Kronika II, 20 - BAIBLO ALOO NGMAMI KLƆUKLƆU Ɔ

Edom bi ba tua Yuda

¹ Pee se ɔ, Moab bi kɛ, Amon bi, kɛ a huɛmɛ nɛ ji Meun bi ɔmɛ ba tua Yuda ma a.

² Kɛkɛ nɛ ni komɛ ba bɔ Yehoshafat amaniɛ ke, “Ta babauu je Edom, ngɛ Ngo wo ɔ se kɛ ba tua mo. Niinɛ, a ngɔ Hazazon Tamar nɛ e biɛ kpa ji Engedi ɔ momo.”

³ Yehoshafat tsui po, nɛ e fa kue ha Yawɛ, nɛ e bi lɛ ga womi. Yehoshafat ha nɛ a fiɛ ke nɔ tsuaa nɔ nɛ ha hwɔ ngɛ Yuda zugba a nɔ tsuo.

⁴ Nihi je Yuda ma amɛ tsuo a mi kɛ ba Yerusalem, konɛ a ba bi Yawɛ ga womi.

⁵ A kɛ ni nɛmɛ nɛ ngɛ Yerusalem ɔ tsuo ya bua a he nya ngɛ kue he ɔ mi ngɛ Yawɛ we ɔ. Kɛkɛ nɛ Matsɛ Yehoshafat ho ya da si ngɛ a kpɛti,

⁶ nɛ e fa kue ke, “Yawɛ, wa nɛmɛ a Mawu lee, mo pɛ ji Mawu ngɛ hiɔwe, nɛ o yeɔ je ma amɛ tsuo a nɔ. O kle agbo; o ngɛ he wami, nɛ nɔ ko be nyɛe maa da o hɛ mi.

⁷ Anɛ pi mo, wa Mawu ɔ nɛ o fie zugba nɛ ɔ nɔ bi ɔmɛ kɛ je hiɛmɛ nɛ ɔ benɛ o ma, Israel ma a lo? Anɛ pi mo nɛ o ngɔ zugba nɛ ɔ kɛ ha o huɛ Abraham nina, konɛ e pee a nɔ́ kɛ ya neneene lo?

⁸ O ma a ba hi zugba a nɔ hiɛ ɔ, nɛ a po we kɛ wo o hɛ mi nyami. A le

⁹ kaa ke amanehlu ko ba a nɔ ɔ, ta jio, gbenɔ hiɔ jio, hwɔ jio, a ma ba da si ngɛ we nɛ ɔ hɛ mi, he nɛ a jaa mo ngɛ ɔ. Kɛkɛ ɔ, ke a fa kue ha mo ngɛ a haomi ɔ mi ɔ, o maa nu, nɛ o ma he a yi wami.

¹⁰ “Amlɔ nɛ ɔ, Amon bi, Moab bi, kɛ Edom bi ba tua wɔ. Benɛ wa nɛmɛ ɔmɛ je Egipt kɛ ma a, o kplɛɛ we nɛ a ya gu jamɛ a zugba amɛ a nɔ. Enɛ ɔ he je ɔ, wa nɛmɛ ɔmɛ ya lɔgɔ mɛ, nɛ a kpataa we a hɛ mi.

¹¹ Wa sina ji kaa a ba nɛ a ba fie wɔ kɛ je zugba nɛ o ngɔ ha wɔ nɛ waa hi nɔ ɔ nɔ.

¹² Mo ji wa Mawu! Moo gbla a tue ha wɔ, ejakaa wɔɔ lɛɛ ta babauu nɛ ba tua wɔ nɛ ɔ, wa be nyɛe maa da nya. Wa li bɔ nɛ wa maa pee ha; mo lɛ wa ngɛ hyɛe.”

¹³ Yuda nyumu ɔmɛ tsuo daa si ngɛ lejɛ ɔ ngɛ Yawɛ we ɔ, kɛ a yi ɔmɛ, kɛ a bimɛ ɔmɛ.

