Kronika II, 22 - BAIBLO ALOO NGMAMI KLƆUKLƆU Ɔ

Yuda matsɛ, Ahazia

¹ Arabia bi komɛ ya gbe Matsɛ Yehoram binyumu ɔmɛ tsuo pɛpɛɛpɛ, nɛ a si jokuɛyo ɔ nɛ a tsɛɛ lɛ Ahazia a pɛ. Lɔ ɔ he ɔ, Yerusalem ma mi bi ɔmɛ wo Ahazia matsɛ konɛ e ye e tsɛ ɔ se.

² Ahazia ye jeha nyingmi enyɔ kɛ enyɔ benɛ e bɔni matsɛ yemi; nɛ e hi Yerusalem kɛ ye matsɛ jeha kake. E nyɛ Atalia a, Omri bibi ji lɛ. Atalia tsɛ ji Ahab.

³ Ahazia hu ya wo Ahab nane nɛ e kɛ pee yayami; ejakaa e nyɛ ji nɔ nɛ woɔ lɛ ga.

⁴ Ahazia pee yayami, ejakaa e tsɛ gbenɔ se ɔ, Ahab weku li ji ni nɛmɛ nɛ woɔ lɛ ga; nɛ mɛ lɛ a kpata e nane.

⁵ Mɛ nɔuu lɛ a wo lɛ ga nɛ e ya piɛ Israel matsɛ, Yoram, Ahab binyumu ɔ he nɛ a kɛ Siria matsɛ, Hazael ya hwu ta ngɛ Ramot nɛ ngɛ Gilead ɔ. Siria bi ɔmɛ plaa Yoram ngɛ ta a mi.

⁶ Lɔ ɔ he ɔ, e kpale e se kɛ ho Yezreel ma a mi ya konɛ e ya tsa e he. Yuda matsɛ, Ahazia, Yehoram binyumu ɔ hu bú e nɔ nɛ e ya slaa lɛ.

⁷ Se Mawu gu slaami nɛ Ahazia ya slaa Yoram ɔ nɔ nɛ e kɛ kpata Ahazia hɛ mi. Benɛ Ahazia ngɛ lejɛ ɔ, e kɛ Yoram je kpo ya na Nimshi binyumu nɛ a tsɛɛ Yehu ɔ. Lɛ ji nɔ nɛ Yawɛ hla kɛ to nɛ e ba kpata Ahab we ɔ hɛ mi.

⁸ Benɛ Yehu nyɛɛ Ahab weku li ɔmɛ, kɛ e huɛmɛ ɔmɛ a se nɛ e ngɛ mɛ gbee ɔ, e ya na Yuda ganɔ komɛ, kɛ Ahazia nyɛmimɛ ɔmɛ a bimɛ nɛ nyɛɛ Ahazia se kɛ ya slaa Yoram ɔ. Yehu gbe mɛ tsuo pɛpɛɛpɛ.

⁹ A hla Ahazia kɛ kpa si kɛ ya si a ya nu lɛ ngɛ Samaria, he nɛ e ya laa e he ngɛ ɔ. A ngɔ lɛ kɛ ba Yehu ngɔ, nɛ a ba gbe lɛ. Se kɛ̃ ɔ, bumi nɛ a ngɛ kɛ ha e nɛ̃, Matsɛ Yehoshafat he je ɔ, a pu lɛ; ejakaa Yehoshafat sɔmɔ Yawɛ kɛ e tsui tsuo. Nɛ e pee ja a, nɔ ko pa be Ahazia weku ɔ mi hu nɛ ma nyɛ maa ye matsɛ.

Yuda manyɛ, Atalia

¹⁰ Benɛ Matsɛ Ahazia nyɛ, Atalia na le kaa a gbe e binyumu ɔ, e ha nɛ a kpata Yuda matsɛ we mi bimɛ ɔmɛ tsuo a hɛ mi.

¹¹ Se Ahazia ngɛ nyɛmiyo ko nɛ a tsɛɛ lɛ Yehosheba, nɛ gba osɔfo ko nɛ a tsɛɛ lɛ Yehoyada. Yehosheba ku Ahazia binyumu ɔmɛ a ti nɔ kake nɛ a tsɛɛ lɛ Yoash ɔ kɛ je matsɛbinyumu ɔmɛ nɛ a yaa gbe ɔ a kpɛti. E ngɔ jokuɛ ɔ kɛ jokuɛ ɔ bimɛanyɛ ɔ ya laa ngɛ se tsu ko mi ngɛ Yawɛ we ɔ. Kikɛ nɛ ɔ Yehosheba pee kɛ he Yoash yi wami, nɛ Atalia nine sui e nɔ.

¹² Yoash hi lejɛ ɔ ngɛ laami tso mi jeha ekpa sɔuu, be mi nɛ Atalia ngɛ manyɛ yee ngɛ zugba a nɔ.