Kronika II, 26 - BAIBLO ALOO NGMAMI KLƆUKLƆU Ɔ

Yuda matsɛ, Uzia

¹ Yuda ma a tsuo wo Uzia matsɛ ngɛ e tsɛ Amazia se. Jamɛ a be ɔ mi ɔ, e ye jeha nyɔngma kɛ ekpa.

² Benɛ Amazia gbo se ɔ, Uzia kpɔ Elat kɛ ha Yuda ekohu, nɛ e fia gbogbo kɛ wo ma a he.

³ Uzia ba bɔni tsɛ yemi benɛ e ye jeha nyɔngma kɛ ekpa, nɛ e hi Yerusalem kɛ ye matsɛ jeha nyingmi enuɔ kɛ enyɔ. E nyɛ biɛ ji Yekolia, nɛ e je Yerusalem.

⁴ Uzia ya wo e tsɛ nane, nɛ e pee Yawɛ suɔmi nya ní.

⁵ Be mi nɛ Zakaria ngɛ je mi ɔ, Uzia sɔmɔ Yawɛ kɛ e tsui tsuo; enɛ ɔ he je ɔ, Yawɛ hu gbaa lɛ. Zakaria ji nɔ nɛ tsɔɔ Uzia Mawu gbeye yemi.

⁶ Uzia kɛ Filisti bi ɔmɛ ya hwu ta. E ku Gat, Yamnia, kɛ Ashdod gbogbo ɔmɛ kɛ pue si; nɛ e po mahi ngɛ Ashdod kasa nya, kɛ Filisti bi ɔmɛ a zugba a nɛ piɛ ɔ tsuo nɔ.

⁷ Mawu piɛ e he nɛ e kɛ ye Filisti bi, Arabia bi nɛ ngɛ Gurbaal ɔ, kɛ Meun bi ɔmɛ a nɔ kunimi.

⁸ Amon bi ɔmɛ tsuɔ tó kɛ haa Uzia. Nɔ́ nɛ ɔ ha nɛ e matsɛ yemi ɔ ba he si, nɛ e biɛ pɛ wawɛɛ nitsɛ kɛ ya su Egipt tɔɔ.

⁹ Uzia fia gbogbo ngɔ wo Yerusalem he, nɛ e ma mɔ gagaagahi ngɛ kɔ̃ nya agbo ɔ, kɛ kɔ̃ agbo ɔ a nɔ, kɛ he nɛ gbogbo ɔ lɔgɔ si ngɛ ɔ.

¹⁰ E ma mɔhi ngɛ nga a nɔ hulɔ, nɛ e tsua vuhi fuu, ejakaa e ngɛ lohwehi babauu ngɛ kɔ̃ ɔ mi, kɛ nga a nɔ. Akɛnɛ e suɔ humi he je ɔ, e wo e ma mi bi ɔmɛ he wami, nɛ a hu wai ngmɔhi ngɛ yoku ɔmɛ a nɔ, kɛ kɔ̃ ɔmɛ a mi.

¹¹ Uzia ngɛ ta buli babauu nɛ a tsɔse mɛ, nɛ a mia kɛ ha ta hwumi. A dla ta buli ɔmɛ ngɔ wo kuuhi a mi. Ni nɛmɛ nɛ pee nɔ́ nɛ ɔ ji matsɛ pɛdiyo Yeyel, e setsɔ Maaseya, kɛ a nyatsɛ Hanania, matsɛ asafoatsɛmɛ ɔmɛ a ti nɔ kake.

¹² We puɔ nya dali katsɛmɛ nɛ ngɛ tabo ɔ nya a, a hiɛmi ji akpe enyɔ kɛ e nya lafa ekpa.

¹³ Ta buli nɛ ngɛ a sisi ɔ, a hiɛmi ji akpe lafa etɛ kɛ kpaago kɛ e nya lafa enuɔ. A je blɔ tsɔse ta buli nɛ ɔmɛ saminya, nɛ ke a kɛ matsɛ ɔ he nyɛli ya bua a, a nine nyɛɔ mɛ.