¹⁴ Kɛkɛ nɛ Mawu mumi ɔ ba Levi no ko nɔ ngɛ gua a mi. A tsɛɛ lɛ Yahaziel; Zakaria binyumu ji lɛ. E je Asaf weku ɔ mi, nɛ e nɛmɛ ji Matania, Yeyel, kɛ Benaya.

¹⁵ Yahaziel de ke, “Nɛnɛ Yehoshafat, nyɛ Yuda bi, kɛ Yerusalem bi tsuo, nyɛɛ bu tue! Yawɛ ke nyɛ tsui nɛ ko po, nɛ nyɛ ko ye gbeye kaa nyɛɛ kɛ ta babauu nɛ ɔ ma ya kpe, ejakaa ta a, tsa pi nyɛ nɔ́; Mawu nitsɛ ta ji ta a!

¹⁶ Hwɔɔ ɔ, nyɛɛ hia nɛ nyɛɛ kɛ mɛ ya kpe; a gu Ziz yo kpɛ blɔ ɔ nɔ kɛ ma; nyɛ ma ya na mɛ ngɛ kɔ̃ ɔ nya ngɛ Yeruel nga a hɛ mi.

¹⁷ Pi nyɛ nɛ nyɛ maa hwu ta nɛ ɔ. Nyɛɛ lɛɛ nyɛ ya da nyɛ blɔ hehi ngɛ nyɛ ta a nya, nɛ nyɛɛ mlɛ; nyɛ maa na kunimi nɛ Yawɛ maa ye ha nyɛ. Nyɛ Yuda, kɛ Yerusalem bi, nyɛ ko ye gbeye, nɛ nyɛ tsui ko po. Hwɔɔmɛ a je hwɔɔ ɔ, nyɛɛ ya nɛ nyɛɛ kɛ mɛ ya kpe, ejakaa Yawɛ kɛ nyɛ ngɛ!”

¹⁸ Kɛkɛ nɛ Matsɛ Yehoshafat kpla si nɛ e kɛ e hɛ mi bu si, nɛ ma a tsuo pee ja, nɛ a kɛ lɛ ja Yawɛ.

¹⁹ Levi bi nɛ je Kohat, kɛ Kora we puɔ nya amɛ ɔ te da si, nɛ a he ose kɛ je Yawɛ, Israel Mawu ɔ yi.

²⁰ E nɔ jena mɔtu kpla a, ma a hia kɛ ho Tekoa nga a nɔ ya. Benɛ a yaa a, Yehoshafat de mɛ ke, “Nyɛ Yuda, kɛ Yerusalem bi! Nyɛɛ ngɔ nyɛ hɛ kɛ fɔ Yawɛ nyɛ Mawu ɔ nɔ, nɛ nyɛ maa ye manye. Nyɛ he nɔ́ nɛ e gbali ɔmɛ deɔ nyɛ ɔ nyɛɛ ye, nɛ nyɛ maa ye kunimi.”

²¹ Enɛ ɔ se ɔ, matsɛ ɔ kɛ ma a kpe yi, nɛ e fa lali ɔmɛ ke a wo a tade klɔuklɔu ɔmɛ, nɛ a nyɛɛ tabo ɔ hɛ mi, nɛ a hi lae ke, “Nyɛɛ na Yawɛ si, ejakaa e suɔmi ɔ ngɛ daa!”

²² Benɛ a hia la a nɛ a bɔni Yawɛ yi jemi pɛ Yawɛ ha nɛ basabasa te si ngɛ he nyɛli ɔmɛ nɛ ba tua Yuda a a kpɛti, nɛ a fia a he ní. Mɛ ji Amon, Moab kɛ Edom bihi.

²³ Amon bi ɔmɛ, kɛ Moab bi ɔmɛ ya tua Edom bi ɔmɛ, nɛ a kpata a hɛ mi. Benɛ a gbe Edom bi ɔmɛ se ɔ, a plɛ ngɔ kpee a he kɛ ya si a kpata a sibi a hɛ mi.

