Kronika II, 29 - BAIBLO ALOO NGMAMI KLƆUKLƆU Ɔ

Yuda matsɛ, Hezekia

¹ Hezekia ba bɔni tsɛ yemi ngɛ Yuda ma a nɔ benɛ e ye jeha nyingmi enyɔ kɛ enuɔ, nɛ e hi Yerusalem kɛ ye matsɛ jeha nyingmi enyɔ kɛ nɛɛ. E nyɛ ji Abiya, Zakaria biyo ɔ.

² Hezekia ya wo e nɛ̃ David nane, nɛ e pee Yawɛ suɔmi nya ní.

A tsukɔ Yawɛ we ɔ he

³ Benɛ Hezekia bɔni matsɛ yemi ɔ, jamɛ a jeha a we kekleekle nyɔhiɔ ɔ mi ɔ, e bli Yawɛ we ɔ agbo ɔmɛ ekohu, nɛ e ha nɛ a dla mɛ.

⁴ E kpee osɔfo ɔmɛ, kɛ Levi bi ɔmɛ kɛ ba kue ɔ mi ngɛ Yawɛ we ɔ beleku je,

⁵ nɛ e kɛ mɛ ba tu munyu ngɛ lejɛ ɔ. E de mɛ ke, “Nyɛ Levi bi, nyɛɛ bu mi tue! Nyɛɛ tsukɔ nyɛ he, nɛ nyɛɛ tsukɔ Yawɛ, nyɛ nɛmɛ a Mawu ɔ we ɔ hu he. Nyɛ je nɔ́ tsuaa nɔ́ nɛ bleɔ Yawɛ we ɔ kɛ je hiɛ ɔ.

⁶ Wa nɛmɛ ɔmɛ yi Yawɛ, wa Mawu ɔ anɔkuale; a pee yayami kɛ si lɛ. A kua Yawɛ, nɛ e we ɔ hu a yɛ lejɛ ɔ nɛ a ya ja lɛ.

⁷ A nga Yawɛ we ɔ sinya amɛ, nɛ a gbe kane ɔmɛ. Tsopa kɛ e he via, kɛ sami bɔ pohu a kpa sami ngɛ Yawɛ, Israel Mawu ɔ we ɔ.

⁸ Enɛ ɔ he je ɔ, Yawɛ mi mi fu Yuda kɛ Yerusalem, nɛ nɔ́ nɛ e pee mɛ ɔ ha nɛ nɔ tsuaa nɔ he mi po, nɛ a ye gbeye. Nyɛ nitsɛmɛ nyɛ na nɔ́ nɛ ɔ kɛ nyɛ hɛngmɛ.

⁹ Wa nɛmɛ ɔmɛ nɔ ngɛ ta mi, nɛ wa yi ɔmɛ, kɛ wa bimɛ ɔmɛ lɛɛ a nuu mɛ nyɔguɛ kɛ je.

¹⁰ “Amlɔ nɛ ɔ, i to ye yi mi kaa i kɛ Yawɛ, Israel Mawu ɔ maa so, konɛ e mi mi nɛ fu wɔ wawɛɛ ɔ se nɛ po.

¹¹ Ye bimɛ! Nyɛ ko puɛ be ko hu. Nyɛ ji nihi nɛ Yawɛ hla nɛ nyɛɛ sã tsopa kɛ e he via kɛ ha lɛ. Yawɛ hla nyɛ nɛ nyɛɛ nyɛɛ ma a hɛ mi kɛ sɔmɔ lɛ.”

^12-14 Levi bi nɛ ngɛ lejɛ ɔ jamɛ a be ɔ ji nɛ ɔmɛ nɛ: Kohat weku: Amasai binyumu Mahat, kɛ Azaria binyumu Yoel. Merari weku: Abdi binyumu Kish, kɛ Yehalelel binyumu Azaria. Gershon weku: Zimna binyumu Yoa, kɛ Yoa binyumu Eden. Elizafan weku: Shimri kɛ Yeuel. Asaf weku: Zakaria kɛ Matania. Heman weku: Yehuel kɛ Shimei. Yedutun weku: Shemaya kɛ Uziel.

