɛ, a nɛmɛ a Mawu ɔ si. Ligbi kpaago ɔmɛ a se ɔ,

A ye Hetsɔmi ɔ si enyɔne

²³ ma a tsuo kplɛɛ kaa a ma pa ye ligbi kpaago kɛ piɛ he. Nɛ a kɛ bua jɔmi nɛ nya wa ye ligbi kpaago kɛ piɛ he.

²⁴ Matsɛ Hezekia ha ma a na ku akpe, kɛ jijɔ akpe kpaago ke a gbe nɛ a ye; nɛ ganɔ ɔmɛ hu ha mɛ na ku akpe, kɛ jijɔ akpe nyɔngma. Osɔfohi babauu pee a he klɔuklɔu.

²⁵ Nɔ tsuaa nɔ bua jɔ e he; Yuda bi ɔmɛ, osɔfo ɔmɛ, Levi bi ɔmɛ, nihi nɛ je omleyi je kɛ ba a, kɛ nibwɔhi nɛ ngɛ Israel kɛ Yuda a.

²⁶ Yerusalem ma a mi pee hoo kɛ nyami sɔuu, ejakaa kɛ je Matsɛ Salomo, David binyumu ɔ yi nɔ ɔ, nɔ́ ko kaa kikɛ nɛ ɔ bɛ hyɛ.

²⁷ Nyagbe ɔ, osɔfo ɔmɛ, kɛ Levi bi ɔmɛ te si nɛ a ba Yawɛ gbaami kɛ pue ma a nɔ. Mawu nu a kue fami ɔmɛ ngɛ e hi he ɔ ngɛ hiɔwe, nɛ e bu mɛ tue.