²⁴ Benɛ Yuda ta buli ɔmɛ ba su buli a mɔ ɔ he ngɛ nga a nɔ ɔ, a plɛ hyɛ he nyɛli ɔmɛ, nɛ a na kaa mɛ tsuo pɛpɛɛpɛ a gbo kɛ pueɔ si. Nɔ kake ngmelu ji mi.

²⁵ Yehoshafat kɛ e ta buli ɔmɛ ba nɛ a ba ha ní ngɛ ni gbogboe ɔmɛ a he. Ta yibu ní nɛ a ha ji nɛ ɔmɛ nɛ: na babauu, niye ní, tade, kɛ ní kpa komɛ nɛ a he jua wa. A ngɔ ligbi etɛ kɛ bua ta yibu ní ɔmɛ a nya. Se a je fuu he, ejakaa ní ɔmɛ hiɛ tsɔ.

²⁶ Ligbi nɛ ji eywiɛ ɔ, a ya bua a he nya ngɛ Beraka kɔ̃ ɔ mi, nɛ a je Yawɛ yi ngɛ nɔ́ nɛ e tsu ha mɛ ɔ he. Enɛ ɔ he je nɛ a tsɛɛ jamɛ a kɔ̃ ɔ ke “Beraka” a nɛ.

²⁷ Yehoshafat nyɛɛ e tabo ɔ hɛ mi kɛ kpale kɛ ba Yerusalem kɛ manye, ejakaa Yawɛ ye a he nyɛli ɔmɛ a nɔ kunimi.

²⁸ Benɛ a ba su ma a mi ɔ, a fia saku, nɛ a kpa bɛ, kɛ titimati kɛ ya sɛ Yawɛ we ɔ mi.

²⁹ Je ma amɛ tsuo nu kaa Yawɛ ye Israel he nyɛli ɔmɛ a nɔ kunimi, nɛ a ye gbeye wawɛɛ nitsɛ.

³⁰ Yehoshafat ye matsɛ ngɛ tue mi jɔmi mi, ejakaa e Mawu ɔ ha lɛ he jɔmi ngɛ he tsuaa he kɛ bɔle si.

Yehoshafat matsɛ yemi ɔ nyagbe

³¹ Yehoshafat ye jeha nyingmi etɛ kɛ enuɔ benɛ e bɔni tsɛ yemi ngɛ Yuda ma a nɔ, nɛ e hi Yerusalem kɛ ye matsɛ jeha nyingmi enyɔ kɛ enuɔ. E nyɛ biɛ ji Azuba, Shilhi biyo ɔ.

³² Yehoshafat ya wo e tsɛ Asa nane, nɛ e pee nɔ́ nɛ sa Yawɛ hɛ mi.

³³ Se kɛ̃ ɔ, e hule we jami he ɔmɛ, nɛ ma a kpale we nɛ a ba nyɛɛ Yawɛ, a nɛmɛ a Mawu ɔ se kɛ a tsui tsuo.

³⁴ Ní kpahi tsuo nɛ Yehoshafat pee kɛ je e matsɛ yemi ɔ sisije kɛ ya si nyagbe ɔ, a ngma ngɛ Hanani binyumu Yehu Blema Sanehi Womi ɔ mi. Israel Matsɛmɛ ɔmɛ a Blema Sanehi Womi ɔ mi fa ji womi nɛ ɔ nɛ.

³⁵ Be ko ɔ, Yuda matsɛ, Yehoshafat, kɛ Israel matsɛ, Ahazia ya pee huɛ. Ahazia nɛ ɔ, yiwutsotsɛ ji lɛ.

³⁶ Yehoshafat kɛ Ahazia kpɛ jua yemi lɛhi ngɛ Eziongeber.

³⁷ Se Dodavahu nɛ je Maresha ma a mi ɔ binyumu Eliezer gba kɛ si Yehoshafat ke, “Akɛnɛ o kɛ Ahazia ya pee huɛ he je ɔ, Yawɛ ma ha nɛ o ní tsumi ɔ maa pee yaka.” Lɛ ɔmɛ ya ywia, nɛ a nyɛ we nɛ a ya su Tarshish.