Kronika II, 27 - BAIBLO ALOO NGMAMI KLƆUKLƆU Ɔ

Yuda matsɛ, Yotam

¹ Yotam bɔni tsɛ yemi ngɛ Yuda ma a nɔ benɛ e ye jeha nyingmi enyɔ kɛ enuɔ, nɛ e hi Yerusalem kɛ ye matsɛ jeha nyɔngma kɛ ekpa. E nyɛ ji Zadok biyo Yerusha.

² Yotam pee Yawɛ suɔmi nya ní kaa bɔ nɛ e tsɛ Uzia pee ɔ pɛpɛɛpɛ; se lɛɛ e ya sɛ̃ tsopa kɛ e he via ngɛ Yawɛ we ɔ. Se kɛ̃ ɔ, ma a ya nɔ pee yayami.

³ Yotam ji nɔ nɛ ma Yawɛ we ɔ omleyi je agbo ɔ nɛ. Yerusalem ma a he ko nɛ a tsɛɛ Ofel ɔ, Yotam nɔuu lɛ fia lejɛ ɔ gbogbo ɔ saminya.

⁴ E po mahi ngɛ Yuda yo ɔmɛ a nɔ, nɛ e ma mɔhi ngɛ hue ɔmɛ a mi.

⁵ E kɛ Amon matsɛ ɔ, kɛ e tabo ɔ ya hwu ta, nɛ e ye a nɔ kunimi. E nyɛ Amon bi ɔmɛ a nɔ nɛ a tsu tó nɛ ɔmɛ ha lɛ jeha etɛ: sika hiɔ nɛ jiimi ji, kilo akpe etɛ kɛ e nya lafa eywiɛ, ngma nɛ jiimi ji tɔn akpe kɛ akoko hu kilo akpe.

⁶ Yotam matsɛ yemi ɔ ba he si, ejakaa e bu Yawɛ, e Mawu ɔ tue ngɛ nɔ́ tsuaa nɔ́ mi.

⁷ Yotam he sane kpahi nɛ piɛ, tahi nɛ e hwu, kɛ bɔ nɛ e to níhi a blɔ nya ha a, a ngma lɛ tsuo ngɛ Israel kɛ Yuda Matsɛmɛ ɔmɛ a Blema Sanehi Womi ɔ mi.

⁸ Yotam ye jeha nyingmi enyɔ kɛ enuɔ benɛ e bɔni matsɛ yemi, nɛ e hi Yerusalem kɛ ye matsɛ jeha nyɔngma kɛ ekpa.

⁹ Yotam ba gbo nɛ a pu lɛ ngɛ David ma a mi, nɛ e binyumu Ahaz ba ye matsɛ ngɛ e se.