¹⁵ Nyumu nɛ ɔmɛ ya bua a nyɛmimɛ Levi bi ɔmɛ a nya, nɛ mɛ tsuo a tsukɔ a he. Kɛkɛ ɔ, kaa bɔ nɛ matsɛ ɔ fa mɛ ke a pee ngɛ Yawɛ munyu ɔ nya a, a bɔni Yawɛ we ɔ he tsukɔmi.

¹⁶ Osɔfo ɔmɛ ya sɛ Yawɛ we ɔ mi nɛ a tsukɔ lejɛ ɔ. A muɔ nɔ́ tsuaa nɔ́ nɛ he tsɔ we kɛ je lejɛ ɔ kɛ ba kue ɔ mi. Levi bi ɔmɛ hu muɔ ní ɔmɛ kɛ je kpo nɛ a ya sake ngɔ pue Kidron pa a mi.

¹⁷ A je ní tsumi ɔ sisi ngɛ kekleekle nyɔhiɔ ɔ we kekleekle ligbi ɔ nɔ. Ligbi kpaanyɔne ɔ, a ya su kue ɔ nɛ ngɛ Yawɛ we ɔ hɛ mi ɔ he. A tsu ní ligbi kpaanyɔ kɛ piɛ he. Nɛ nyɔhiɔ ɔ we ligbi nɛ ji nyɔngma kɛ ekpa a, a tsukɔ Yawɛ we ɔ tsuo he gbe nya.

A bli Yawɛ we ɔ nya ekohu

¹⁸ Kɛkɛ nɛ Levi bi ɔmɛ ba Matsɛ Hezekia ngɔ, nɛ a ba bɔ lɛ amaniɛ ke, “Wa pee kusumi kɛ tsukɔ Yawɛ we ɔ tsuo gbe nya. La tɛ ɔ nɛ a sãã sami bɔ ngɛ nɔ ɔ, kɛ okplɔɔ ɔ nɛ a kɛ abolo klɔuklɔu ɔ maa nɔ ɔ, kɛ a he ní ɔmɛ tsuo, wa tsukɔ a he.

¹⁹ Jehanɛ, ní klɔuklɔuhi tsuo nɛ Matsɛ Ahaz hɛ ngɔ fɔ he benɛ e kpa Yawɛ se nyɛɛmi ɔ, wa bua tsuo nya nɛ wa pee mɛ klɔuklɔu ekohu. Amlɔ nɛ ɔ, ní ɔmɛ pueɔ si ngɛ Yawɛ bɔ sami la tɛ ɔ hɛ mi.”

²⁰ Kɛkɛ nɛ Matsɛ Hezekia pee esɔ ya kpee ma nimeli ɔmɛ, nɛ e kɛ mɛ tsuo ya sɛ Yawɛ we ɔ mi.

²¹ A ngɔ na ku kpaago, agbosu kpaago, jijɔ kpaago, kɛ to akpakpo kpaago kɛ ya sã yayami pami bɔ kɛ ha matsɛ ɔ, Yawɛ we ɔ, kɛ Yuda ma a. Matsɛ ɔ fa osɔfo ɔmɛ, nɛ ji Aaron nina a ke a gbe lohwe ɔmɛ nɛ a kɛ sã bɔ ngɛ Yawɛ bɔ sami la tɛ ɔ nɔ.

²² Kekleekle ɔ, osɔfo ɔmɛ gbe na ku ɔmɛ, nɛ a kɛ muɔ ɔ fĩa bɔ sami la tɛ ɔ he. Lɔ ɔ se ɔ, a gbe agbosu ɔmɛ, nɛ a kɛ a muɔ ɔ fĩa bɔ sami la tɛ ɔ he. Jehanɛ, a gbe jijɔ ɔmɛ, nɛ a kɛ a muɔ ɔ fĩa bɔ sami la tɛ ɔ he.

²³ Nyagbe ɔ, a ngɔ to akpakpo ɔmɛ kɛ ba matsɛ ɔ kɛ ma a tsuo a hɛ mi, nɛ a ngɔ a nine ngɔ pue a nɔ.

²⁴ Enɛ ɔ se ɔ, osɔfo ɔmɛ gbe to akpakpo ɔmɛ, nɛ a kɛ a muɔ ɔ pue bɔ sami la tɛ ɔ nɔ kaa yayami pami bɔ kɛ ha Israel ma a tsuo; ejakaa matsɛ ɔ fa ke a sã sami bɔ, kɛ yayami pami bɔ kɛ ha Israel tsuo.