¹⁴ Uzia ha e ta buli ɔmɛ tsuo ta hwumi ní nɛ ɔmɛ: tsɛ̃i, akplɔ, dade pɛɛ, dade dama, kɛ̃ɛ̃, kɛ amlami tɛ.

¹⁵ E ha nɛ e ga ní tsuli kpanaa amɛ pee klama komɛ ngɛ Yerusalem. A kɛ klama amɛ ma mɔ ɔmɛ, kɛ gbogbo kɔ̃ nya amɛ a nɔ, konɛ a kɛ tsɛ̃ kɛ̃ɛ̃, nɛ a kɛ kpɛne tɛ agboagbohi kɛ je lejɛ ɔmɛ. E matsɛ yemi ɔ he si, nɛ e biɛ pɛ kɛ ya lokoo, ejakaa Mawu piɛ e he.

A gbla Uzia tue

¹⁶ Se benɛ Uzia tsɛ yemi ɔ ba he si ɔ, e wo e he nɔ, nɛ nɔ́ nɛ ɔ ha nɛ e hɛ mi kpata. E ya sã tsopa kɛ e he via ngɛ tsopa kɛ e he via sami la tɛ ɔ nɔ ngɛ Yawɛ we ɔ, nɛ e kɛ nɔ́ nɛ ɔ tɔ̃ Yawɛ, e Mawu ɔ nɔ.

¹⁷ Se osɔfo Azaria, kɛ osɔfohi katsɛmɛ nyingmi kpaanyɔ nyɛɛ matsɛ ɔ se,

¹⁸ nɛ a ya tsi e nya. A de lɛ ke, “Uzia, o be he blɔ nɛ o sãã tsopa kɛ e he via kɛ haa Yawɛ. Osɔfo ɔmɛ, nɛ ji Aaron nina a, mɛ pɛ ji ni nɛmɛ nɛ a hla ngɔ to nɛ a tsu nɔ́ nɛ ɔ. Jee he klɔuklɔu nɛ ɔ. O tɔ̃ Yawɛ Mawu ɔ nɔ, nɛ e gbaami be o nɔ hu.”

¹⁹ Uzia daa si ngɛ tsopa kɛ e he via bɔ sami la tɛ ɔ kasa nya ngɛ Yawɛ we ɔ kɛ e dɛ mi ngɛyu. E mi mi fu osɔfo ɔmɛ; kɛkɛ nɛ he womi nɔ hiɔ yaya ba pue e hɛ nya amlɔ nɔuu.

²⁰ Benɛ Azaria, kɛ osɔfo kpa amɛ na hiɔ ɔ ngɛ e hɛ nya a, a tsitsɛɛ e yi se kɛ je Yawɛ we ɔ. Lɛ nitsɛ hu e he sɔ kɛ je kpo, ejakaa Yawɛ gbla e tue.

²¹ He womi nɔ hiɔ nɛ ɔ ngɛ Matsɛ Uzia he hluu kɛ ya si e gbenɔ ligbi. E ho ya hi lɛ nitsɛ e we ɔ mi, ejakaa a tsi e nya ke e ko ya Yawɛ we ɔ hu. A he e ní tsumi ɔmɛ tsuo ngɛ e dɛ, nɛ e binyumu Yotam ba ye e nane mi kɛ hyɛ ma a nɔ.

²² Matsɛ Uzia he sane kpahi nɛ piɛ, kɛ je sisije kɛ ya si nyagbe ɔ, gbalɔ Yesaya, Amoz binyumu ɔ ngma lɛ tsuo pɛpɛɛpɛ.

²³ Uzia ba gbo nɛ a pu lɛ ngɛ matsɛmɛ ɔmɛ a pu he ɔ; se e hiɔ ɔ he je ɔ, a pu we lɛ ngɛ matsɛmɛ ɔmɛ a yɔkɔ ɔmɛ eko mi. E binyumu Yotam ba ye matsɛ ngɛ e se.