Kronika II, 21 - BAIBLO ALOO NGMAMI KLƆUKLƆU Ɔ

¹ Yehoshafat ba gbo nɛ a pu lɛ ngɛ matsɛmɛ ɔmɛ a gɔ ɔ mi ngɛ David ma a mi, nɛ e binyumu Yehoram ba ye matsɛ ngɛ e se.

Yuda matsɛ, Yehoram

² Matsɛ Yehoshafat binyumu Yehoram ngɛ nyɛminyumuhi ekpa. Mɛ ji Azaria, Yehiel, Zakaria, Azariahu, Mikael kɛ Shefatia.

³ A tsɛ ha mɛ sika tsu, sika hiɔ, kɛ ní kpa komɛ nɛ a he jua wa babauu nitsɛ; nɛ e ngɔ mɛ ngɔ to Yuda mahi nɛ a fia gbogbo ngɔ wo a he ɔ a mi kakaaka. Se Yehoram lɛɛ akɛnɛ lɛ ji bitɛte he je ɔ, Yehoshafat ngɔ lɛ ngɔ pee nɔ nɛ maa ye tsɛ ngɛ e se.

⁴ Benɛ Yehoram ba hi sɛ ɔ nɔ ngɛ e tsɛ se, nɛ e matsɛ yemi ɔ ba da si ɔ, e gbe e nyɛminyumu ɔmɛ tsuo, kɛ Israel ganɔ komɛ hulɔ.

⁵ Yehoram ye jeha nyingmi etɛ kɛ enyɔ benɛ e bɔni matsɛ yemi, nɛ e hi Yerusalem kɛ ye matsɛ jeha kpaanyɔ.

⁶ Lɛ hu e ya wo Israel matsɛmɛ ɔmɛ a nane kaa bɔ nɛ Ahab pee ɔ, ejakaa e ngɔ Ahab biyo. E pee yayami kɛ si Yawɛ.

⁷ Se Yawɛ sume kaa e ma kpata David we ɔ hɛ mi, ejakaa e kɛ David so, nɛ e wo si ke e kɛ e nina maa ye matsɛ kɛ maa ya neneene.

⁸ Yehoram yi nɔ ɔ, Edom tsɔ Yuda hɛ mi atuã, nɛ mɛ nitsɛmɛ a ya wo matsɛ kɛ ha a he.

⁹ Lɔ ɔ he ɔ, Yehoram kɛ e we asafoatsɛmɛ ɔmɛ, kɛ e ta zugba lɛ ɔmɛ tsuo ho ya tua Edom. Edom bi ɔmɛ sa a yi. Se nyɔ mi ɔ, a bɔ mɔde fia Edom bi ɔmɛ ní, nɛ a ma fo.

¹⁰ Kɛ je jamɛ a ligbi ɔ, Edom tsɔ e he kɛ je Yuda nɔ yemi ɔ sisi kɛ ba si mwɔnɛ ɔ. Jamɛ a be ɔ mi nɔuu ɔ, Libna ma a hu tsɔ atuã, ejakaa Yehoram je Yawɛ, e nɛmɛ a Mawu ɔ se.

¹¹ Jehanɛ se hu, Yehoram po jami hehi ngɛ Yuda yo ɔmɛ a nɔ, nɛ e ha nɛ Yuda ma a, kɛ Yerusalem tsuo pee yayami kɛ si Yawɛ.

¹² Gbalɔ Eliya ngma Yehoram womi, nɛ nɔ́ nɛ e ngma ngɛ womi ɔ mi ji nɛ ɔ nɛ: “Yawɛ, o nɛ̃ David Mawu ɔ bu mo fɔ; ejakaa o ya nyɛɛ we o tsɛ Yehoshafat, aloo Yuda matsɛ, Asa blɔ kpakpa amɛ a nɔ.

¹³ Mohu ɔ, o ya wo Israel matsɛmɛ ɔmɛ a nane, nɛ o ha nɛ Yuda ma a, kɛ Yerusalem tsuo ja amagahi kaa bɔ nɛ Ahab, kɛ ni nɛmɛ nɛ nyɛɛ e se ɔ ha nɛ Israel ma a pee ɔ pɛpɛɛpɛ. O nyɛminyumuhi nɛ a hi pe mo ɔ hu, o gbe mɛ.

¹⁴ Níhi nɛ o pee nɛ ɔ a he je ɔ, Yawɛ maa gbla o ma a, kɛ o bimɛ ɔmɛ, kɛ o yi ɔmɛ a tue wawɛɛ nitsɛ; nɛ e ma kpata o níhi nɛ o ngɛ ɔ tsuo a hɛ mi.

¹⁵ Mo nitsɛ lɛɛ o maa nu mi mi hiɔ nɛ nya wa; hiɔ nɛ ɔ maa hi o he daa kɛ yaa si o mi ní maa je pue si.”

¹⁶ Kɛkɛ nɛ Yawɛ sú Filisti bi ɔmɛ, kɛ Arabia bi ɔmɛ nɛ a ngɛ Sudan bi ɔmɛ a kasa nya a kɛ wo Yehoram he.

¹⁷ A ba tua Yuda, nɛ a ha ní ngɛ matsɛ we ɔ. A nuu matsɛ ɔ yi ɔmɛ, kɛ e binyumu ɔmɛ tsuo nyɔguɛ kɛ je. Matsɛ ɔ binyumu sekpɛ ɔ nɛ a tsɛɛ lɛ Ahazia a pɛ ji nɔ nɛ piɛ ngɛ se.

¹⁸ Ní nɛ ɔmɛ tsuo a se ɔ, Yawɛ ha nɛ Yehoram ba nu mi mi hiɔ nɛ be tsa ba; hiɔ nɛ ɔ hao matsɛ ɔ hluu.

¹⁹ Jeha enyɔ se ɔ, matsɛ ɔ mi ní je pue si, nɛ e gbo kɛ he hiami nɛ nya wa. Benɛ matsɛ ɔ gbo ɔ, e ma mi bi ɔmɛ slɛ we la ko nɛ tsoo gegeege ɔ kɛ wo e hɛ mi nyami kaa bɔ nɛ a pee kɛ ha e nɛmɛ ɔmɛ ɔ.

²⁰ Yehoram ye jeha nyingmi etɛ kɛ enyɔ benɛ e bɔni tsɛ yemi, nɛ e hi Yerusalem kɛ ye matsɛ jeha kpaanyɔ. Benɛ e gbo ɔ, nɔ ko nɔ ko yi lɛ kɔmɔ. A pu lɛ ngɛ David ma a mi mohu, se a pu we lɛ ngɛ matsɛmɛ ɔmɛ a gɔ ɔ mi.