²⁵ Mlaahi nɛ Yawɛ wo Matsɛ David kɛ gu lɛ David ɔ gbalɔ Gad, kɛ gbalɔ Natan a nɔ ɔ, Matsɛ Hezekia ye mlaa amɛ a nɔ pɛpɛɛpɛ. E ngɔ Levi bi ɔmɛ ya da si ngɛ Yawɛ we ɔ kɛ a dɛ mi gɔgɔhi, bɛhi, kɛ sakuhi

²⁶ nɛ ngɛ kaa matsɛ David ní ɔmɛ pɛpɛɛpɛ. Osɔfo ɔmɛ hu daa si ngɛ lejɛ ɔ kɛ a titimati ɔmɛ.

²⁷ Kɛkɛ nɛ Hezekia fa ke a sã sami bɔ ɔ ngɛ bɔ sami la tɛ ɔ nɔ. Benɛ a bɔni bɔ ɔ sami pɛ, ma a la kɛ je Yawɛ yi; titimati kpali ɔmɛ kpa titimati, nɛ saku fiali ɔmɛ hu fia saku.

²⁸ Ma a tsuo kpla si nɛ a ja Mawu; lali ɔmɛ la, nɛ titimati kpali ɔmɛ kpa titimati hluu kɛ ya si a sã sami bɔ ɔ gbe nya.

²⁹ Kɛkɛ nɛ Matsɛ Hezekia kɛ ma a tsuo kpla si nɛ a ja Mawu.

³⁰ Matsɛ ɔ, kɛ ganɔ ɔmɛ fa Levi bi ɔmɛ ke, yi jemi lahi nɛ David, kɛ gbalɔ Asaf po ɔ, a la jamɛ a la amɛ kɛ je Yawɛ yi. Lɔ ɔ he ɔ, be mi nɛ a kpla si nɛ a ngɛ Mawu jae ɔ, nɔ tsuaa nɔ la kɛ bua jɔmi.

³¹ Hezekia de ma a ke, “Jehanɛ lɛɛ nyɛ pee nyɛ he klɔuklɔu. Lɔ ɔ he ɔ, nyɛɛ ngɔ bɔhi, kɛ sina bɔ ba ha Yawɛ.” A pee ja, nɛ a ti ni komɛ je a tsui mi faa nɛ a ngɔ lohwehi kɛ ba konɛ a kɛ sã sami bɔhi.

³² Lohwehi nɛ ma a kɛ ba nɛ a kɛ sã sami bɔ ha Yawɛ ji nɛ ɔmɛ nɛ: na ku nyingmi kpaago, agbosu lafa, kɛ jijɔ lafa enyɔ.

³³ Enɛ ɔmɛ a se ɔ, a ngɔ na ku lafa ekpa, kɛ jijɔ akpe etɛ kɛ ba kaa bɔhi nɛ a gbaa a nɔ ha ma a nɛ a ye.

³⁴ Akɛnɛ osɔfo ɔmɛ a he pi bɔ nɛ a ma nyɛ maa gbe lohwe nɛ ɔmɛ tsuo he je ɔ, a nyɛmimɛ Levi bi ɔmɛ ba piɛ a he kɛ tsu ní ɔ kɛ ya si a gbe nya. Jamɛ a be ɔ mi ɔ, osɔfo ɔmɛ babauu pee a he klɔuklɔu. (Levi bi ɔmɛ bɔɔ mɔde kaa a maa pee a he klɔuklɔu pe osɔfo ɔmɛ po).

³⁵ Ngɛ lohwehi babauu nɛ a ngɔ kɛ ba sã sami bɔ ɔmɛ a se ɔ, a kɛ zɔ ba sã tue mi jɔmi bɔ, nɛ a ngɔ wai bɔhi hu kɛ piɛ sami bɔ ɔmɛ a he. Bɔ nɛ pee nɛ a bɔni Yawɛ jami ngɛ e we ɔ mi ekohu ji nɛ ɔ nɛ.

³⁶ Matsɛ Hezekia kɛ ma a tsuo na bua jɔmi, ejakaa Mawu piɛ a he kɛ tsu ní nɛ ɔmɛ tsuo ngɛ be kuku mi.